Nuannaarutigalugu saqqummiupparput Siusissukkut Suliniuteqartarnermi Ilaqutariinnik naartusortalinnik aamma ilaqutariinnik marluk inorlugit ukiulinnik meerartalinnik unammillernartumi inissisimasunik sullissinermi suliaqartunut najoqqutassiaq.
Najoqqutassiaq danskit kalaallillu suliaqarfiisa assigiinngitsut suliniutitut suleqatigiinnerisa pilersinneqarpoq.
Najoqqutassiaq Siusissukkut suliniuteqartarnermi sulialinnut immikkut ittumik saaffiginnippoq.
Najoqqutassiap imarivai kulturikkut ileqqut, peqqissuseq pillugu paasinnittaatsit, siunnersuutit suleqatigiinnernut ataatsimiinnernullu aaqqissuusseriaatsit aalajangersimasut, kiisalu akisussaaffiit qanoq agguataagaanerannik tunngaviusumik ilisimasanik katersukkat.
Najoqqutassiap siunertaraa Siusissukkut suliniuteqartarnermi suliallit ilaqutariinnik unammillernartumi inissisimasunik ikorfartuinissaat.
Najoqqutassiap atuutsilernissaanut atatillugu immikkut pilersaarusiorpugut internetilu atorlugu isumasioqatigiissitsinerit ingerlajumaarput (webinarit).
Neriuutigaarput najoqqutassiaq ilissinnut iluaqutaajumaartoq aammalu suliaqarfimmi sulinerup ingerlaavartumik ineriartornissaanut iluaqutaajumaartoq.
Ilitsersuut uani aaneqarsinnaavoq.