Inuit innarluutillit inuiaqatigiinni timikkut akimmiffiusartut ersinngitsumillu aporfiusartut nalaatarisarpaat, taamaattoqarneratalu inuit allat assigalugit ulluinnarminni peqataanissaminnut akornutigisarpaat. Killeqarnerit taakkua nammineq nukissaminnik iliuuseqarsinnaanerminnillu upperinninnerannut sunniisinnaapput.
Taamaattumik inuit innarluutillit inuttut, immikkoortutut, inuiaqatigiinnilu imminut upperinerulernissaat, nammineq periarfissaat iliuuseqarsinnaanerunerallu inunnut innarluutilinnut sapaatip akunneritinneqartumi 41-mi immikkut sammineqassapput.
Taakkorpiaallu taaneqartut pitsaanerulersinnissaannut ilinniartitaaneq, suliffeqarfeqarfik ataatsimoornerlu susassaqarfittut aalajangiisutut Naalakkersuisunit isigineqarput, susassaqarfiimmi taakku inunnik innarluutilinnik akuersaarpata inuit innarluutillit inuttut isumalluutissatut annertunerusumik akuersaarneqartutut misigisimalernissaat inernerisinnaavaa.
Taamaattumik inunnut innarluutilinnut sapaatip akunneritinneqartumut 41-mut atatillugu inuit innarluutillit aporfigisarsimasatik qanoq peersimaneraat tamatumalu malitsigisaanik nammineq periarfissaminnik pitsaanerulersitsisimanerminnut iliuuseqarsinnaanerulersimanerminnullu tunngatillugu misilittakkaminnik avitsinissaannut Isumaginninnermut Aqutsisoqarfimmit kaammattorneqarput.
Inuit innarluutillit ataatsimoornerni peqataanerannut najukkani inuiaqatigiit, kommunit, ilinniarfeqarfiit, suliffeqarfiit, peqatigiiffiit, paaqqinnittarfiit suliniaqatigiiffiillu allat ikorfartuinerminnut tunngatillugu misilittakkaminnik avitsinissaannut aammattaaq Isumaginninnermut Aqutsisoqarfiup kaammattorpai.
Inuttut, immikkoortutut, inuiaqatigiinnilu tamatuminnga suliaqarnerup qanoq ingerlateqqinneqarsinnaaneranut kikkut tamarmik isumassarsiaminnik anngussisinnaapput.
Tamatuma saniatigut aporfiusartut piiarneqarnissaat inuillu innarluutillit periarfissaasa pitsaanerulernissaat kiisalu iliuuseqarsinnaanerisa annertusinissaat immikkut sammisaralugit innuttaasut susassaqartullu attuumassutillit aaqqissuussanik ingerlatsinissaannik kaammattorneqarput.
socialstyrelsen.gl aqqutigalugu aaqqissuussanut siuliani taaneqartunut kikkut tamarmik tapiiffigineqarnissamik ujartuisinnaapput.
Qinnuteqarnissamut piffissaliussaq tassaavoq sisamanngorneq 21. septembari.
Inunnut innarluutilinnut sapaatip akunneritinneqartumi 41-mi sammisassaqartitsinernut tapiissutinut tunngatillugu apeqqutit uunga nassiunneqarsinnaapput: iass@nanoq.gl
Inunnut innarluutilinnut sapaatip akunneritinneqartoq 41: Aporfiiaaneq iliuuseqarnerulernerlu
2023-mi inunnut innarluutilinnut sapaatip akunneritinneqartumi aporfiusartut piiarneqarnissaat inuillu innarluutillit periarfissaasa pitsaanerulernissaat kiisalu iliuuseqarsinnaanerisa annertusinissaat immikkut sammineqassapput.
31. august 2023
