Atsiorluni akuersissutitalimmik akuersissutitaqanngitsumilluunniit inissiisoqarnera apeqqutaatinnagu nalunaaruteqarneq pissaaq aamma inissiinerit qanoq ittuugaluarpataluunniit:
- Pinasuartumik ulloq unnuarlu paaqqinniffimmut imaluunniit angajoqqaarsianut paarsisartunut inissiineq
- Kalaallit Nunaanni imaluunniit Kalaallit Nunaata avataani ulloq unnuarlu paaqqinniffimmut inissiineq
- Angajoqqaarsianut paarsisartunut qanorluunniit iluseqartunut inissiineq (nalinginnaasut, qanigisat aamma inuussutissarsiutigalugu paarsisartut)
Taakkua saniatigut nalunaaruteqarnermik tigusaqarusuppugut, tulliuttut pillugit aalajangiisoqarsimatillugu:
- Angerlartitsineq
- Angerlartitsinissamik itigartitsineq
- Inissiinermik allanngortitsineq
Sooq nalunaaruteqartoqassava?
Nalunaaruteqarnerit atorlugit siunertaasoq tassaavoq kisitsisinik peqalernissaq, Meeqqat tapersersorneqarnissaannut Inatsisartut inatsisaannut oqaaseqaatit naapertorlugit. Meeqqanik inuusuttunillu atugarliortunik angerlarsimaffiup avataanut inissinneqartunut kisitsisit pigineqalersussat, nuna tamakkerlugu aamma kommunikkaartumik ineriartornermik malinnaanissamut periarfissiissapput. Taamaalilluni kisitsisit pigineqalersussat inatsimmik nalilersuinissamut tapertaassapput aamma inissiisarnermut tunngassutilinni ineriartorneq pillugu isumaliutersuutinut aalajangiunneqartartunullu tunngavinnik pitsanngorsaallutik.2023 aallarnerfigalugu kommunit inissiisimanitik nalunaarutigineqarsimasut pillugit allattorsimaffimmik pisinnaalissapput, qinnuteqaammik nassiussinikkut uunga lsb29@nanoq.gl
Qanoq nalunaaruteqartoqassava?
Nalunaaruteqarneq immersuiffissaq atorlugu pisassaaq, Get Organized-imi nassaassaasoq, immersuiffissiaq: 012 - Immersuiffissaq - Isumaginninnermi Aqutsisoqarfimmut inissiineq pillugu nalunaaruteqarneq - Indberetning til Socialstyrelsen vedr Anbringelse
Immersuiffissaq immersorneqareerpat taanna nassiunneqassaaq uunga lsb29@nanoq.gl
Nalunaaruteqaammi meeraq ilisarineqarsinnaassanngilaq. Tassa imaappoq, inummut paasissutissat mianernartut allanneqassanngillat, assersuutigalugu meeqqap inuttut norlua, atia, najugaa assigisaalu.