airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Sapaatip akunnera SEX

Ukiup sapaatip akunnerata arfinilissaanni sapaatip akunnera SEX, atoqateqartarnikkut peqqissuuneq ukkatarineqarluni pisarpoq. Angajoqqaat inuiaqatigiillu ataatsimut isigalugit meeqqanut inuusuttunullu akisussaaffeqassasut taakkulu toqqissisimasumi peroriartorsinnaassasut uani Naalakkersuisunit anguniagaavoq. Aammattaaq atoqateqartarnikkut peqqinnartumik inuuneqarnissaq qanorlu atoqateqartarnikkut peqqinnartumik inuuneqalersinnaanermik ilisimasaqarnissaq pineqarluni.
11. februar 2022

Atoqateqartarnikkut peqqissuuneq pillugu kikkut tamarmik ukkatarinnissasut Paarisap kaammattuutigaa.
Sapaatip akunneranut SEX-imut atatillugu Paarisa pingasunik filmiliortitsisimavoq, taakku sapaatip akunnerup 6-ip aallartinnerani Paarisa.gl-imi saqqummiunneqassapput. Filmini pineqartut tassaapput killissat, aaqartarneq, naartunaveersaatit aamma atoqatigiinneq, taakkunanilu qanoq imminut paarisinnaanermut allallu paarisinnaanerannut ilaatigullu naartunaveersaatit atorneqartarnerannut tunngatillugu inuusuttut ilisimasanik tuninissaat siunertarineqarpoq. Videot Paarisap nittartagaani kikkunnit tamanit pissarsiarineqarsinnaassapput.

Taamatuttaaq meeqqat 1.-3. klassini aamma 4.-6. klassini atuartut angajoqqaavinut sammititanik quppersagaaqqat marluk saqqummiunneqassapput. Timi, misigissutsit, killissat allallu kinguaassiuutitigut tunngassuteqartut pillugit angajoqqaat meerartik oqaloqatigisinnaanissaanut quppersagaaqqat taakkua sakkussaannik tunisissapput.
Quppersagaaqqat taakku atorlugit angajoqqaat peqataalernissaat sammisanullu oqaluuserissallugit ajornakusoorsinnaasunut tunngatillugu ammanerulersitsissasut Paarisap kissaatigaa.

Aammattaaq Paarisap pitsaaliuinermik siunnersortit arlallit attavigisimavai, taakkuttaaq nunami sumiiffinni arlalinni pissanganartunik sammisassaqartitsiniarput. Sammisassanut taakkununnga pissanganartunut atortussanik inniminniisoqarnikuuvoq, taakku nunap kommuniinut tamanut nassiunneqassapput.

Suliniutit taakku atorlugit innuttaasut siammasissumik anguneqassasut Paarisap neriuutigaa. Sammisassaqartitsinerillu taakku aqqutigalugit peqqinnartumik atoqateqartarneq pillugu oqallinnernik eqqarsaatersuutiginninnernillu aallartitsisoqassasoq aamma sammisap iluani ilisimasanik annertunerusumik ujartuisoqarnissaanut pissutissaqartitsilersinnaasoq neriuutigaarput.
Paarisap Inuuneritta III aallaavigivaa, tassani meeqqat inuusuttullu tamarmik pitsaasumik inuuneqarnissaat anguniarneqarpoq. Inuunermi pitsaasumik atugaqarnitsinnut atugarissaarnitsinnullu peqqinnartumik atoqateqartarneq pingaarutilittut inissisimavoq.Taamaattumik pitsaasumik pitsaaliuilluni peqqissutsimullu siuarsaataasumik sulineq pingaaruteqarpoq.

Attavissaq
Naalakkersuisup allattaa Inûna Davidsen, uunga mailimut: inda@nanoq.gl imaluunniit oqarasuaat + 299 25 78 54 imaluunniit Paarisami immikkoortortami pisortaq Tina Evaldsen, uunga mailimut: tiev@nanoq.gl imaluunniit oqarasuaat +299 34 23 94.