airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Tapiissutinik qinnuteqarnissamut pikkorinnerulerit

Qinnuteqartut 88-it Naalakkersuisut tapiissutaannik qinnuteqarput. Taakkua ukioq kingullermit 40-nik ikinnerupput. Taassuma takutippaa kommunit paaqqinnittarfiillu qanoq qinnuteqartoqarsinnaaneranik pitsaanerusumik aqqutissiuunneqartalersimasut.
18. juli 2022

- Taanna (qinnuteqartariaaseq) assut isikkuminarpoq aamma ajornanngitsuararsuuvoq. Ajornannginnerusumik pissarsiarineqarsinnaanngornikuuvoq, taama oqarpoq ilaqutariinnut paarsisartunut siunnersorti Gerda Fleischer.

Taamaattorli qinnuteqartut ataasiakkaat tapissutit siunertaata suli avataaniittarput. Tapiissutit meeqqanut, inuusuttuaqqanut ilaqutariinnullu attuumassuteqartut Isumaginninnermut Aqutsisoqarfimmit 2022-mi suliarineqartartut - Meeqqanut, Inuusuttunut, Ilaqutariinnut aamma Peqqissutsimut Naalakkersuisoqarfiup suliassaqarfiinut massakkut nuunneqarsimanerannut tamanna peqquteqarpoq. Inersimasunut suliassaqarfik maanna Isumaginninnermut, Suliffeqarnermut Nunamullu Namminermut Naalakkersuisoqarfiup ataani inissisimavoq.

Ukioq manna nutaatut qinnuteqartut tamarmik immikkut ataasiakkaarlutik siunissami tapiissutinut eqqortunut qinnuteqarsinnaaneri anguniarlugit, qinnuteqaamminnut itigartinneqarsimagunik imaluunniit ilaannakortumik aningaasaliffigitittussanngorsimagunik, tunngavilersorneqartassapput. Tamanna ima paasineqassaaq; qinnuteqartut inersimasunik sullissiniarlutik anguniagallit tapiissutinut allanut, aningaasanut inatsimmi matussuserneqarnikuunngitsunut, siunertaannut tulluuttunut innersuunneqartassapput. Tapiissutit Isumaginninnermut Aqutsisoqarfiup suliarisartagaat aningaasanut inatsimmi kontonit marlunneersuupput, katillugit 9,4 millioner koruunit suliniutinut meeqqanik, inuusuttuaqqanik ilaqutariinnillu isumaginninnernik siunertanut agguaanneqartarlutik. Taakkunannga 0,4 millioner koruunit inuit innarluutilinnut sapaatip akunnerititamut aamma juullimut tapiissutitut immikkoortinneqarput.

Naalagaaffiup iluani aningaasaateqarfinni assigiinngitsunit tapiissutit katillugit 9 milliarder koruunit missaanniipput. Ilaannakortumik aningaasaliisoqartillugu aamma itigartitsisoqartillugu taakkununnga innersuussisoqartarpoq.

Toortagaq ataaniittoq toorlugu pisortat aamma namminersortut aningaasaateqarfii arlallit linksii isumaginninnermut tapiissutinik tunniussisinnaasartut nassaarisinnaavatit.