Ilaqutariit meeqqanik paarsisartut assigiinngitsut

Qanigisani attavigisartagaq, tassaavoq ilaquttat arlaat, ilaquttatulluunniit qanigisaq, meeqqamut angajoqqaarsiaasoq. Assigisaanik atuuppoq, inuusuttuaqqamut angajoqqaarsiatut attavigisaq. Attavigisatut angajoqqaarsianngussagaanni, inissiisoqannginnerani meeqqamut attaveqarneq, ilisimasaqarnerlu aamma meeqqamut qanoq attaveqariaaseqarneq aalajangiisuuvoq.

Qanigisani angajoqqaarsiatut attaviusut, tassaapput inuit meeqqamut ilaqutaasut, kinguaariinneersulluunniit, aammali ilaqutariit akornanni ikinngutaasinnaapput, akissarsiutigaluguluunniit angajoqqaarsiaasut, meeqqamut immikkut attuumassuteqartut, meeqqalluunniit attavigisai. Meeqqap sungiusimasaminiit, qanigisaminiillu avatangiiserisaaniit peersinneqannginnissaa siunertaavoq.

Qanigisaq attavigisartagaq, nalunngisamiit anneruvoq. Naatsorsuutigisaavoq, meeqqamut ilisarisimasaq inuit isumaginnittut, meeqqamut unamminartuni, pisariaqartitani il.il. takuuk attaveqarnermut piumasaqaatit.

Kommunikkoortumik angajoqqaarsiat ilaqutariiupput angajoqqaarsiaanissaannik kommunimiit noqqaavigineqartut.

Kommunikkoorlugu angajoqqaarsiat meeqqanik nalusaminnik tigusisarput.

Meeqqamut unamminartut, tigussaasumik kivitsinissaat pillugu, angajoqqaarsiat kommunimiit toqqarneqartarput. Angajoqqaarsiat misilittagaqarnerat, piginnaasaqarnerallu naatsorsuutigineqartarpoq, meeqqap unamminartorsiutaanik kivitsinissamut piumasaqaataammat. Angajoqqaatut oqartussaassuseqartut, angajoqqaajusut ikorfartorniarnerinut atassuteqartumik kommuunimi angajoqqaarsiat atorneqarajupput, taamaalilluni meeqqap angerlartinneqarnissaa sulissutigineqarsinnaammat.

Akissarsiutigalugu angajoqqaarsiaasartut angajoqqaarsiaapput, minnerpaamillu angajoqqaarsiap aappaa inunnut tunngasunik ilisimasaqarnermik tunuliaquteqartuusarpoq imaluunniit naleqquttunik misilittagaqarluni, inunnut isumaginninnermi ilinniakkamut assersuunneqarsinnaasumik.

Meeqqat immikkuullarissunik unamminartorsiortut, angajoqqaarsianut akissarsiutigalugu angajoqqaarsiaasartunut inissinneqartartut tarnikkut annertuumik innarligaasimasinnaapput. Meeqqat inuusuttuaqqallu isumagineqarnerminnik sumiginnagaasimasinnaapput, meeqqalluunniit inuusuttuaqqallu innarluuteqartuusinnaallutik, taakkualu taama aaqqiivigineqartarput kommuni naliliisimappat akissarsiutigalugu angajoqqaarsianiitsitaanissaat pitsaanerusoq.

Taamaattumik, angajoqqaarsiaasup meeqqamut atorsinnaasanik inunnut tunngasunik assigisaanilluunniit  ilinniagaqarsimanissaa misilittakkatigullu tunuliaqutaqarnissaa piumasaqaataavoq. Tassa piumasaqaataavoq angajoqqaarsiaq meeqqap ulluunerani paaqqinnittarfimmiinnerata atuarneraluniluunniit nalaannaani sulisassasoq.

Taamaasiornikkut meeqqap paarineqarnissamik perorsarneqarnikkullu pisariaqartitaasa naammassilluarneqarnissaat naatsorsuutigineqartarmat. 

Meeraq ulluunerani atuarfimmiluunniit paaqqinniffinni tamakkiisumik ilanngunniarnikkut ajornartorsiuteqarpat, angajoqqaarsiat meeqqamik aallersinnaatitaapput imaluunniit meeraq paaqqinniffimmiinnerani najorlugu ikorfartorsinnaallugu.

Pinasuartumik inissiinermi angajoqqaarsiat tassaapput kommunimi angajoqqaarsiassatut toqqagai, akissarsiutigaluguluunniit angajoqqaarsiaasartut, meeqqanik inissikkasuarneqartunik tigusisartut, takuuk meeqqamut ikorfartuinermut inatsit § 6, imm. 1.

Taaguut “pinasuartumik angajoqqaarsiat” tassaapput angajoqqaarsiat kommunimut attavigisatut atuuffillit. Taamaattumik pinasuartumik angajoqqaarsiat, allatut ilusilittut angajoqqaarsiaanngillat, kommunikkoortuusinnaallutillu akissarsiutigalugu angajoqqaarsiaasinnaapput, taamaammallu akuersisarnermut il.il. akuersisarnermut atuuttut maleruagassat kommunikkoortumik angajoqqaarsiaasartunut akissarsiutigalugulu angajoqqaarsiaasartunut aamma atuupput.

Pinasuartumik isumaqarpoq, angajoqqaarsiat kommuunimut piareersimasut, taamaattumillu tuaviortumik – piffissallu sivikitsuararsuup iluani – meeqqamik tigusisinnaasut.

Immikkut allanngortoqariasaarnermut piareersimaneq, angajoqqaarsiatullu pinasuartumik tigusisinnaaneq tassani inissaqartittariaqarpoq . Pingaartumik angajoqqaarsiat meeqqamik inissitamik allamik tigumiagaqareerpata.

Angajoqqaarsiat meeqqanik akuersissutaareersumiit amerlanerusunik tigusaqarsinnaanngillat.

Angajoqqaarsianut pinasuartumik tigusisartunut inissiineq, piffissaq sivikitsuinnaq atorlugu inissiineq nalinginnaasuuvoq. Sivisunerusumik ingerlataqarneq, angajoqqaarsianit pinasuartumik tigusisartunit, kommuunimiillu inissiisumiit isumaqatigiissusiorfigineqarsinnaavoq.

Pinasuartumik meeqqamik inissiinermut angajoqqaarsianiit, meeraq inissinneqartoq paariinnarsinnaaneranik periarfissaqarfiuvoq. Angajoqqaarsiatut atuutiinnarneq, angajoqqaarsiat akissarsiaannut naleqqussarneqassaaq, pinasuartumilli inissiinermi angajoqqaarsianut akiliutit (honorarit) atuutissanngillat.

Meeraq sivisuumik paarisassanngorlugu inissiiffissamut nuussineq, ilaqutariinni angajoqqaarsiassani, nalinginnaasumik inissiinertut atuuttoq, malittarisassat malillugit isumaqatigiissusiaq naleqqussarneqassaaq.

Ilaqutariinni angajoqqaarsiani isumaqatigiissusiaq nutaaq kommuunimiit suliarineqassaaq.

Nammineerluni aaqqissuussamik angajoqqaarsiaaneq, ilaqutariit iluaniippoq, meeqqamut angajoqqaatut oqartussaasuniit aaqqissuunneqartoq. Ilaqutariittut angajoqqaarsiatut, nammineerluni aaqqissuussaq, tassaavoq meeqqamut imminermut angajoqqaatut oqartussaassuseqartuniit aaqqissuussaq. Nammineerluni ilaqutariinni angajoqqaarsiatut aaqqissuussinermut malittarisassaq meeqqamut tapersersuinermut inatsisitigut § 39-mi naleqqussagaavoq.

Tamanna isumaqarpoq, ilaqutariinni angajoqqaarsiatut, nammineerluni aaqqissuussami meeqqap inissinneqarnera kommuunimut atassuteqanngilaq.

Ilaqutariinni angajoqqaarsiatut, nammineerluni aaqqissuussamik, meeqqap inissinneqarnera, meeqqamut tapersersuinermut inatsisit aalajangersagaat malillugit, ikorfartuinermut suliniuteqarnertut isigineqanngilaq. Inissiinermi isumaqatigiissut angajoqqaatut oqartussaassuseqartup ilaqutariinnilu angajoqqaarsiassatut qinikkat taamaallaat akornanni pisarpoq. Ilaqutariinni angajoqqaarsiatut nammineerluni aaqqissuussaq akissarsiaqaataanngilaq, takuuk meeqqamut tapersersuinermut inatsit § 39, imm. 1.

Angajoqqaaviusut, angajoqqaatut oqartussaassusermik pigisaqanngitsut, meeqqamik paarsisinnaanermut piumasaqaatit naapertorlugit meeqqamik paarsaqarnissamut akuerineqarsinnaanermi ilaatitaanngillat takuuk meeqqamut tapersersuinermut inatsit § 39, imm. 5.

Ilaqutariittut oqilisaassisuni meeraq inuusuttuararluunniit oqilisaassisutut tigummineqartarpoq, meeqqamik angerlarsimaffianiit qimagutsitsineq pitsaanerusumik aaqqiinerusoq kommuni naliliisimappat. Oqilisaassinermut aaqqissuussaq isumaqatigiissusiarineqassaaq, meeqqap sivikinnerusumik sivisunerusumilluunniit inissinneqarallarnissaa pillugu. Sapaatit akunnerata, qaammatilluunniit ulluini aalajangersimasuni, nalunaaquttap akunneri ikittuinnaat pineqarajuttarput. Oqilisaassinermut aaqqissuussaq sulinngiffeqarnermi pisussanngortinneqarsinnaavoq.

Ilaqutariinni oqilisaassisuniinnerup pilersinneqarnera, meeqqamut ikorfartuinermut inatsit § 25, imm. 4, nr. 3, naapertorlugu pissaaq, imaluunniit innarluuteqarnermut inatsit § 41, imm. 3 naapertorlugu.

Oqilisaassinermut ilaqutariit, ilaqutariit attaveqaataapput, kommunimi ilaqutariit angajoqqaarsiaasut, imaluunniit akissarsiaqaatigalugu angajoqqaarsiaasut.

Angajoqqaarsiaariaatsit allat assigalugit, oqilisaasutut angajoqqaarsiatut akuersissutinut piumasaqaateqarpoq.

Kisimiittut qinnuteqarunik akuerisaanissamut periarfissaqarput, tamatumunnga piumasaqaatit naammassineqarsimappata.

Oqilisaassisuuneq inissiinerunngilaq. Meeraq sivisunerusumik oqilisaassisuniippat, piffissaq inissiinertut nalilerneqassaaq.

Ataannartumik ullunit 14-init sivisunerusoq, sivisunerusutut isigineqassaaq.