Nuna tamakkerlugu ulluunerani neqeroorutini sulisut ulluuneranilu paarsisartut piginnaanngorsaanermik annertuumik suliniuteqarnikkut meeqqanik atugarliortunik takunnissinnaanermik piginnaasaat pitsanngorsarneqarput.
Naalakkersuisut Danmarkimilu naalakkersuisut suleqatigiillutik aalajangerput nunatsinni meeqqat atugaat pitsanngorsarneqassasut suliniutillu arlallit aallartinneqassasut.
Ulluunerani neqeroorutini sulisut piginnaasaasa qaffassarneqarnissaat inerisarneqarnissaallu ilaatigut ukkatarineqarsimavoq, meeqqat atugarliortut mianernartumillu inissisimasut siusissukkut nanineqarsinnaanissaat immikkut ukkatarineqarluni:
”Suliniummi ulluunerani neqeroorutini sulisut taamak amerlatigisut peqataanerat piginnaasaasalu pitsanngorsarneqarnerat nunamut tamarmut iluaqutaassaaq. Peqataanerat meeqqanut suli atualinngitsunut pitsaasumik sunniuteqassaaq sammivimmullu eqqortumut alloriarneruvoq siulleq, sulimi amerlanerusut pisariaqartippavut,” Meeqqanut, Inuusuttunut, Ilinniartitaanermut, Timersornermut Ilageeqarnermullu Naalakkersuisoq Aqqaluaq B. Egede oqarpoq.
Ulluunerani neqeroorutini sulisut angerlarsimaffimmilu paarsisartut, tassunga ilanngullugit perorsaasut, angerlarsimaffimmi paarsisartut, taartaasartut, igaffimmi sulisut eqqiaasullu 800-t missaani amerlassusillit piginnaasaat qaffassarneqarput;
”Pikkorissarnermi peqataasinnaasimagama qujamasuutigaara, pikkorissarnerummi ulluinnarni suleqqilernissannut sakkussannik nukissannillu tunivaanga”. – Nunatsinni ulluunerani neqeroorutit ilaanni sulisoq taama oqarpoq.
Piginnaasat qaffassarniarlugit pikkorissartitsinerit naammassineqarnerinut pingaarnertut kommunit tamaasa qanimut suleqatiginerisigut pisimapput.
Suliniutip matuma pingaarutillip siunertaa kommunini meeqqat pillugit ataatsimiititalianut sulilu atualinngitsunut ingerlatsivinnut saqqummiunneqarsimavoq, tamannalu ataqatigiissaarinermut piginnaanngorsaanerillu ingerlanneqarnerannut peqataatitsivoq.
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.