airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Paarisa


Pitsaaliuinermut immikkoortortaqarfik Paarisa meeqqat inuusuttullu pingaarnerutillugit isumaginninnermi peqqinnissamullu suliassaqarfimmi peqqissutsimik siuarsaanermik pingaarnertullu pitsaaliuinermik suliaqarpoq. Paarisap suliaasa pingaarnerit ilagaat suliat akornanni suleqatigiinnermik ataqatigiissaarineq aqqutigalugu immikkoortut assigiinngitsut akornanni pitsaaliuinerup pitsaanngorsarneqarnissaa. Uppernarsineqarsimasunik suliassaqarfillu akornanni atuutilersinneqarsimasunik tunngaveqarluni peqqissutsimik siuarsaanermik pitsaaliuinermillu iliuusissanik inerisaallunilu atuutilersitsinernik Paarisa suliaqarpoq.

Paarisa immikkoortunut pingasunut agguarneqarsimavoq:

  • Suleqatigiit 1 – Peqatigiinnerit, nammineq piumassutsimik sulianik ataqatigiissaarisut – Suliniut 4: Nammineq piumassutsimik meeqqanik isumaginnin-nermut tunngatillugu suliniuteqarnermut sinaakkutit patajaatsut
  • Suleqatigiit 2 – Killiliisa, Atoqatigiinnikkut peqqissuuneq, paasissutissat aamma imminornermik pitsaaliuineq
  • Sammisaq 3 – MANU, Siusissumik iliuuseq & Meeqqat 0-18-inik ukiullit –Suliniut 1: Pingaartumik ilaqutariit qajannartut erloqisullu immikkut ukkataralugit angajoqqaat piginnaasaannik nukittorsaaneq, aamma Suliniut 2: Kommunini sullissisut, peqqissaasut/ernisussiortut akornanni suliassaqarfiit assigiinngitsut akornanni sulialinnik suleqatigiinneq patajaatsoq

Paarisami suliat pingaarnerit tulliuttut isumagineqarput:

  • Inuuneritta III-mik atuutilersitsineq - Naalakkersuisut meeqqat pitsaasumik inuuneqarnissaannut suleqatigiinnissamut periusissiaat 2020-2030
  • Killiliisamik atuutilersitsineq - Naalakkersuisut kinguaassiutitigut atornerluinermut periusissiaat 2018-2022
  • Pitsaaliuineq peqqissutsimillu siuarsaaneq ukununnga tunngatillugit: Imigassaq, pujortarneq, nerisat, timimik atuineq sianissutsikkullu peqqissuuneq
  • Imminornermik pitsaaliuineq
  • Meeqqat 0 – 18
  • MANU – angajoqqaanut najoqqutassiaq
  • Siusissumik Iliuuseqarneq
  • Peqqinnartumik atoqateqarneq, "Inuusanik suliniut" ilanngullugu
  • Paasissutissat
  • Meeqqanut tunngatillugu nammineq piumassutsimik suliniarnerup pitsaanerusumik atugassaqartinneqarnissaa

Paarisa innuttaasunut nittartakkamik Paarisa.gl-imik isumaginnittuuvoq. Nittartakkap pitsaasumik inuuneqarnermik ilisimasanik isumassarsianillu siammarsaanissaq sumullu ikiortissarsiortoqarsinnaaneranik siunnersorneqarsinnaanermillu ilisimatitsineq siunertaraa.