2024-mi novembarip 25-anniit 27-annut isumasioqatigiissitsinissaq
Isumaginninnermut Aqutsisoqarfimmi immikkoortortaq Paarisa Nuummi 2024-mi novembarip 25-anniit 27-iat ilanngullugu isumasioqatigiissitsinissamik aaqqissuisuuvoq.
Isumasioqatigiissitsinerup qulequtaa
Qamani 2024 – Imminut toqunnissamik pinaveersaartitsineq pillugu ataatsimoorta!
Isumasioqatigiissitsinerup tunuliaqutaa
Naalakkersuisut ”Qamani – imminut toqunnissamik pinaveersaartitsineq pillugu periusissiaq 2023-2028” Ilulissani 2024-mi marsip qaammataani saqqummiuppaat.
Naalakkersuisut iliuuseqarfigineqartussat sisamat ukuusut sammerusuppaat:
1. Saaffiginninnissamut periarfissat,
2. Innuttaasunik akuutitsineq,
3. Atuarfinni ilinniarfinnilu toqqissisimaneq ilorrisimaarnerlu,
4. Paquminartuiaanissaq.
Periusissiaq kalaallisut qallunaatullu allaqqasoq uani aaneqarsinnaavoq.
Isumasioqatigiissitsinerup siunertaa
Qamani – Imminut toqunnissamik pinaveersaartitsineq pillugu ataatsimoortamik qulequtserlugu siullerpaamik isumasioqatigiissitsinissap siunertaraa ilisimasanik misilittakkanillu avitseqatigiiffiusumik pilersitsinissaq, periusissiamik “Qamani 2023-2028”-mik atuutsilersitsinissaq qulakkeerniarlugu.
Isumasioqatigiissitsinermi suliamut tunngasut kiisalu ilisimatusarnikkut misilittakkat ilisimasallu saqqummiunneqassapput, imminut toqunnissamik pinaversaartitsineq pillugu oqaloqatigiinnissamut tunngaviusussat.
Taamaalilluni pinaversaartitsinermut siunnersortit, ilitsersuisartut allallu suliamik suliaqartut ataatsimut paaseqatigiinnerulernissaat pilersinneqarsinnaalissammat, ataatsimoorluni suleqatigiinnermik nukittunerulersitsisinnaasoq aammalu suleqatigiissutigineqarsinnaasut pillugit periarfissanik, ataatsimeersuareernerup kingorna attatiinnarneqartussanik pilersitseqataasinnaalluni.
Onlinekkut peqataasinnaaneq
Onlinekkut peqataanissaq periarfissanngorumaarpoq. Linkeq pissarsiareriarutsigu nalunaaruteqarumaarpugut.