airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Aningaasaateqarfik Inuuneritta meeqqanut inuusuttunullu suliniutinut peqqissuunissamik siunertalinnut 21-nut tapiivoq

Paarisa tapiissutinik aningaasaateqarfik Inuuneritta-meersunik agguaaqqammerpoq. Ukioq manna kingumut "Meeqqat inuunerissut" qitiutinneqarput, taannaavorlu meeqqat inuusuttullu akornanni peqqissuulluni ataatsimoorlunilu inuulernissamut siuarsaaffiusoq.
Suliniutit arlallit aningaasaateqarfimmit tapiiffigineqartartut ataatsimoorluni peqqissuunissamik sammisaqartarnissamut aalanissamullu tunngassuteqarput.
2. maj 2023
Avannaata Kommunianit, Kommune Qeqertalimmit, Qeqqata Kommunianit Kommuneqarfik Sermersuumiillu katillugit 30-nik qinnuteqartoqarsimavoq, suliniutinullu 21-nut aningaasanik agguaasoqarsimalluni. Suliniutissanik peqqissuunissamik siuarsaaffiusunik aallartitsisoqarnissaa piumassuseqarfigilluarneqartoq qinnuteqaatini takuneqarsinnaavoq.

Suliniutigineqartut amerlanerpaat meeqqanik inuusuttunillu ukkatarinnipput, qinnuteqartullu arlallit allapput eqqarsartaatsikkut peqqissuunissamut aammalu ataatsimoorfinnik pitsaasunik peqataaffigineqarsinnaasunik saqquminerulersitsinissamut peqataarusullutik.

Ukioq manna suliniutigineqartussat ilaat timimik aalatitsinermut, soorlu ilaqutariinnut meeqqanullu arpatsitsinermut pisuttuartitsinermullu tunngassuteqarput. Suliniutit allat aallaarsimaarnernut assigiinngitsunik sammisassaqartitsiviusunut imaluunniit asimiinikkut imminut naleqartinnerulernissamut tatiginerulernissamullu tunngassuteqarput.

Pinngortitaq suliniutini arlalinni ilaatinneqarmat Paarisamit pitsaalluinnartutut isumaqarfigineqarpoq. Pinngortitap pisuussuteqarfitta annersaasa ilaat peqqissuunissaq anguniarlugu pinaveersaartitsiffiusumillu sulinermi atornissaa tulluartuuvoq. Pinngortitamiineq inuup tarnikkut timikkullu peqqissuunissaanut nukissaqalersitsisarpoq. Meeqqat inuusuttullu asimiittarnermi misilittakkatik siunissami inuunermi unammillernartunik aqqusaagaqarnerminni iluaqutigisinnaavaat.

Suliniutit aningaasaateqarfiup Inuunerittap 2023-mi tapiiffigisai imatut agguataarneqarput:

Avannaata Kommunia suliniutit tallimat aningaasaliiffigineqarput.
Kommune Qeqertalik suliniutit aqqaneq marluk aningaasaliiffigineqarput.
Qeqqata Kommunia suliniut ataaseq aningaasaliiffigineqarpoq.
Kommuneqarfik Sermersooq suliniutit pingasut aningaasaliiffigineqarput.
Kommune Kujallermiit qinnuteqartoqanngilaq.


Sukumiinerusumik paasissutissat Helena Lynge Møller-imut attaveqarluni pissarsiarineqarsinnaapput: Paarisa oqarasuaat +299 34 50 00 imaluunniit e-mail helm@nanoq.gl