Kommuninit tallimaasunit sisamani atorfiit inuttalerneqartussat katillugu 83-inik amerlassusilerneqarsimapput, taakkunannga 64-it inuttalerneqareerput. Kisiannili 21-nnaat isumaginninnermut siunnersortitut ilinniagaqarsimapput imaluunniit isumaginninnikkut suliaqarnermi siunnersortitut ilinniagaqarsimasuullutik.
Uani pineqartut tassaapput Kommune Qeqertalik, Qeqqata Kommunia, Avannaata Kommunia aamma Kommune Kujalleq.
- Atorfinitsitsinerni procenti annertugaluartoq isumaginninnikkut tunngasutigut ilinniagaqarsimasut ikippallaarujussuarput, Meeqqanut, Inuusuttunut, Ilaqutariinnut Peqqissutsimullu Naalakkersuisoq, Mimi Karlsen, oqarpoq, nangillunilu:
- Isumaginninnermut siunnersortit isumaginninnikkullu suliaqarnermi siunnersortit amerlanerusut pisariaqartippagut. Meerartagut inuusuttortagullu kiisalu inuit innarluutillit pitsaanerusumik sullinneqartarnissaat qulakkeerniarlugu sulianik suliarinnittartut attuumassusilimmik isumaginninnikkut tunngasutigut ilinniagaqarsimanngitsut amerlasuut piginnaasaqarnerulersissavagut. Sullissilluarnikkut inuunermi atukkat pitsaanerusut anguneqarsinnaapput.
Kommuneqarfik Sermersooq atorfiit amerlassusissaat aallaavigalugu aalajangersagaqanngimmat kommunimi atorfiit amerlassusissaannik kisitsisaataateqanngilaq. Meeqqanut suliassaqarfimmi sulianik suliarinnittartut katillugit 50,5-iusut taakkunanngalu 27,5-it isumaginninnermut siunnersortitut ilinniagaqarsimasuusut kommunip erseqqissaatigaa. Inersimasunut suliassaqarfimmi sulianik suliarinnittartut 6-7-iupput, taakkunannga pingasut isumaginninnermut siunnersortitut ilinniagaqarsimasuupput.
Sulianik suliarinnittartut attuumassusilimmik isumaginninnikkut tunngasutigut ilinniagaqarsimanngitsut amerlasuut piginnaasaqarnerulersinniarlugit, Meeqqanut, Inuusuttunut, Ilaqutariinnut Peqqissutsimullu Naalakkersuisup, Mimi Karlsenip kommunit suleqatiginiarlugit aggersarniarpai. Taassuma ilinniarsimasuulluni kommunimi sulisuulernissaq orniginarnerulissasoq kissaatigaa:
- Nuna tamakkerlugu ilinniagaqarsimasunik sulisussarsiortarneq ilungersunartuusoq nalunngilarput. Kisianni sulianik suliarinnittartut atugaannik pitsaanerusumik pilersitsinissatsinnut tamassuma unitsissanngilaatigut, Mimi Karlsen oqarpoq.
Sukumiisumik paasisaqarusukkuit naalakkersuisup allattaa Naja Lynge Petersen e-mailikkut nalp@nanoq.gl imaluunniit oqarasuaatikkut: +299 34 66 41 attavigiuk.
Mimi Karlsen: Kommunini sulianik suliarinnittartut ataatsimoorluta piginnaasaqarnerulersissavagut
Kommunini meeqqat inuusuttullu kiisalu inuit innarluutillit pillugit sulianik suliarinnittartut kommunit kisitsisaatiminnik paasissutissiipput. Atorfissani amerlassusilerneqarsimasuni atorfinni amerlasuuni isumaginninnikkut tunngasutigut ilinniagaqarsimasuninngaanniit inuttalerneqarsimasut kisitsisit takutippaat. Sulianilli suliarinnittartut amerlaqisut attuumassusilimmik isumaginninnikkut tunngasutigut ilinniagaqarsimanngillat – atorfiillu amerlasuut inuttalerneqarsimanatik.
7. marts 2023
