airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Isumaginninnermut Aqutsisoqarfik pillugu


Isumaginninnermut, Ilaqutariinnut Inatsisinillu Atuutsitsinermut Naalakkersuisoqarfiup ataani Isumaginninnermut Autsisoqarfik immikkoortortanut arfinilinnut agguarneqarsimavoq: Pinaveersaartitsinermut immikkoortortaq Paarisa, Aningaasaqarnermut immikkoortortaq, Ulloq Unnuarlu Inissitsiterinermullu Immikkoortortaqarfik, Sullissisunut Siunnersiuisarfik, Innuttaasunut immikkoortortaqarfik aamma Allattoqarfik. Immikkoortortaqarfiit qanimut suleqatigiipput suliffeqarfillu suliatigut pitsaasumik ingerlatsinissamik, nutaamik eqqarsarnermik aqutsisoqarfimmi avataanilu suliaqartunik pingaartumillu nuna tamakkerlugu kommuninik suleqateqarnermik ineriartortumik pingaartitsivoq.

Paarisa

Paarisa peqqissutsimik siuarsaanermik isumaginninnermilu peqqissutsimillu suliaqarfinni pinaveersaartitsinermik suliaqarpoq.
Paarisap suliassaasa pingaarnerit ilagaat kommunit oqartussaasullu allat kiisalu kattuffiit suleqatigilluinnarlugit peqqissutsimik siuarsaanermik periutsinik iliuutsinillu inerisaallunilu atuutilersitsineq.

Paarisa ilaatigut makkuninnga suliaqarpoq:

  • Inuuneritta III-mik atuutilersitsineq - Naalakkersuisut meeqqat pitsaasumik inuuneqarnissaannut suleqatigiinnissamut periusissiaat 2020-2030
  • Killiliisamik atuutilersitsineq - Naalakkersuisut kinguaassiutitigut atornerluinermut periusissiaat 2018-2022
  • Pinaveersaartitsineq peqqissutsimillu siuarsaaneq ukununnga tunngatillugit: imigassaq, pujortarneq, nerisat, timimik atuineq, sianissutsikkut peqqissuuneq
  • Imminornermik pinaveersaartitsineq
  • Meeqqat 0-18
  • MANU - angajoqqaanut najoqqutassiaq
  • Siusissumik Iliuuseqarneq
  • Peqqinnartumik atoqateqarneq, "Inuusanik suliniut" ilanngullugu
  • Paasissutissat
  • Meeqqanut tunngatillugu nammineq piumassutsimik suliniarnerup apitsaanerusumik atugassaqartinneqarnissaa

Innuttaasunut sammitillugu nittartagaq Paarisa.gl Paarisamit isumagineqarpoq. Nittartakkap pitsaasumik inuuneqarnermik ilisimasanik isumassarsianillu siammarsaanissaq sumullu ikiortissarsiortoqarsinnaaneranik siunnersorneqarsinnaanermillu ilisimatitsineq siunertaraa.

Allattoqarfik

Isumaginninnermut Aqutsisoqarfiup allattoqarfia aqutsisoqarfimmi suliatigut ilisimasat akornanni isumaginninnikkut atukkanik pitsanngorsaalluni nutaanik iliuuseqartoqarneranik ataqatigiissaarisarpoq, ilisimatitsilluni inerisaallunilu.

Innuttaasunut immikkoortortaqarfik

Isumaginninnermut Aqutsisoqarfimmi Innuttaasunut immikkoortortaqarfik innuttaasunut toqqaannartumik aqutsisoqarfiup neqeroorutaanik ingerlatsivoq. Innuttaasunut immikkoortortaqarfiup ilaatigut ingerlappai, Meeqqanik kinguaassiutimikkut atornerlunneqarsimasunik katsorsaasut angalaqatigiittartut aamma Inersimasunik kinguaassiutimikkut atornerlunneqarsimanermit kingunerlutsitsisunik katsorsaasut angalaqatigiittartut. Immikkoortortaqarfiup isumaginninnermut tunngatillugu oqarasuaatikkut siunnersuineq ingerlatsinerlu aamma akisussaaffigai.

Immikkoortortaqarfiup pingaarnertut suliassarai:

  • Tusaannga aqqutigalugu isumaginninnerup tungaatigut oqarasuaatikkut siunnersuineq
  • Inersimasunik kinguaassiutimikkut atornerlunneqarsimanermit kingunerlutsitsisunik katsorsaasut angalaqatigiittartut
  • Meeqqanik kinguaassiutimikkut atornerlunneqarsimasunik katsorsaasut angalaqatigiittartut
  • Alliaq aqqutigalugu inunnut nakuusertartunut katsorsaanermik neqeroorut
  • Inatsisitigut ataataqanngitsunut katsorsaanissamut neqeroorut aamma inatsisitigut ikorfartuineq
  • Ilaqutariinnut immikkoortoq aqqutigalugu Ilaqutariinnut Sullissivinnut qimarnguinnullu piginnaanngorsaaneq

Ulloq Unnuarlu Inissitsiterinermullu Immikkoortortaqarfik

Immikkoortortaqarfik ulloq unnuarlu paaqqinniffinnik Namminersorlutik Oqartussanit pigineqartunik ingerlatsinermik kiisalu ulloq unnuarlu paaqqinniffinnut imminut pigisunut, kommuninit pigineqartunut Namminersorlutillu Oqartussanit pigineqartunut inissiinernik suliaqarpoq. Immikkoortortaqarfiup Qitiusumik Innersuussinermut Aaqqissuussaq ingerlappaa tassungalu atatillugu ulloq unnuarlu paaqqinniffinnik imminut pigisunik, Namminersorlutik Oqartussanit pigineqartunik kommuninillu pigineqartnik akuersissuteqarnermut akisussaaffeqarluni. Tamatuma saniatigut nuna tamakkerlugu inunnut innarluutilinnut sullissivimmik, Pissassarfimmik, tamakkiisumik akisussaaffeqarpoq.

Immikkoortortaqarfiup pingaarnertut suliassarai:

  • Perorsaanermik siunnersuineq, inerisaaneq ilitsersuinerlu
  • Meeqqanut inuusuttunullu ulloq unnuarlu paaqqinniffinnut kiisalu inunnik innarluutilinnik paaqqinniffinnut ilinniartitaaneq pikkorissaanerillu
  • Qitiusumik Innersuussinermut Aaqqiissut
  • Sanaartornermut, illuutinut aserfallatsaaliinernullu suliassat
  • Ulloq unnuarlu paaqqinniffinnik Namminersorlutik Oqartussanit pigineqartunik nalinginnaasumik ingerlatsineq
  • Ulloq unnuarlu paaqqinniffinnik akuersineq

Aningaasaqarnermut immikkoortortaq

Aningaasaqarnermut immikkoortortaq ulloq unnuarlu paaqqinniffiit Namminersorlutik Oqartussanit pigineqartuni aningaasaqarnikkut ingerlatsinermik isumaginnippoq. Immikkoortortap ulloq unnuarlu paaqqinniffiit tamaasa aningaasaqarnikkut ataavartumik misissuiffigisarpai.

Immikkoortortap Naalakkersuisoqarfiup aamma Isumaginninnermut Aqutsisoqarfiup aningaasaqarnerat ingerlappai. Tamatuma saniatigut immikkoortortap innuttaasut Danmarkimi inissinneqarsimasut tikeraarlutik angalanissaat aaqissorlugillu ingerlatarai.

MALUGIUK! Akiligassat aningaasarsiallu pillugit saaffiginnissutit tamarmik f-oekonomi@nanoq.gl-imut nassiunneqassapput.


Sullissisunut Siunnersiuisarfik

Sullissisunut Siunnersiuisarfiup pingarnertut suliassaraa meeqqanut inuusuttunullu atugarliortunut tunngatillugit kommuninik siunnersuillunilu ilitsersuineq, taamaaliornikkut suliassaqarfimmi inatsisitigut inunnillu sullissinermi suliatigut ilisimasanik periutsinillu nukittorsaanissaq anguniarneqarluni.

Sullissisunut Siunnersiuisarfimmi pingasunik immikkoortortaqarpoq:

Sullissisunut Siunnersiuisoqatigiit meeqqat inuusuttullu pillugit suliassaqarfimmi kommunini oqartussaasunut suliamik suliaqartunut ataaniittut isumagaat:

  • Meeqqat tapersersorneqarnissaannut inatsit naapertorlugu oqartussaasoqarfimmi suliamik suliaqartunut aqutsisuinullu siunnersuillunilu ilitsersuineq (oqarasuaat, e-mail imaluunniit Skype/Teams atorlugu)
  • Meeqqat tapersersorneqarnisaannut inatsit tunngavigalugu inatsisilerinermik pikkorissaaneq
  • Oqartussaasunik siunnersuineq, ilisserutit ilitsersuutillu - nalunaarutinik, inunnik isumaginninnermi suliassanik suliaqarnermi (SFU) iliuusissatullu pilersaarutinik itinerusumik pikkorissaasoqarsinnaanera ilanngullugu.
  • Sulianut aalajangersimasunut tunngatillugu oqartussaasumik sulianik suliaqartunut aqutsisuinullu sulianik supervisioni atorlugu siunnersuineq

Suligasuartitaq Task Force meeqqat inuusuttullu pillugit suliassaqarfimmi kommunini oqartussaasunut suliamik suliaqartunut ataaniittut isumagaat:

  • Sullissisunut ilitsersuut naapertorlugu oqartussaasuni sulianik suliaqartumik issiaqateqarluni ilitsersuineq (Task Force-p ingerlatsinera)
  • Annertuumik sumiginnaasoqarsimatillugu aamma meeqqanik inuusuttunillu kinguaassiutitigut atornerluineq pillugu suliani annertunerusuni kommunini ikiuunneq

Ilaqutariinnut paarsisartunut immikkoortortap kommunini ilaqutariinnut paarsisartunut siunnersortinut ataaniittut suliarai:

  • Siunnersuineq ilitsersuinerlu
  • Suliamik supervision atorlugu siunnersuineq
  • Ilaqutariinnut paarsisartunut tunngaviusumik pikkorissaaneq
  • Ilaqutariinnut paarsisartunut ilinniartitseqqinneq