airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Suliniutit 3 – tapiissutit ima atorpaat

Pinngortitaq meeqqanut inuusuttuaqqanullu immikkut pisariaqartitsisunut katsorsaavittut atorneqartartoq, atuartitsineq aamma paasissutissiinerit, persuttaanermut akiuiniarluni suliniuteqarnerit aamma suliniutit arlallit TAPI-nik agguaassivigineqarput. Nuna tamakkerlugu anguniagaqarusuttartut tapiissutit iluaqutigissavaat. Aningaasat ilaatigut siunertanut sorlernut atorneqareernikuuneri uani atuarsinnaavat.
20. juni 2022
Pinngortitaq meeqqanut inuusuttuaqqanullu immikkut pisariaqartitsisunut katsorsaavittut atorneqartartoq, atuartitsineq aamma paasissutissiinerit, persuttaanermut akiuiniarluni suliniuteqarnerit aamma suliniutit arlallit TAPI-nik agguaassivigineqarput.   Nuna tamakkerlugu anguniagaqarusuttartut tapiissutit iluaqutigissavaat.

Tassa! – meeqqanut aamma inuusuttuaqqanut persuttaanaveersaartitsiniarluni immikkut suliniutit


Kalaallit Meerartaat Kalaallit Nunaanni meeqqanut inuusuttuaqqanullu persuttaanaveersaartitsiniarluni immikkut suliniummik aallartisarnermut atugassaminnut tapiissutinik tigusaqarnikuupput. Misiliutitut suliniummi siunertaasoq tassaavoq, persuttaasarnernik pinaveersaartitsiniarluni aammalu peqqinnartumik persuttaaffiunngitsunillu attaveqaqatigiittarnernik qitiutitsilluni qarasaasiaq atorlugu atuartitsissutigineqartartut inerisarneqarnissaat. Siammasissumik suleqatigiilluni ilaatigut tamanna pissaaq, soorlu assersuutigalugu PiSiu, meeqqat atuarfiani ilinniartitsisut, Isumaginninnermut Aqutsisoqarfik aamma Qeqqata Kommuniani atuarfeqarnermut siunnersortit peqataatinneqassapput.

- Tassa!-mut tapiissutit Suliniutimmi meeqqat inuusuttuaqqallu iliuuseqarsinnaassusianik sammineqassaaq. Tassa!-p inuusuttuaqqat isumaqatigiinngiffiusuni periutsinik sakkunillu nutaanik tunissavai aamma persuttaasarneq taakkualu kingunerisartagai pillugit ilisimasaqarnerulersissalluni, Kalaallit Meerartaanni allattoqarfimmi pisortaq, Julie Lynge, taama oqarpoq.



Meeqqat inuusuttullu innarluutillit


Qaqortumi pinngortitaq atorlugu katsorsaaneq aamma perorsaaneq aqqutigalugit katsorsaatitut sunniuteqartitsisoqartarpoq – taamaattumik meeqqat inuusuttuaqqallu immikkut pisariaqartitsisut, ulluinnarni inuunermut taarsiullugu, Kalaallit Nunaata kujataani pinngortitamut angallanneqarnissaminnut periarfissinneqartarput.

Meeqqat innarluutillit immikkut ittumik aamma inissaqartinneqartarput, soorlu assersuutigalugu Qeqertalimmi ilaqutariit arfineq- pingasunik innarluutilinnik meerartallit ikiortitik peqatigalugit ulluinnarni inuunermi pisartunit atuinngikkallalaarput, Kalaallit Nunaanni immikkut ittumik pinngortitamukarnissaminnut aamma tassani nuannisarnissaminnut periarfissinneqarlutik.

Suliniutit ilinniarsimasumit isiginnittariaaseqarluni suliarineqartussat aamma pingaartinneqarput: kommunip tarnimikkut napparsimasut Upernavimmi paasineqarnerunissaat kissaatigaa; sulisutut aamma qanigisanit innuttaasunillu, taamaattumik innuttaasut ataatsimiisinneqassapput kiisalu sulisut ilinniartinneqassapput inuit ajornartorsiortut, maqaasisut imaluunniit arlaatigulluunniit tarnimikkut innarluuteqarlutik sunnerteqqasut nukittorsarsinnaajumallugit, inissaqartikkumallugit aamma sullissinnaajumallugit.



Ilaqutariinnut højskolit

Ilaqutariinnut højskolit tassaapput siammasissumik pinaveersaartitsiniarluni suliniarnerit ilaqutariit meerartalinni angajoqqaat piginnaasaanik pitsanngorsaaffiusartut. Sulinutit ilaqutariinnik tamanik ikiuinissamik samminnittarput, soorlu assersuutigalugu angajoqqaanut pikkorissarnerit, nutaaliaasumik perorsariaatsit aamma ilaqutariittut ataatsimoortarnerit sammineqartarput. Sulinutit arlallit ilaqutariit illuisa sullissinerannut ilaapput aamma sinerissami inuiaqatigiinni amerlanngitsunik inuttalinni suliniutaasut siammarterneqartarlutik. Isumaginninnermut Aqutsisoqarfiup taakkua najoqqutassaannik suliaqarluni aallartippoq. Taamaattumik ilaqutariinnik ilinniartitsineq sulinutinik tapersersuinertalik ukioq manna immikkut sammineqarpoq. Komminit sisamat suliniutinik tallimanik piareersimasuuteqarput, aqutsisoqarfiup taakkuninnga tapersersuineratigut kommunit aqutsisoqarfillu ilaqutariinnut højskolinik suliaqarnerminni assigiinngitsutigut pingaarutilinnik misilittagaqalerput.