airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Tusaannga Børns Vilkårimut tikeraarpoq

Meeqqat inuusuttuaqqallu kiserliortutut ajornartorsiortutullu misigisimasut, tapersersorneqarnissaminnik pisariaqartitsisut, oqarasuaammut siunnersuisarfiusumut Tusaanngamut saaffiginnissinnaapput. Meeqqat inuusuttuaqqallu Tusaanngamut attaveqaraangamik oqarasuaatip illuanit inersimasoq tusarnaartoq tapersersuisorlu oqaloqatigilertarpaat.
14. oktober 2022
Tusaanngami siunnersortit meeqqanik inuusuttuaqqanillu nunamit tamarmeersunik oqaloqateqartarput - taakkua angisuunik mikisunillu ajornartorsiuteqartarput. Ilai sianertarput ikinngutertik oqqassimagamikku, ilai artorsaramik imminnut toqunnissamik eqqarsaateqaramik sianertarput. Tusaanngap suliassaa tassaavoq inuit arlaannaalluunniit artorsarfimmini kisimiittutut misigisimassanngitsoq. Tusaanngap meeqqat inuusuttuaqqallu amerlanngitsuinnaat neqeroorummut saaffiginnittartut misigivai -taamaattumik iliuuseqartoqartariaqarpoq.

Tusaanngap meeqqanit inuusuttuaqqaniillu sullissinera pitsaanngorsarniarlugu, Tusaanngap danskit kattuffiat Børns Vilkår augustip qaammataani tikeraarpaa. Børns Vilkårip danskit meerartai inuusuttuarartaalu ikiorneqarnissaminnik pisariaqartitsisut ikiorneqarnissaat sulissutigisarpaa aamma meeqqat meeraanermik nuannersumik inuunermillu pitsaasumik inuuneqarsinnaatitaanerinik qulakkeerinnittarluni. Børns Vilkårip pingaarnertut suliaasa ilaat tassaavoq Børnetelefonen (meeqqat oqarasuaataat), taanna 1987-imiilli atuutilerpoq.

Tusaanngap aamma Børns Vilkårip akornanni suleqatigiinnerup aallartinnissaanut alloriarnissaq anguniarlugu isumasioqatigiinnissaq tikeraarnermi siunertaavoq. Tusaanngamit sinniisut sapaatip akunnerata ingerlanerani Børns Vilkårimi immikkut ilisimasallit assigiinngitsut naapippaat, taakkua toqqaannartumik Børnetelefonip siunnersuinermik neqeroorutaani toqqaannartumik sulisarput imaluunniit nittarsaassinermik paasissutissanik katersinermik, misissueqqissaarnermik, illersuisutut allarpassuarnillu suliaqartartuupput. Sulisunik assigiinngitsunik naapitsinerit assorsuaq isumassarsiorfiupput. Meeqqat isaannit aamma meeqqap nipaa Børns Vilkårimit assut sammineqartoq immikkut ittumik pissarsiaqarfiupput.

"Tusaannga aqqutigalugu meeqqat nipaasa nukittorsarneqarnissaannut qanoq iliussanerluta isumassarsivugut, meeqqat ulluinnarni inuunerminni ajornartorsiuteqartarnerminnilu qanoq misigisarneri immikuullarissumik paasisaqarfigisinnaalerparput."
- Mette Lange-Nielsen, Immikkut siunnersorti, Tusaannga

Tapiliullugu Børns Vilkårip siunnersuisarfinni suliaqartartut allat assigiinngitsutigut ataatsimeeqatiginissaat aamma aaqqissussimavaa taamaalilluni Tusaanngap siunnersuilluni neqeroorutit makkua naapinnissaannut periarfissinneqarpoq; Livslinjen, GirlTalk kiisalu brancheorganisationen RådgivningsDanmark.

Tusaanngap tikeraarnermini suliarujussuaq qujassuteqarfigaa, aamma siunissami suleqatigiinneq aqqutigalugu sunik angusaqarsinnaaneq assut ilimasuuteqarfigalugu.