Ukiut siulii assigalugit ilaqutariinnut innuttaasunullu atugarliortunut juullilernerani sammisassaqartitsinissanut Isumaginninnermut Aqutsisoqarfiup tapiissutinik agguaaneq isumagaa. Tapiissutit sumiiffinni isorartuuni agguaanneqarput, qinnuteqartullu nuna tamakkerlugu illoqarfinnut 11-inut aammalu nunaqarfinnut 9-inut agguataarneqarnikuupput. Illoqarfiit nunaqarfiillu arlalissuit juullilernerani aningaasanik tapiissuteqarfigineqarsimapput, Kalaallit Nunaata Kangianiit, Upernavimmiit Nanortalimmut aamma nuna tamakkerlugu nunaqarfinnut.
Tamanna isumaqarpoq aaqqissuussinerit 41-t tapiissutinik tunineqarsimasut tapiissutillu agguaanneqartut katillugit 430.308,42 kr.-iusut.
Aningaasaliissutit juullilernerani sammisassaqartitsinernut amerlasuunut atorneqartarput. Assersuutigalugu juullernissaanut qiortaasoqartarpoq, juullimi nerisassanik agguaasoqartarpoq imaluunniit aaqqissuussinerni ilaqutariinnut meeqqanullu juullissamut mamartuliortoqartarpoq. Juullimi sammisassaqartitsinerit assigiissutaat tassaavoq taakkua ilaqutariinnut innuttaasunullu atugarliortunut sammititaammata.
”Innuttaasunut ilaqutariinnullu atugarliortunut aaqqissuussinernut amerlasuunut ingerlatsinissamut tapersiinissamik periarfissaqarsimammat iluaqaaq. Piffissamimi tassani inuit tamarmik ataatsimut nuannersumik misigisaqarnissartik pisariaqartippaat” Meeqqanut, Inuusuttunut Ilaqutariinnullu Naalakkersuisoq, Paneeraq Olsen, taama oqarpoq.
Assiliaq Narsap 2020-mi Juullimi aaqqissuussineraneerpoq, ilaqutariit meerartallit 40-t missaaniittut katersortarfimmut isaanngilaattaanni.Tassani Juulimaaqarpoq meeqqanullu oqaluttuanik juullerpaluttunik atuaasoqarluni.
Angajoqqaanut kaffeqarlunilu teeqarpoq meeqqanullu juullerpalaartunik mamakujoqarluni.
Attavissaq
Sukumiinerusumik paasissutissat pillugit attavissat:
Naalakkersuisup allattaa Inûna Davidsen: inda@nanoq.gl imaluunniit oqarasuaat +299 25 78 54
Isumaginninnermut Aqutsisoqarfimmi Immikkoortortaqarfimmi pisortaagallartoq Tina Evaldsen: tiev@nanoq.gl imaluunniit oqarasuaat +299 56 55 09
Ilaqutariinnut innuttaasunullu atugarliortunut juullilernerani sammisassaqartitsinissanut tapiissutit
Ilaqutariinnut innuttaasunullu aningaasaqarnermikkut ulluinnarminnilu allatigut ajornartorsiutilinnut tapersersuinissaq siunertarineqarpoq. Juullilernerani sammisassaqartitsineq neqeroorutaavoq ulluinnarniit ilungersunartunit allanut saasaataalaarsinnaasoq Juullillu nalaani ilaqutariinnut innuttaasunullu nuannersumik misigisaqartitsisumik tuniseqataasinnaasoq.
27. december 2021
