Tunuliaqutaasut
Inatsisartut tamarmik 2019-imi upernaakkut ataatsimiinnerminni Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu Naalakkersuisut danskit naalakkersuisuinut ikiorneqarnissamik qinnuiginnissasut isumaqatigiipput. Taamaattumik 2019-imi aasakkut Naalakkersuisut danskit naalakkersuisuinut saaffiginnipput taakkulu ikiorusupput. 10. oktober 2019-imi taamanikkut Isumaginninnermut Inatsisinillu Atuutsitsinermut Naalakkersuisoq, Martha Abelsen, aamma Isumaginninnermut Utoqqarnullu ministeri, Astrid Krag, allakkamik atsiorput, atsiorneq isumaqartinneqarpoq ataatsimut suliaq aallartittoq. Danskit naalakkersuisui suliniutip pitsanngorsarnissaanut 80 mio. kr.-nik immikkoortitsipput.
Kalaallit Nunaanni meeqqanut inuusuttunullu atugarliortunut suliniut qanoq iliornikkut pitsaanerulersinnaasoq paasiniarlugu aqutsisoqatigiinnik pilersitsisoqarpoq. Aqutsisoqatigiinni taamani Isumaginninnermut Inatsisinillu Atuutsitsinermut Naalakkersuisoqarfimmit, Danmarkimi Isumaginninnermut Utoqqarnullu ministereqarfimmit, Danmarkimi Justitsministereqarfik aammalu kalaallit kommuniinit sinniisoqarpoq. Kommunit Qeqqata Kommuniani kommunaldirektørimit, Juliane Henningsenimit sinniisoqarsimapput. Julie Henningsen aqqutigalugu kommunit suliamut peqataatinneqarput aammalu Kalaallit Nunaanni meeqqanut inuusuttunullu atugarliortunut suliniummut suliniutit sorliit pitsaanerulersitsisinnaanersut pillugit aalajangeeqataasinnaasimallutik.
Aqutsisoqatigiit Qeqqata Kommunianut aamma Avannaata Kommunianut aallarsimapput matumanilu ilaatigut isumaginninnermut suliassaqarfimmi, ilinniartitaanermut suliassaqarfimmi sullissisut ilaqutariinnullu sullissivinni sulisut oqaloqatigisimallugit. Covid-19 pissutigalugu kommunit sinneri pingasut onlinekkut ataatsimeeqatigineqarput.
Atuutilersitsineq
Kalaallit Nunaanni meeqqanut inuusuttunullu suliniutip qanoq pitsaanerulersinnissaanut innersuussutit 16-it aqutsisoqatigiit 2020-mi augustimi saqqummiuppaat. Innersuussutit maannakkut suliniutinik taagorneqarput. 2023 naajartunnginnerani suliniutit 16-it tamarmik atulersinneqassapput. Atulersitsineq aallartereerpoq 2023-llu tungaanut ingerlaavartumik ingerlassalluni.Suliniutit taakku 16-it Meeqqanut, Inuusuttunut Ilaqutariinnullu Naalakkersuisoqarfiup, Isumaginninnermut Aqutsisoqarfiup, Ilinniartitaanermut Aqutsisoqarfiup danskillu Justitsministereqarfiata atulersinnissaat akisussaaffigaat.
Suliniutinik atulersitsinissaq qulakkeerniarlugu kommunini sulisut Isumaginninnermut Aqutsisoqarfimmit aamma Ilinniartitaanermut Aqutsisoqarfimmit immaqalu aamma Meeqqanut, Inuusuttunut Ilaqutariinnullu Naalakkersuisoqarfimmit attaveqarfigineqassapput.
Kommunit suliniutit aallartisarneranni saqqummiunnerannullu pingaarutilittut inissisimasimapput. Suliniutit atulersinneqarnerannut kommunit pingaaruteqarluinnartutut inissisimapput. Kalaallit Nunaanni meeqqat inuusuttullu atugarisaasa pitsanngortinnissaat iluatsissappat, kommunit aqutsisoqarfiillu suleqatigiinnissaat pingaaruteqarpoq.