airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Malmømi forstanderit iluatsilluartumik isumasioqatigiipput

Attaveqaatit, ilisimasat nutaat, inunnik perorsaariaatsit najugaqartut ilorrisimaarlutik inuunissaannut ineriartortinneqarnissaannullu nukittorsaataasinnaasut ulloq unnuarlu paaqqinnittarfeqarfinni sulisut qaniannit oqaasiupput aniasut. Taamaattumik Isumaginninnermut Aqutsisoqarfiup qulequttat soorlu makkua suliallit ataatsimoorfii, kingunerluutillit eqqarsaasersuutigisartagaat aamma massakkoqqissaamiinneq forstanderit Malmømi ukiumoortumik ulluni 2.-7.april isumasioqatigiinneranni qulequtsiuppai.
24. maj 2022

 

Namminersorlutik Oqartussat ulloq unnuarlu paaqqinnittarfiutaanni forstanderinut ullut siullit marluk immikkoortinneqarsimapput aamma ullup unnuallu paaqqinnittarfiit ingerlanneqarnerinut aningaasaqarnerinullu tunngasut pineqarlutik. Kommunit ulloq unnuarlu paaqqinnittarfiutaasa forstanderii aamma ulloq unnuarlu paaqqinnittarfiit imminnut pigisut forstanderiisa ulloq 5. aprilimiit isuamsioqatigiinneq peqataaffigilerpaat.

Aqutsisoqarfimmi pisortap Helene Broberg Berthelsenip forstanderit tikilluaqquai, tamatuma kingorna Isumaginninnermut Aqutsisoqarfimmiup pikkorissarnermut neqeroorutaata anguniagaa saqqummiunneqarpoq. Ullup siulliup sinnerani Center for Mentalisering-imit Janne Østergaard Hagelquist kingunerluutit tarnikkut qanoq sunniuteqartarneri aamma inunnik perorsaanermi massakkorpiamiinnissaq pillugu misilittakkanik saqqummiivoq.

Ullup aappaani qulequtaq tassaavoq Isumaginninnermut Aqutsisoqarfiup aamma ulloq unnuarlu paaqqinnittarfiit akornanni suleqatigiinneq. Iluatitsiviusut pillugit eqqartueriaaseq atorlugu eqimattat suleqatigiinnerinik ulloq eqqartuiffiusoq tunngaveqarpoq. Ulloq uummaarissumik oqalliffiuvoq aamma siunissami suleqatigiinnissaq pillugu suliat aallaavigalugit isumassarsianik ulikkaarpoq.

Isumasioqatigiinnerup ulluani kingullermi tarnip pissusaanik immikkut ilisimasalik Inger Thormann inuup alliartornermini sakkortumik misigisaqartartup oqaluttuassartaanik sammisaqarluni katsorsaariaatsinik saqqummiivoq. Kiisalu Isumaginninnermut Aqutsisoqarfik meeqqat inuusuttuaqqallu ulloq unnuarlu paaqqinnittarfinnut "pitsaasumik inissititerneqartarneri" pillugu saqqummiivoq, ilutigalugu innarluutilinnut ulloq unnuarlu neqeroorutit Kofoedsmindemit ineriartornermikkut piginnaasakitsut pillaatisinikut ulloq unnuarlu isumannaatsumiisinneqarnerinik suliat aamma suleriuseq pillugit saqqumiipput.

Isumasioqatigiinneq naggaserlugu peqataasut isumaqatigiipput imminnut qaninnerulersimallutik aamma isumasioqatigiinnerup nalaani persuarsiortuunngitsumik peqatigiittarneq ataatsimoorussunik unammillernartunik suleqatigiinnermilu attaveqaatinik naleqarluartumik oqallinnermik pilersitsisimasut. Isumasioqatigiinnerup nalilersorneqarnerata aamma takutippaa sinaakkutit imarisallu pillugit assut iluarisimaartoqartoq.