Meeqqat kinguaassiuutitigut atornerlunneqaraangamik ajortoqarneranut ersiuteqarlutillu qisuariaateqarajuttarput. Ersiutit qisuariaatillu taakku ilaat ajoqutinnguussinnaapput. Qisuariaatit kinguaassiuutitigut atornerlugaanermut ersiutaasutut meeqqap takutitai, meeqqap meeqqatut pissusaanut, ass. tunngaviunerusumik annilaanganertut, nikallunganertut, imminut naleqartinnginnertut, allanut tatiginninnginnertut il.il. ilaalersartut, innarliinertut taasarpagut. Innarliinerit sivisusinnaapput ilinniarsimasuniillu katsorsartinnissamik piumasaqaatitaqarlutik. Ilaanni innarliinerit kinguaassiuutitigut atornerlunneqarsimanermut kingunerluutinnguuttarput. Tassalu ajoqusiinerit kinaassusaannut sunniuttut inersimasunngukatareernerannilu sunniuteqartut.
Innarliinerit ass. timikkut tarnikkullu ajoqutinngorsinnaapput ataavartut, ilungersualernermut/stress qisuariaatinngorsinnaapput, nikallunganinnguussinnaapput, anigoruminaatsumik nalaataqarnermut kingunerluutinngorsinnaapput (PTSD) kiisalu kanngusunninnguussinnaallutik, imminnut pisuutinninnguussinnaallutik allanullu attaveqarnermut tunngatillugu ajornartorsiutinnguussinnaallutik. Meeqqat kinguaassiuutitigut atornerlugaasut, arlalippassuartigut ajortumik imminnut isigilersarput inuunerminnilu nammineq killisamik maluginissaa ajornartorsiutigilersarlugu.
Inersimasut kinguaassiuutitigut atornerlugaasimanermik kingunerlutitsisut atoqatigiinnermut, timiminnik isiginnittariaatsiminnut inunnullu allanut atassuteqarnissamut akerleriinnik isummerneq misigisinnaavaat. Ilaqutariinnik pilersitsinissap inuunermiluunniit atassuteqarfinni allani ass. sulinermi akuunissap ajornakusoornera misigisinnaavaat.
Kinguaassiuutitigut atornerluinerup kinguneri meeqqamut taama pineqartumut, meeqqap qanigisaanut najukkamilu inuiaqatigiinnut annertusinnaapput. Isertugaqarneq, paqumiginninneq qisuariaatillu tamakkiisumik sunniisarput.
Kinguaassiuutitigut atornerlugaanerup ajoqusiinerisa qanoq annertutiginerat assigiinngissuteqangaatsiarsinnaavoq. Meeqqat ilaat meeqqanit allanit akiuussutissaqarnerusarput. Imaassinnaavoq angajoqqaaminni meeqqerivimmilu imal. atuarfimmi pitsaanerusunik atugassaqarsimasut. Imaassinnaavortaaq najukkami allanik pingaarutilinnik asannittunik tapersersuisunillu inersimasortaqarsimasut. Meeqqat pissusaat aamma assigiinngissuteqarsinnaapput. Meeqqat ilaat allanit nukissaqarnerullutik inunngortarput.
Kia kinguaassiuutitigut atornerluisuunera ass. taassuma meeqqamit tatigineqarnera tungiuisussatullu naatsorsuutigineqarnera, innarliinerup annertussusaanut pingaaruteqarportaaq. Kinguaassiuutitigut atornerluinerit qanoq sakkortutigisimanerat, ataasiarluni imal. arlaleriarluni piffissami sivisuumi kinguaassiuutitigut atornerlugaasimaneq sunniuteqarsinnaavortaaq