Suunuku sammisassaqartitsinermut ullorsiutit?
Sammisassaqartitsinermut ullorsiutit tassaapput Isumaginninnermut Aqutsisoqarfiup pikkorissarnissamik, oqaloqatigiittarluni isumasioqatigiisitsinissamik aamma isumasoqatigiinnernik neqeroorutaasa tamarmiusut allattorsimaffii. Pikkorissartitsinerit tassaapput ulloq unnuarlu paaqqinnittarfinni, Ilaqutariit illuini isumaginnittoqarfinnilu sulisunut pisortanullu pikkorissartitsinerit.
Tassani pineqarput kommunini ataasiakkaani sammisassat aamma kommunit killeqarfii apeqqutaatinnagit sammisassat, soorlu assersuutigalugu ulloq unnuarlu paaqqinnittarfinni forstanderit isumasioqatigiisinneqarneri. Sammisassaqartitsinermut ullorsiutit aamma Isumaginninnermut Aqutsisoqarfiup iluani pilersaarusiortarnermut sakkussatut atorneqarpoq. Sammisassaqartitsinermut ullorsiutit ukiup ingerlanerani sammisassat assigiinnik agguataarneqarnissaat, taamaalillunilu paaqqinnittarfinni aamma kommunini ingerlatsiviini pisariaqanngitsumik tatisimaneqarnissaq pinngitsoorniarlugu qulakkeerinneqataasassalluni.
Erseqqissumik oqaatigalugu sammisassaqartitsinermi ullorsiutini makkua takuneqarsinnaapput:
- Isumaginninnermut Aqutsisoqarfik makkunannga pikkorissaasarpoq, (soorlu assersuutigalugu ESDH-mik sanileralugu ilitsersuussineq, meeqqanik katsorsaajartorlutik angalasartut tikeraarneri, modulikkaartumik pikkorissaanerit il.il.)
- Pikkorissarnerit kikkunnut attuumassuteqarpat (soorlu assersuutigalugu sulisut ilinniarsimanngitsut, sulianik suliaqartartut, fortanderit il.il.)
- Sumi qaqugulu sammisaqartitsisoqassaava (ullut, illoqarfiit aqqi, - imaluunniit Teams atorlugu ingerlanneqartussat)
- Sammisassani ataasiakkaani inuit attavigineqartussat.
Sooruna sammisassaqartitsinermut ullorsiusiorsimasugut?
Kalaallit danskillu suleqatigiinneranni suliniut 7-mut atatillugu sammisassaqartitsinermut ullorsiutit suliarineqarput. Suliniut 7-mi pingaarnertut anguniagaavoq kommunini meeqqat inuusuttullu sullinneqarnerani piginnaasanik aamma ilinniarsimasanik qaffassaanermi ineriartortitsinissat. Taamatuttaarlu Isumaginninnermut Aqutsisoqarfimmit pikkorissarnernik neqeroortarnermi kommunini pisiaraqartitat pingaartinnerunissaat sulissutigineqarpoq.
Sammisassaqartitsinermi ullorsiutini aamma pikkorissarnerit, oqaloqatigiittarluni isumasioqatigiinnerit, isumasioqatigiinnerillu Isumaginninnermut Aqutsisoqarfimmit neqeroorutigineqartartut pillugit kommunit aalajangersimasunik apeqquteqartarnerat pingaartinneqarpoq. Taamaattumik kommunit tamarmik immikkut sammisassaqartitsinermut ullorsiutaannik aamma taakkua ataatsimoortillugit ullorsiutaannik Isumaginninnermut Aqutsisoqarfimmi ataqatigiissaarinninnermi atugassanik suliaqartoqarpoq. Kommunit tallimaasut tamarmik sammisassaqartitsinermut ullorsiutit siullertut suliarineqarsimasunik nassiussiffigineqarput, tamannalu tigusisunilu siulliullutik nalunaartut ullorsiutit nuannaarutigaalugu nalunaarput.
Sammisassaqartitsinermut ullorsiutit siunissami qanoq atorneqassappat?
Ullorsiutit sakkussaapput allanngorarsinnaasut ataavartumillu nutarterneqartartussat. Suut pilersaarutaanersut aamma pikkorissarnerit suut allanngortinneqarnersut Isumaginninnermut Aqutsisoqarfiup qaammatit pingasukkaarlugit misissortassavai. Tamatuma kingorna ullorsiutit nutarterneqarsimasut kommuninit tiguneqartassapput taamaalillutik ukiup tullianut pilersaarusiorsinnaalersinneqartassapput. Piffissami ungasinnerusumi sammisassaqartitsinermut ullorsiutit Isumaginninnermut Aqutsisoqarfiup nittartagaani takuneqarsinnaalissapput.
Assimi ataaniittumi takuneqarsinnaavoq Isumaginninnermut Aqutsisoqarfiup Kommune Kujallermi aprilip qaammataani sammisassaqartitsissutissai.
Ullormut sammisassat suuneri tamarmik nalunaarsorneqarput, eqimattat sorliit sullinneqarnersut aamma illoqarfimmi sorlermi sammisassaqartitsisoqassanersoq.
Assimi ataaniittumi takuneqarsinnaavoq Isumaginninnermut Aqutsisoqarfiup iluani ullorsiutit, taakkunani aprilimi suut suliarineqassanersut takuneqarsinnaapput.
