Peqatigiilluni suleqatigiinneq 2022-mi maanna killiffissiorneqarpoq suliniutip maannamut iluaqutaasimaneranik takutitsisumik ukiumoortumik nalunaarusiamik siullermeertumik saqqummersitsinikkut.
Niuertarfiit ulluinnarni imminnut unammilleqatigiikkaluartut taamaattoq Kattulluta inuuneritta pillugu peqatigiilluni suleqatigiinnermi inuunerissaarnerup siuarsarnissaanik anguniagaqarnissamik ataatsimoorlutik suleqatigiinnissaq isumaqatigiissutigisimavaat. Inuunerinneq inuunermi oqimaaqatigiissitsilernermik kiisalu imminut allanullu iluarisimaarnermut tunngassuteqarpoq. Nerisagut imikkagut kiisalu pitsaasumik nerisaqarnissamik ataatsimoorfeqarnerput peqqinnissatsinnut atugarissaarnitsinnullu pingaarutilerujussuupput.
Iluaqutaasunik ilumut iliuuseqartoqarnissaa qulakkeerniarlugu suliniutit aallartinneqartut uuttortarneqartarnissaat peqatigiilluni suleqatigiinnermut pingaaruteqarpoq. Taamaammat ukiut tamaasa innuttaasut peqqissusaannik inuunerannillu siuarsaaqataasunik anguniakkanik aalajangersimasunik uuttortarneqarsinnaasunillu peqatigiilluni suleqatigiit toqqaasarput.
Paarnat naatitallu qerisut tunisaanerisa siuarsarnissaat 2022-mi anguniarneqarpoq. Illuatungeriit ataatsimoorlutik nioqqutissanik taamaattunik tunisineq 5 %-imik amerleriartissimavaat. Tamanna ataatsimut anguniagaqarluni suleqatigiikkaanni angusaqarluartoqarsinnaaneranik takutitsivoq. Paarnanik naatitanillu qerisunik tunisaqarnerulerneq nioqqutissanik peqqinnartunik tunisinerulernissamik peqatigiilluni suleqatigiit tamakkiisumik anguniagaannut pingaarutilimmik alloriarneruvoq.
Niuertarfinni illuatungeriit tunisamik amerlassusaannik kisitsisinillu nalunaaruteqartarput peqatigiilluni suleqatigiinnit anguniagassat anguneqarsimanerannik uuttuinermut atorneqartartunik kiisalu nutaanik pingaarutilinnillu ilisimasaqalersitseqataasunik. Nutaarluinnartut peqatigiilluni suleqatigiinnit niuertarfeqatigiit pingasut akornanni nioqqutissaqatigiit top15-it allattorsimaffiannik ataatsimoortumik saqqummiussisinnaasimapput. Allattorsimaffimmi immiaaqqat sodavandillu tunisaanerpaapput, kisianni nioqqutissat peqqinnartut, soorlu aalisakkat, paarnat naatitallu aamma allattorsimaffimmiillutik. Allattorsimaffiup takutippaa nioqqutissanik peqqinnartunik tunisinerunissamik anguniagaqarnermut atatillugu suli suliassaqartorujussuusoq.
Peqatigiilluni suleqatigiinneq atuisartunik misissuisitsisimavoq tamatumalu takutippaa suleqatigiinnerup ilisarnaataa pisisartunit ilisarnaammik maluginiagaqarsimasunit nalinginnaasumik tigulluarneqarsimasoq paasineqarlunilu.
Peqatigiilluni suleqatigiinnit 2023-mi aalajangersimasunik anguniagassatut tulliuttut toqqarneqarsimapput:
- Paarnanik naatitanillutunisinerup annertusarneqarnissaanik 2022-mi anguniakkap nangeqqinneqarnissaa
- Paarnanik naatitanillu nutaanik tunisinerup annertusinissaa
- Matuersaaserfimmik ilisarnaaserneqarsimasunik nioqqutissanik, orsukinnerullutillu peqqinnarnerusunik orsulinnik, sukkukinnerullutillu tarajukinnerusunik, nerisani fibereqarnerusunik aserorterneqanngitsunillu iffiugassartaqarnerusunik tunisinerulerneq
- Top 15-t allattorsimaffianni nioqqutissat peqqinnartut amerlinissaat
- Peqatigiilluni suleqatigiinneq suleqatigiinnerullu ilisarnaataa pillugu ilisimanerulernissaat
Illuatungeriit sooq suleqataajumallutik aalajangersimanertik namminneq imannak oqaaseqarput
- Ajornartorsiutit pisariusut soorlu innuttaasut peqqissusaannik siuarsaaniarneq, suliaqartumit ataatsimit taamaallaat aaqqinneqarsinnaannginnera, suliassaqarfiilli akornanni siammasissumik suleqatigiittoqartariaqarnera, peqatigiilluni suleqatigiinnermi aallaaviuvoq. Peqqinnartumik toqqaanerup ajornanngitsuunissaa toqqagassaqqissuunissaalu tassuunakkullu inuunerissaarnermik siuarsaanissaq ataatsimoorluta pilersissavarput, Paarisami immikkoortortami pisortaagallartoq Aviaaja Ravnshøj Johansen oqarpoq.
- Peqqissutsimut suliniutitsinni suleqatigiiffiit pillugit naapinnissamut misissuinissamullu periarfissiisunik nunatsinni niuertarfinnut naapittarfissamik pilersitsisoqarpoq. Tamanna isumaqarpunga nalitoorujussuusoq. Tamatta nammineerluta assigiinngitsunik peqqinneq pillugu suliaqaraluarluta illoqarfinnilu arlalinni unammilleqatigiikkaluarluta peqqinneq pillugu niuertarfeqarfiit suleqatigiinnerat pisariaqarlunilu nalitunera tamatta isumaqatigiissutigaarput, KNI-mi Ussassaarinermut pisortaq Anders Stenbakken oqarpoq.
- Nuna tamakkerlugu innuttaasut peqqissusaannik siuarsaanissamut Brugseni akisussaaqataavoq innuttaasut tuusintit arlaqartut pisiniarfitsinni ulluinnarni niuerniartarmata. Nioqqutissat pisisartutta pisiarerusutaat tamaasa neqeroorutigigaluarlugit peqqinnartumik toqqaanissamik siuarsaanissamut ilumoortumik sunniuteqarsinnaavugut, Brugsenimi Sulisoqarnermut, Attaveqaqatigiinnermut Ussassaarinermullu pisortaq Benny Reffeldt Otte oqarpoq.
- Paarisamik niuertarfinnillu allanik suleqateqarnikkut kisimiilluta angusinnaasatsinnit annertunerujussuarmik angusaqarsinnaagatta upperaarput. Ataatsimut siuttuunissamik pilersitsineq ilumut ilorraap tungaanut allannguinissamik Pisiffimmi kissaateqarnitsinnut tunngaviuvoq. Peqqinnerusumik siunissaqarneq taamalu atugarissaarneq inuiaqatigiinni inuunermik qularnanngitsumik pitsaanerulersitsissaaq, Pisiffimmi Ussassaarinermut pisortaq Tina Hansen oqarpoq.
Kattulluta inuuneritta pillugu peqatigiilluni suleqatigiinneq 2030-p tungaanut ingerlassaaq Naalagaaffiillu Peqatigiinni Nunarsuarmut anguniagaq 3: Peqqissuseq atugarissaarnerlu aamma Nunarsuarmut anguniagaq 17: Suleqatigiinnikkut anguniagaqarneq.
Kattulluta inuuneritta ukiumoortumik nalunaarutaa 2022 www.paarisa.gl-imi atuarneqarsinnaavoq.
Paasisaqarnerunissamut attavissat
Paarisa:
Immikkoortami pisortaagallartoq Aviaaja Ravnshøj Johansen, oq. 34 67 48 imaluunniit e-mail: araj@nanoq.gl
Brugseni:
Sulisoqarnermut, Attaveqaqatigiinnermut Ussassaanermullu pisortaq Benny Reffeldt Otte, oq. +299 52 63 39 imaluunniit e-mail: benny.otte@knbmarketing.gl
KNI/Pilersuisoq:
Ussassaanermut pisortaq Anders Steenbakken, oq. +299 55 15 77 imaluunniit e-mail: atb@kni.gl
Pisiffik:
Ussassaanermut pisortaq Tina Hansen, oq. +299 29 66 30 imaluunniit e-mail: tih@pisiffik.gl