Suli atualinngitsunut suliassaqarfik sulisoqarrnikkut annertuumik unamminartoqartitsivoq. NPK, Nunatsinni Perorsaasut Kattuffiat, Maaji 2023-imi ulluunerani neqeroorummi perorsaasunik 169-inik taamani nuna tamakkerlugu pilersaarutaasumi amingaateqatoqarneranik allannertaqartumik nalunaarummik saqqummiivoq.
Unammillernartut taakkua takutippaat suliassaqarfimmi pitsaassuseq annertuumik tatineqartoq. Perorsaasummi ulluunerani neqerooruteqarfimmi sulilertartut ikippallaarput.
- Meeqqat amerlavallaat ullut tamaasa perorsaasutut ilinniarsimasunik amigaateqartunut ulluunerani neqeroorutinut tunniunneqartarput. Ulluunerani neqeroorutini meeqqat tamarmik inersimasunut toqqissisimanarisaminnut ullullu tamaasa pissanganartunik ineriartuutaasunillu sammisaqatitsisunik aalajaatsunik periarfissaqarnissaannik qulakkeerisumik suliatigut tunngavissaasutut perorsaasut ulluunerani neqeroorutini sulisuupput, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede taama oqaaseqarpoq.
2022-mi perorsaasut aamma inuit perorsaasutut naannerusumik ilinniagallit sulisut 46%-iinnaapput. Taava imaappoq sulisut 54%-ii ilinniarsimasuunngillat. Perorsaasut siuliatigut oqaatigivaat ilaatigut ilinniaqqinnissamut ingerlariaqqiffiusumillu ilinniarnissamut periarfissat suliffimmilu avatangiisit ulluunerani neqerooruteqarfimmi perorsaasuuginnarnissamik toqqaanissamut pingaaruteqartut.
Periusissiamut, Meeraaneq Nalitooq 2023-2030-mut atatillugu Naalakkersuisut kissaatigaat ilaatigut perorsaasut perorsaanikkullu sulisut allat ilinniaqqinnissaannut ingerlaqqiffiusumillu ilinniarnissaannut, kiisalu sulisunik ilinniarneqanngitsunik piginnaanngorsaanissamut suliniutinik kivitsisoqarnissaa.
Aammattaaq Naalakkersuisut kissaatigaat ulluunerani neqeroorummi sulisunut suliffiup avatangiisii toqqissisimanartuunissaannik qulakkeerinissaq siunertaralugu ulluunerani neqeroorummi aqutsisut akornanni aqutsisutut piginnaanngorsaqqinnissamut periusissiaq tapersiissasoq.
Periusissiaq ataani allassimasunik katillugit sisamanik sammiveqarpoq:
- Meeraq qitiutillugu
- Ilinniartitaaneq piginnaanngorsarnerlu
- Ulluunerani neqeroorummi sulisunut atugassarititat pitsaanerusut
- Suli atualinngitsunut suliassaqarfiup inatsisitigut tunngavigisaata nutarternissaa
Periusissiaq, Meeraaneq Nalitooq 2023-2030 uani atuarneqarsinnavoq.
Sukumiisumik paasisaqarusukkuit naalakkersuisup allattaa Lars Salik Kielsen e-mailikkut salik@nanoq.gl imaluunniit oqarasuaatikkut: +299 34 53 17 attavigiuk.