airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Ilaqutariinni aqqutissioqatigiinnermik suliallit Danmarkimut paasisassarsiorlutik angalanerat

2022-imi decemberimi Avannaata Kommunianit, Qeqqata Kommunianit, Kommune Qeqertalimmit aamma Kommuneqarfik Sermersuumit sinniisuutitat qulingiluat kiisalu Isumaginninnermut Aqutsisoqarfiup Ilaqutariinni aqqutissiuisartoqatigiivinit sinniisuutitat sisamat Danmarkimut ulluni 14-ini paasisassarsiorlutik angalapput.
17. februar 2023

Kommuninit aamma Isumaginninnermut Aqutsisoqarfimmit sinniisuutitat tamarmik ulloq 5. december aallarput Horsens-imilu ulluni sisamani pikkorissartitsinermut peqataallutik. Ilinniartitsineq atuuffinnik marlunnik qitiutitsiviusoq tamarmik peqataaffigaat: Iliuuseqartartutut atuuffik aamma ataqatigiissaarisutut atuuffik. Tamatuma saniatigut suliassaqarfik mikisoq isiginiarneqarpoq.

 Tamatuma kingorna ulluni marlunni qulequttamik sammisaqarluni Esbjerg Kommuniani paasisassarsiorluni angalasoqarpoq, Danmarkimi kommuni taanna tassaavoq Ilaqutariinni aqqutissioqatigiinnermik iluatsinnerpaamik ingerlatsinikuusimasoq. Esbjerg Kommune-p ullut marluk pilersaarusiorsimavai, matumani meeqqap isiginnittarnera aamma ataqatigiissaarisup atuuffii pillugit ilinniartinneqarluta, periutsimik aqutsinissamut allaffissornikkut illuutitigullu atukkatigut tapersiinissaq siunertaralugu.

 Pulaarnitsinni meeqqat, inuusuttut angajoqqaallu namminneq ilaqutariittut aqqutissioqatigiinnermik ingerlatsinikut peqataapput. Isiginnittarnitik assigiinngitsut aallaavigalugit pisup ingerlanera oqaluttuaraat. Tamatuma saniatigut peqataasut apeqquteqarnissaminnut periarfissinneqarput. Tamanna peqataasut paasisaqaqaat assullu isumassarsiorfigisimallugu. Paasisassarsiorluni angalaneq tamakkerluni iluatsitsiffiusorujussuuvoq.

 Aamma Esbjerg-ip tungaanut angalalernermi Horsens Banegård-imi puigunaatsumik misigisaqartoqarpoq. Tamanna pivoq ulloq 13/12, Lucia-p ulluani. Tassani peqataasut oqarasuaatiminni qulliit ikititerpaat, kalaallisut erinarsorlutik Luciarlutik ingerlaaqatigiillutik. Tamanna inunnut saneqquasunut assut nuannaartitsivoq.

Misigisaq taanna angalaqataasut paasisassarsiornermik nalaanni ataqatigiinnermik ineriartortitsisimanerannik pitsaasumik ersersitsivoq. Angalaneq tamakkerlugu tunniusimaqaat alapernaallutillu. Tamatta Kalaallit Nunaanni kommunerisavut uterfigaavut Kalaallit Nunaanni Ilaqutariinni aqqutissioqatigiittarnermik periutsip siunissami ineriartortinneqarnissaa atuutilersinneqarnissaallu eqqarsaatigalugit nutaanik ilisimasaqalersimalluta, sulerusussuseqarluta piumassuseqarlutalu.