Nalunaarut tassaavoq meeqqap inuusuttulluunniit atugarissaanik ineriartornermilu atugarisaanik isumakulunnerit pillugit saaffiginnissut. Meeqqap ilaqutariillu pisariaqartissinnaasaasa qulaajarneqarnissaat aammalu ikiorserneqarnissaannik pisariaqartitsinersut saaffiginnissuteqarnerup kingorna nalilersuiffigineqarnissaat qulakkeerneqassapput.
Naliginnaasumik nalunaaruteqartussaatitaaneq aamma sakkortusisamik nalunaaruteqartussaatitaaneq assigiinngisuttaat saamiatungaani iserfissaq iserfigalugu atuarsinnaavat.
Inatsit naapertorlugu meeraq immikkut tapersersorneqarnissamik pisariaqartitsisoq pillugu kommuni nalunaarummik tigusaqaruni iliuuseqarnissamut pisussaaffeqarpoq. Meeqqap kinguaassiuutitigut atornerlunneqarnera pillugu pasitsaassinissamut ernumanissamulluunniit tunngavissaqarpat, kommuni immikkut ittumik iliuuseqarnissaminut pisussaaffeqartarpoq.
Nalunaarutip tiguneranut uppernarsaat
Kommuni nalunaarummik tigusaqaruni nalunaarutip tiguneraniit kingusinnerpaamik sapaatip akunnerata ataatsip qaangiunnerani nalunaarutip tiguneranut uppernarsaammik nalunaarummik nassiussisumut nassiussinissamut pisussaaffeqarpoq.
Isumaginninnikkut misissuineq
Kommuni nalunaarummik tigusiguni isumaginninnikkut misissuinissaq pisariaqarnersoq aalajangissavaa. Isumaginninnikkut misissuinerup meeqqap pisariaqartitai takutissavaa, meeqqamullu eqqortumik tapersersuinissamik toqqaasoqarnissaanut peqataassalluni. Tamatuma kingorna kommuni iliuusissatut pilersaarusiaq meeqqap pissaa sulisissavaa.
Iliuusissatut pilersaarut meeqqap qanoq tapersersorneqarnissaanik ataatsimut isigilersitsissaaq qaqugulu tapersersuinerup naammassineqarnissaata naatsorsuutigineqassasoq tassani allassimassalluni. Meeqqap tapersersorneqarnerani kommuni malitseqartitsinissaminik pisussaaffeqarpoq. Kommunip isumaginninnikkut misissuinermi iliuusissatullu pilersaarummik suliaqarnermi meeraq ilaqutaalu peqataatissavai.