Nakuusertarneq inuiaqatigiinni annertuumik ajornartorsiutaavoq, inuillu angerlarsimaffimminni nakuuserfigineqartartut amerlavallaarlutik.
- Nakuusertarneq tamanit susassarineqarpoq, taamaammat inuiaqatigiittut meeqqatta inuusuttortattalu ilaqutariinni nakuuserfiunngitsumik atornerluinertaqanngitsumillu peroriartornissaat akisussaaffigaarput. Qanigisariinni nakuusertarnermik akiuiniarneq ataatsimoorussamik akisussaaffiuvoq, Meeqqanut, Inuusuttunut Ilaqutariinnullu Naalakkersuisoq, Aqqaluaq B. Egede taama oqaaseqaateqarpoq.
Kalaallit Nunaanni Politiinit 2022-mut ukiumoortumut kisitsisit takutippaat angerlarsimaffinni meerartalinni eqqissiviilliornerit 501-t, angerlatsimaffiit meerartaqanngitsuni eqqissiviilliornerit 2.023-t nakuusernerillu 1.099-it nalunaarutigineqarsimasut. Nakuuserfigineqarsimasulli amerlassusivii pinnagit kisitsisit taamaallaat takutippaat pinerlunnerit nalunaarutigineqarsimasut.
- Uagut inuiaqatigiittut nakuusertarnerup unitsinnissaanut akisussaasuuvugut ilaqutariinnilu nakuusertoqartartoq paasigutsigu inuiaqatigiittut akuleruttussaavugut, Meeqqanut, Inuusuttunut Ilaqutariinnut Naalakkersuisoq, Aqqaluaq B. Egede taama oqaaseqaateqarpoq.
Qanigisariinni nakuusertarnerup akiorneqarnissaa pillugu iliuusissatut pilersaarut 2023-2027 pillugu Naalakkersuisut kissaatigaat ingerlatiinnarneqassasoq, patajaallisarneqassasoq suliniutinillu pioreersumik inerisaanissaq taanna sisamanik suliniuteqarfeqartoq:
- Nakuusertarnerit imigassamut aalakoornartortalimmut attuumassutillit ikilisinneqassapput.
- Qimarnguiit patajaallisarneqassapput amerlanerillu pilersinneqassapput.
- Angerlarsimaffinni nakuusertarneq unitsinneqassaaq – nakuusernermik eqqugaasunut nakuusersimasunullu pitsaanerusumik katsorsaanerit.
- Qanigisaasuni nakuusertarneq pillugu ilisimasaqarneq annertusineqassaaq, meeqqat inuusuttullu akornanni pinaveersaartitsineq immikkut ukkatarineqarluni.
Attavissaq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.