Tusaanngami kinaassutsimik isertuussineq

Tusaannga tassaavoq kinaassutsumik isertuussilluni siunnersuisarfik, kinaassusernik isertuussillutit illit, tarnikkut atugarliornerit, annerisatit imaluunniit inittortoorititit, assersuutigalugu kiserliornerit, imminut toqunissamik eqqarsaatitit annilaanganerit, nikallunganerit, aliasunnerit, atornerlutsissimanerit, qinngassaartittarnerit, ilaqutariinni ajornartorsiuteqarnerit imaluunniit aappariinnermi ajornartorsiuteqarnerit il.il., pillugit ammasumik toqqissisimasumillu oqaloqateqarnissannik pisariaqartitsisumut, allanut oqaatigeqqunngisarnik inissaqartitsinissamik neqeroortoq.

Kinaassutsimik isertuussineq ima paasineqassaaq; siunnersuisup kinaanersutit imaluunniit suminngaanniit sianernersutit imaluunniit allannersutit takusinnaanngilaa aamma illit oqaluttuarisatit inunnut allanut oqaluttuarissanngilai.

Taamaattorli ilaatigut tamanna atuutsinneqarneq ajorpoq. Illit navianartorsiorlutit oqaluttuaruit, assersuutigalugu imminut toqukkusullutit imaluunniit angerlarsimaffimmi unatartillutit imaluunniit unioqqutaasunik oqaluttuaruit, assersuutigalugu inuit allat ajoquserusullugit imaluunniit atornerlunneqarsimallutit il.il., uagut pisussaatitaavugut ilinnik sapinngisarput naapertorlugu ikiuinissatsinnut - uagummi Kalaallit Nunaanni tamarmi inersimasut allat tamaasa assigalugit – nalunaaruteqartussaatitaavugut aamma ajortunik pitsaaliuisussaatitaavugut.

Kommuni imaluunniit politiit ilinnit ikiuisussat attaveqarfigineqarnissaat pisariaqartoq siunnersorti naliliiguni, tamanna ilinnik oqaloqateqarnermi ingerlanerani oqaluttuarissavaa, illillu pillutit paasissutissanik amerlanerusunik pissarsiumalluni apersussallutit. Suut oqaluttuarusunnerlugit soorunami nammineerlutit toqqartorsinnaavatit.

Illit kinaassutsinnik isertuussiunnaarumanerlutit, illit nammineerlutit aamma maluginiassavat. Illit kinaanersutit uagut aatsaat paasisinnaavarput, paasissutissat qanoq amerlatigisut pissarsiareqqaarlugit, tamannali inummiit inummut assigiinngiiaartorujussuusarpoq. Assersuutigalugu illit immikkuullarissumik ateqaruit aamma illoqarfimmi imaluunniiit nunaqarfimmi mikisumi najugaqaruit ilisarinissat ajornannginnerussaaq, nalinginnaasuusumik ateqarnernut illoqarfimmilu angisuumi najugaqarnernut sanilliullugu. Taamaattumik illit pillutit paasissutissat qanoq amerlatigisut tunniussuutissanerlugit illit nammineq eqqarsaatigisariaqarpat.