Ulluunnerani paaqqinnittarfinni aqutsisut aamma Meeqqanut Ilaqutariinnullu ingerlatsiviup meeqqat inuunerminni ilungersunartorsiortunik paasinniaartarnissaminnik piginnaanngorsarneqarput.
Ulluunnerani paaqqinnittarfinni sulisut piginnaanngorsaaneq aamma piginnaasanik inerisaaneq meeqqat inuusuttullu inuuniarnermikkut artorsartut pillugit kalaallit danskillu suliaqarfiini assigiinngitsuni suleqatigiinnerit nukittorsarneqarnerini suliniutinik ukkissilluni suliaqarnernut ilaapput, ulluinnarni taakkua Suliniut 3-mik aamma taaneqartarput.
Nuummi suliniut pillugu eqimattap makkunannga piginnaanngorsaavoq:
- fagchef ataaseq aamma kommunip meeqqanut ilaqutariinnullu ingerlatsiviani perorsaanermik siunnersortit
- ulluunnerani neqeroorutini aqutsisut, aqutsisut tullersortai kiisalu ulluunerani neqeroorutit/ paaqqinnittarfinni 20-ni inimi perorsaasoq ataaseq
- Kapisilinnit angerlarsimaffimmi paarsisartoq ataaseq
Eqimattat sullinniakkat saniatigut kommunimit pinaveersaartitsinermut siunnersortit marluk kiisalu Isumaginninnermut Aqutsisoqarfiup Meeqqat ineriartornerannut immikkoortortaqarfianit Meeqqat 0-miit 18-imut sulisui marluk malinnaasutut peqataapput. Meeqqat 0-miit 18-imut sulisuisa sakkoq digital atorlugu inuunerissaanermik nalunaarusiortarneq, ulluinnani TOPI-mik (Tidlig Opsporing Og Indsats) taaguutilik saqqummiuppaat aamma malinnaasutut peqataapput.
Peqataasunit piginnaanngorsaanerup eqikkarneqarneranit oqaatsit:
"Oqallinnerit avitseqatigiinnerit ilisimasanillu tunniussinerit aaqqissuussaalluakkamillu saqqummiussiffigeneqarneq"
"Paasisaqarnarpoq aamma eqqarsaaterpassuit aallartinneqarput"
"Piginnaanngorsaanerup kalaallisut ingerlanera"
Suliniut 3-mi pingaarnertut anguniagaq tassaavoq, ulluunerani neqeroorutini perorsaanermik inuit suliallit aqutsisullu ilisimasat ineriartortitsinerlu aqqutigalugit piginnaasatigut qaffassarnissaq kiisalu meeqqanik aarlerinartumiittunik meeqqanillu sumiginnaanermik eqqugaasimasunik paasiniaanermi, pinaveersaartitsinermi iliuuseqartarnermilu ataatsimoorussaminik suleriutsimik tunniussuinissaq.
Sulisut meeqqat sapinngisamik siusissukkut paasiniaaffigineqarnissaannik pisariaqartitsineri piginnaanngorsaanermi nukittorsarneqassapput. Amerlanerit siusissukkut paasiniaaneq pillugu piginnaanngorsarneqareerlutik amerlanerit ilisimasalersimallutik oqaluttuarneri titartakkami ataaniittumi takuneqarsinnaavoq:
Piginnaanngorsaqqiineq sisamanik pingaarnertut suliassaqarfiusarpoq, Suliniutip 3-p kuffertimik ataatsimut taasartagaanik. Kufferti sakkunik makkunannga imaqarpoq: Meeqqap mappia paasiniaariatsimik ilalik, angajoqqaanut attaveqartariaaseq, avatangiisit atorlugit ilinniartitsineq aamma suliat aallavigalugit aqutsineq.
- Nuummi ulluunnerani paaqqinnittarifnni sulisut piginnaanngorsarneqarneri piareerparput. Pikkorissarnermi ulluunnerani paaqqinnittarfinni sulisut ilisimasaat malunnaatilimmik qaffappagut aamma sumiginnakkanik paasiniaanermi sakkut atorlugit piginnaasaat pinaveersaartitsinerilu qaffallutigit, taama oqarpoq meeqqat ineriartornerannut immikkoortortaqarfimmi pisortaq, Maliina Junge Jørgensen.
Meeqqap mappia
Peqataasut inatsit malillugu Meeqqap mappianik, naqqissorneqarnikuusumik, saqqummiivigineqarput. Taanna atugarissaarnerup uuttuutaanik imaqarpoq, taanna meeqqap atugarissaarneranik siusissukkut paasiniaalluni sakkutut atorneqartarpoq. Atugarissaarnerup uuttuutaata sulisut suliffimmi iluani meeqqat ataasiakkaat pillugit oqaloqatigiinnissaannut oqaloqatigiinnerlu tunngavigalugu iliuuseqarnissaannut siunnersuutaasarpoq.
Atugarissaarnerup uuttuutaa avatagiisit atorlugit ilinniartitsinermut aamma angajoqqaanut attaveqarnermi sakkutut atorneqarsinnaavoq.
Meeqqap mappianik saqqummiinerup nalilersorneqarnerani peqataasoq ataaseq ima oqarpoq:
"Isumaqarpunga meeqqamut iluaqutaarujussuartoq, tassami siusinaartumik iliuuseqajaarnisamut sakkussaalluassasoq, kiisalu angajoqqaanik ajunngitsumik attaveqatigiinnermut aqqutissiuussisinnaalluartoq"
