Qitornavit inuit attaveqaataannik atuinera pillugu oqaloqatigiuk

Maannakkorpiaq inuit attaveqaataanni Tik Tokimi nakuuserneq pillugu immiussaq siammarterneqarpoq. Taamaattumik angajoqqaat qitornamik taama piniarnatik videomik immiussanik nuanniitsunik takusaqarsinnaanerat eqqumaffigissavaat. Taamaattumik meeqqat videomik immiussaq takusimappassuk nalinginnaasumillu inuit attaveqaataannik atuinerit pillugit angajoqqaat Paarisamit, Kalaallit Nunaanni Politiinit aamma PiSiumit qitornaminnik oqaloqateqaqqullugit kaammattorneqarput.

Angajoqqaat inersimasullu allat meeqqanut akisussaasut qitornamik inunnik attaveqartarnerannik malinnaaqqullugit kaammattorneqarput.

”Inuit attaveqaataat meeqqat inuusuttuaqqallu imminnut ajoqutaasumik unammillerlutik pissusilersornerulernerannut atorneqarnerat ernumanartutut isigaarput. Unammillinngikkaanni ataatsimoorfimmit peersitaanermik kinguneqarsinnaavoq. Taamatut ataatsimoortut tatisinerat angajoqqaat immikkut eqqumaffigissavaat aammalu qitornatik tamakku pillugit oqaloqatigalugit", Paarisami immikkoortortaqarfimmi pisortaagallartoq, Tina Evaldsen oqarpoq imatullu nangilluni:

”Nammineq iluarsisinnaanngisanik artornartunik eqqarsaatersoraanni ajornartorsiuteqaraanniluunniit ikiortissarsiornissaq pingaarutilerujussuuvoq. Tusaanngamut sianertoqarsinnaavoq allattoqarsinnaalluniluunniit, tassani siunnersorteqarpoq ikiuinissaminnut piareersimasunik.”

TUSAANNGA
Ikiorneqartariaqaruit oqaloqateqarnissamilluunniit pisariaqartitsiguit taava Tusaannga oqarasuaatikkut ugguuna attaveqarfigiuk: 801180 imaluunniit SMS-ikkut 1899

Tusaanngap ammasarfii:

Ataasinngorneq-Sisamanngorneq nal. 09:00 – 22:00
Tallimanngorneq nal. 09:00 – 04:00
Arfininngorneq nal. 16:00 – 04:00
Sapaat nal. 16:00 – 22:00

Angajoqqaat qitornamik killiliinissaannut ikiuunnissamut aamma pingaaruteqarput - aamma internetikkut. Qitornavit inuunermut digitalileriffiusumut apersuillutit internetikkullu ataatsimoorfimmut soqutiginninninnik takutitsillutit qitornat tapersersorsinnaavat. Inuit attaveqaataanni qanoq pissusilersortoqartarnerannik sunillu siammarterisoqartarneranik qitornavit killiliinissaanik ikioruk.

Angajoqqaammi qitornamik inuit attaveqaataanni pissusilersornissamut killiliinissamut pingaarutilimmik inissisimasut PiSiumi aamma maluginiarneqarpoq.

”Meeqqat internetikkut ajoriataarsinnaasunik pissusilersornissaannik pitsaaliuinerit pineqartillugit angajoqqaat pingaarutilimmik inissisimapput. Meeqqat inuusuttuaqqallu internetertarlutik inuunerat inunnik ataatsimoorfeqarnerannut pingaarutillit ilagaat. Soqutiginninnerit takutissavat aamma assersuutigalugu Tik Tokimi, Snapchatimi internetikkulluunniit pinnguaatini aallani sulerisarnersut kikkullu allaffeqatigisarneraat aperalutit, soorluttaaq inuunerat pillugu allanik aperisartutit. Meeqqat oqarasuaat angallattagaq tigugaangagu angajoqqaanit unitsinneqarneq ajorpoq. Qitornavit internetikkut pissusilersornerani ersarissunik killiliinissaq angajoqqaanut pingaaruteqarpoq", PiSiumi siulittaasunngoqqammersoq, Julie Lynge, oqarpoq.

Tamatuma saniatigut meeqqat inuit attaveqataanni ajutooriataarsinnaallutik pissusilersuleriartornerat pinerlunniakujuttarnermut aqqutaasinnaasutut Kalaallit Nunaanni Politiit isigaat.

”Inuit attaveqaataanni pimmatiginninnertut aallartittartoq sukkasuumillu videokkut immiussanik siammarterininngorlunilu allatut kanngutsattuliorluni pissusilersunnguuttartoq takusarparput. Inuit attaveqaataanni sakkortusaarneq interneternerup avataani pinerlunniarnermut allatulluunniit akornutaasumik pissusilersornermut aqqutaasinnaasarpoq, assersuutigalugu nakuusernerit imminullu toqunnerit inuit attaveqaataanni aallartittumik pissusilersornermit pissuteqarsinnaasarput. Taamaattumik meeqqat inuit attaveqaataanni ajutooriataarnissamut piartuaarnerat ilungersunartorujussuartut isigaarput,” Kalaallit Nunaanni Politiini Pitsaaliuinermut Misissueqqissaarinermullu immikkoortortami pisortaq, Mikkel Høj Svendsen, oqarpoq.

Tamatuma saniatigut videokkut immiussanik assersuutigalugu nakuusernernik kinguaassiutitigulluunniit kanngutsattuliornernik imalinnik siammarterinerit inerteqqutaapput. 15-it sinnerlugit ukioqaraanni taamatut ittunik immiussanik siammarterinikkut pineqaatissinneqarsimannginnermut uppernarsaammi ajoqutaasinnaavoq.

SIUNNERSUUTIT PITSAASUT
Qitornavit internetertarneranut qanoq pitsaanerpaamik akuliussinnaanerit pillugu PiSiumi siunnersuutit pitsaasut ineriartortinneqarsimapput:

Soqutiginninnerit takutiguk – aamma qitornat inuusuttuaranngoraangat
Killiliigit malittarisassiorlutillu– sunalu pissutaanersoq nassuiarlugu
Qitornavit interneternissamut malitarisassat unioqqutippagit sakkortuallaamik qisuariarnak
Inatsisinik internetikkullu pitsaasumik pissusilersornernik meeraq ilinniartiguk

Attaveqarfissaq
Paasissutissanik amerlanerusunik pissarsiniaraanni Paarisami immikkoortortaqarfimmi pisortaq, Tina Evaldsen, oqarasuaatikkut ugguuna +299 34 23 94 imaluunniit e-mailikkut ugguuna tiev@nanoq.gl, aamma Kalaallit Nunaanni Politiini Pitsaaliuinermut Misissueqqissaarinermullu immikkoortortami aqutsisoq, Mikkel Høj Svendsen, oqarasuaatikkut ugguuna +299 567174 imaluunniit emailikkut ugguuna msv006@politi.dk imaluunniit PiSiumi siulilttaasoq, Julie Lynge, oqarasuaatikkut ugguuna +299 220598 imaluunniit emailikkut ugguuna jl@fgb.dk attaveqarfigineqarsinnaapput.