Ilaqutariit paarsisartut
Nunatsinni ilaqutariinnik paarsisartunik amingaateqarnerput annertuvoq, tassani angerlarsimaffiup avataanut meeqqamik inissiinerup ilusaa apeqqutaasinnaasarluni.
Nunatsinni ilaqutariit paarsisartut meeqqanik pisariaqartitsisunik paarsaqarsinnaasut siunissatsinnik annertuumik kivitseqataasuupput akisussaaffimmik annertuumik tigusinermikkut.
Meeqqat inatsisitigut illersugaanerat tunngavigalugu angerlarsimaffiup avataanut inissiinissaq aalajangiunneqartarpoq. Tamatuma siunnerfeqarlunilu anguniagaqarfiunissaa angajoqqaarsianut piumasaqaatitaqarpoq.
Meeqqat tamarmik timikkut tarnikkullu atugarissaarlutik peroriartortinneqarnissaat inersimasut akisussaaffigaat, angerlarsimaffiullu avataanut inissiisariaqarnermi angajoqqaarsiat tamanna akisussaaffigilertarpaat annerpaamilli qanimut suleqatigiinneq nukiusussaavoq. Meeqqap angerlarsimaffiup avataanut inissinneqarnerani suliuniutit piaartumik aallartinneqartarmata ilaqutariit paarsisartut, angajoqqaatut oqartussaaffilik kommunilu inissiisoq qanimut suleqatigiillutik meeqqap siunissaanik qulakkeerinnittussaapput.
Qinnuteqaat
Ilaqutariittut paarsisartutut qinnuteqaat kommunerisami aaneqarsinnaavoq tassanilu ilanngullugu aamma annerusumik nassuiaanneqarneq pisarluni.
Qinnuteqaat kommunimit tiguneqareeraangat qinnuteqarsimasunut akuersilluni atsiorneq atorlugu paasissutissat pisariaqartinneqartut aaneqassapput, aningaasanut tunngasut paasissutissat Akileraartarnermik Aqutsisoqarfimmut piniarneqassapput, Pinerlussimannginnermut uppernaat aaneqassaaq, Meeqqanut pinerliisimannginnermik uppernarsaat aaneqassaaq kiisalu Peqqinnissaqarfimmut misissorneqarnissamik piffissamik tunineqarluni misissortittoqassalluni. Peqqinnissaqarfimmi misissortinnerup siunertaraa tuniluunnartumik nappaateqannginneq qulakkeerneqarnissaa aammalu aanngajaarniutinik atuisuunnginnerup qulakkeerneqarnissaa.
Paasissutissat tamaasa tiguneqarnerani tullinnguukkajuttarpoq Kommune-mi susassaqartunit angerlarsimaffimmut qinnuteqarsimasunut ornigulluni ”pulaarneq” tassani angerlarsimaffimmi pissutsit takuniarneqartarput, angajoqqaarsiassatullu qinnuteqarsimasut aamma oqaloqatigineqartarlutik ilaqutariittut paarsisartunngorniarnerminni soqutiginninnerat aallaavigalugu.
Ilaqutariittut paarsisartutut atuuffeqartitsisarnermi nutaatut tunngaviusumik pikkorissarsimanissaq inatsisitigut aalajangersagaavoq. Tunngaviusumik ullunik tallimanik sivisussusilimmik pikkorissaasoqartarpoq. Pikkorissaaneq nammineq kommunerisamit imaluunniit Isumaginnernermut Aqutsisoqarfimmiit aaqqissuunneqartarpoq.
Ilaqutariinnik paarsisartunik tunngaviusumik pikkorissaanerni inatsisit meeqqanut perorsaanermullu tunngasut sammisaqartarput, ilaqutariittut paarsisartunngornermi sakkussaqarluarnissaq siunertaammat.
Paarsisartutut pisinnaatitaaffiit, angajoqqaatut oqartussaasoq, kommune suliffigisaq, kommunip periusissiai kommunimillu suleqatiginninneq pikkorissaanerni sammineqartarput.
Meeqqanik paarisartussanut
Meeqqanik angerlarsimaffimmi paarisaqarnissamut soqutiginnittunut, qinnuteqarsimasunut qinnuteqarusuttunullu neqeroorut:
Meeqqanik paarisarnissamut soqutiginnittut nittartakkakkut saqqummiinernut malinnaaqqullugit innersuuppagut, saqqummiineq Isumaginnernermut Aqutsisoqarfimmiit aaqqissuunneqarpoq.
Saqqummiinernut malinnaarusuttut Teams-ikkut iserfissaq (link) atorlugu peqataasinnaapput.
Saqqummiunneqartartut suuppat?
Qinnuteqaatip ingerlanneqartarnera, meeqqanik paarsisartut paarseriaasii assigiinngitsut, piumasaqaatit, meeraq qitiutillugu suleriusissat, meeqqanik paarsisartunut periusissiat pisinnaatitaaffiillu saqqummiunneqartarput. Tusarnaartullu apeqquteqarsinnaatitaapput.
Ataani ullut sorliussanersut takusinnaavasi iserfissarlu ilaavoq. Iserfissaq ima allaqqavoq: “Klik her for at deltage i mødet” taanna tuulerukku eqqaamallugu (ctrl) toorsimaatigalugu toorsissagavit.
