Nunatsinni imminut toquttarnermik pinaveersaartitseqataasut suliniuteqarfigineqartussat sisamat nutaat Qamani – periusissiami nassuiarneqarput.
Inuusuttut oqariartuutaat MIO-p nalunaarusiaaneersut, uannga: Qamani – Inuusuttut Nunatsinni Imminut Toquttarnermut Pinaveersaartitsinissamik Innersuussutaat Qamani – Periusissiamut ilanngunneqarput, taamatut ilanngunneqarnerinut inuusuttut isiginnittariaasiat immikkut ittumik sammisassanngortinneqarlutik.
- Asasakka inuusuttut. Immikkut qujaffigerusuppassi sapiissuseqarlusi nukittussuseqarlusilu imminut toquttarneq pinaveersaartinniarlugu innersuussinikkut periusissiamut piviusunngortitseqataagassi. Innersuussasi oqariartuutaapput nalituut, taamaaliornikkullu inuiaqatigiinnut maligassiuisuuvusi, Meeqqanut, Inuusuttunut Ilaqutariinnullu Naalakkersuisoq, Aqqaluaq B. Egede, oqarpoq.
Nuna tamakkerlugu ukiumut imminut toquttartut agguaqatigiissillugu 45-upput. Siunnersuisarfik Tusaannga 2022-miinnaq 414-inik imminut toqunneq pillugu saaffigineqarlutik oqaloqateqarput.
Meeqqat, inuusuttut inersimasulluunniit imminut toqunnissamik eqqarsaateqartut tamarmik imaluunniit imminut toqunnermik eqqugaasut ikiorneqarnissaq pisariaqartitaat Qamani - imminut toqunnissamik pinaveersaartitsinermut periusissiap nutaap qulakkiissavaa.
- Meeqqat, inuusuttut ilaqutariillu tamarmik sivisuumik pitsaasumillu inuuneqarnissaannut sapinngisamik pitsaanerpaamik atugassaqartinneqassapput, Meeqqanut, Inuusuttunut Ilaqutariinnullu Naalakkersuisoq oqarpoq.
Pisortaqarfiit kalluarneqartut, assersuutigalugu Namminersorlutik Oqartussat, kommunit, politiit innuttaasullu allanngueqataasinnaaqqullugit imminullu toquttarnermik pinaveersaartitseqataaqqullugit periusissiaq atugassarititaasunik pitsanngorsaaqataallunilu sakkussanik tuniseqataassaaq.
- Imminut toqunnissamik eqqarsaatillit imminullu toqunnermit annaasaqarnikut ikiorniarlugit inuttut ataasiusutut suleqatigiissaagut. Ataatsimooraangattami nukittunerpaasarpugut. Inuunernik amerlavallaartunik annaasaqareerpugut, Meeqqanut, Inuusuttunut Ilaqutariinnullu Naalakkersuisoq, Aqqaluaq B. Egede, oqarpoq.
MIO aamma Naalakkersuisut suleqatigiipput
Taamaammat najukkani innuttaasut pisariaqartitaannik Qamani – periusissiaq aallaaveqarpoq, najukkani naleqartitat nukittuffiillu qitiutinneqarlutik.
Suliniuteqarfigineqartussat aalajangersimasumik suliniuteqarfigineqartussanut assigiinngitsunut sisamanut agguataarneqarput:
- Saaffiginninnissamut periarfissat
- Innuttaasunik akuutitsineq
- Atuarfinni ilinniarfinnilu toqqissisimaneq ilorrisimaarnerlu
- Paquminartuiaaneq
Kisimiittutut misigisimavit oqaloqateqarnissamillu pisariaqartitsillutit?
Tusaannga oqarasuaatikkut 80 11 80-imut sianerlutit imaluunniit 18 99-imut SMS-erlutit saaffigiuk.
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk