airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Kinguaassiutitigut atornerlunneqareernerup kingorna inuunerup ingerlaqqittarnera pillugu isiginnaagassiaq

Killiliisa-mi maligassiuisut nammineq oqaluttuartik pillugu kinguaassiutitigut atornerlunneqareernerup kingorna inuunerup ingerlaqqittarnera pillugu isiginnaagassiami ”Tarnima Nammatai”-ni takuneqarsinnaavoq.
27. april 2021

Kinguaassiutitigut atornerlunneqareernerup kingorna inuunerup ingerlaqqittarnera pillugu isiginnaagassiaq 

Isumaginninnermi Aqutsisoqarfik 2018-imiilli Naalakkersuisut kinguaassiutitigut atornerlunneqarsimaneq pillugu periusissiaanik, Killiliisa-mik taaguutilik, atuutsitsilernissaq sulissutigisimavaa. Periusissiami ilaatigut maligassiuisunik innuttaasunut sulisunullu oqalugiartartussatut pilersinneqarnerat sulissutigineqarsimavoq.
 
Periusissiaq Killiliisa saqqummiunneqarmallli Isumaginninnermut Aqutsisoqarfiup peqatigiiffinniit, nammineq kajumissutsiminnik suliaqartuniit aamma namminersortuniit kinguaassiutitigut atornerluisarnermik oqaasinngueqataarusuttunik soqutiginninneq annertooq misigisimavaat. Tamanna pissutigalugu Isumaginninnermik Aqutsiqarfiup isiginnaagassianik pilersitsisartoq FreezeProduction isiginnaagassiaq”Tarnima Nammatai” pillugu suleqatiserisimavaa.
 
Isiginnaagassiami Killiliisami maligassiuisut allallu nammineq oqaluttuatik aallaavigalugit pilersitaavoq.
 
Isumaginninnermi Aqutsisoqarfiup neriuutigaa isiginnaagassiaq ilisimasaqartitsilissasoq kiisalu neriummik aamma pilersitsissasoq. Inunnut amerlasuunut sammisaq eqqartussallugu ajornarsinnaammat isiginnaagassiorneq aqqutigalugu neriutigineqarpoq sammisaq inunnut amerlanerusunut anngussinnaassallugu.
 
Isiginnaagassiaq Nuummi ulluni ukunani 29. april – 1. maj tungaanut takutinneqassaaq, taassumap kingorna Kujataanut ingerlasussanngorluni. Ukiamut isiginnaagassiaq avannaani takutinneqartussaavoq.
 
Isiginnaagassiap saniatigut Katuami ulluni ukunani 22. april-imiit 30. maj ilanngullugu saqqummersitsisoqarpoq. Saqqummersitsineq isiginnaagassiap ilagaa, taaguuteqarlunilu ”Tarnima Nammatai”.
 
Isiginnaagassiaq saqqummersitarlu eqqarsaaterpassuarnik misigissutsitsinillu qaffakaatitsilersinnaavoq. Eqqaamallugu qaqugukkulluunniit oqaloqateqarnissannik pisariaqartitsiguit Tusaannga-mut sianersinnaagavit nr. 801180 imaluunnit sms-ersinnaagavit uunga 1899.
 
Annertunerusumik paasisaqarusukkuit Paarisa-mi Suliamut tunngasunik pisortaq, Karo Thomsen Fleischer e-mail katf@nanoq.gl imaluunniit oqarasuaat. 346613 atorlugu attaveqarfigineqarsinnaavoq.