Meeqqat atuarfiini akullerni atuartut IGASA-mi peqataanerminni iganeq, ataatsimoorneq, peqqinneq meeqqallu pisinnaatitaaffii sammissavaat.
- Meeqqat nuannersumik pitsaasumillu misigisaqartikkumallugit nerisassiassanik pitsaasunik, aalisakkanik naatitanillu igatissavagut. Igaqatigiittarnerit nereqatigiittarnerillu peqqissutsimut, atugarissaarnermut pitsaasumillu ataqatigiinnissamut nukittorsaallutillu iluaqutaasarput, Paarisap immikkoortortaani pisortaq Helena Lynge Møller nassuiaavoq.
Paarisa Unicef Kalaallit nunaannilu suleqatigiillutik IGASA pilersippaat meeqqat atuarfii suleqatigalugit, nunatsinnilu suliffeqarfiit IGASA-mi igaassanik pilersuisuullutik.
- Meeqqat atuarfii minnerunngitsumillu suliffeqarfiit pilersuisut Brugseni, KNI, Pisiffik Royal Greenlandilu, meeqqat igaffinni aalisakkanik naatitanillu peqqinnartunik igaqatigiinnissaannut pilersuisut qutsavigerujussuarpagut, Kalaallit Nunaanni Unicefip suliniutinut pisortaa, Maliina Abelsen oqarpoq.
Atuagaq AALISA – IGASA – NERISA iganermut ilitsersuut kiisalu peqqinnartunik nerisaqarnissamut siunnersuutit qulit nunatsinni atuarfinni klassinut tamanut agguaanneqarput. Aamma meeqqat IGASA-mi peqataasut tuluujuaqqanik diplominillu tunineqarput. Ilinniartitsisut IGASA 2023 ingerlappaat ilitseruissumut quppersagaq Paarisa Unicef Kalaallit nunaallu suliaat malittaralugu.
IGASA 2023 pillugu paasissutissat
Paarisa UNICEF Kalaallit nunaallu suleqatigiillutik IGASA 2023 piviusunngortippaat.Paarisa, meeqqat immikkut ukkataralugit, nunatsinni peqqinnartumik inuuneqarnermik atugarissaarnerunissamillu siuarsaanermik suliaqarfiuvoq.
Unicef Kalaallit nunaat meeqqat pisinnaatitaaffiisa qulakkeerneqarnissaannik suliaqartuulluni.
IGASA 2023-imi klassit peqataasut igaassaannik, soorlu aalisakkanik naatitanillu Brugseni, KNI, Pisiffik aamma Royal Greenland pilersuisuupput.
IGASA Naalakkersuisut pitsaasumik meeraaneq pillugu 2020-2030-imi suleqatigiinnissamik periusissiaata, Inuuneritta III-p ataani suleqatigiissutaanni Kattulluta inuuneritta-mi sammineqartitsineruvoq.
Attavissaq
Paasisaqarnerorusunnermi attavissaq: Immikkoortortami Paarisami pisortaq, Helena Lynge Møller, oqarsuaat 34 50 00 imaluunniit e-mail: helm@nanoq.gl