Kalaallit Nunaanni meeqqanut inuusuttunullu atugarliortunut pitsaanerusumik suliniuteqarnissaq pillugu kalaallit qallunaallu oqartussaasoqarfiisa assigiinngitsunik suliallit akornanni suleqatigiinneq pillugu inaarutaasumik nalunaarusiaq ullumi tamanut saqqummersinneqassaaq. Ukiuni pingasuni suleqatigiinneq suliniutinik 16-inik inerneqarpoq, taakkulu meeqqat inuusuttullu atugarliortut ikiorlugillu tapersersornissaannut aaqqissuussamik pitsaanerusumik sunniuteqarluartumillu pilersitsinermik ikiuutaasimapput.
Piffissami ilungersuutinut suliniutinik siunnerfilinnik pisariaqartitsiviusumi, Kalaallit Nunaanni meeqqanik inuusuttunillu pisariaqartumik ikiuinermik tapersersuinermillu suliniutini tamani qulakkeerinninniarneq ataatsimoorussamik anguniagaasimavoq.
Kalaallit Nunaanni eqimattanut atugarliornerpaanut atugassarititaasut pitsanngorsarniarnerinut suliaqarnermi, nalunaarusiap pingaarutilimmik alloriarneqartoq takutippaa, kalaallit danskillu oqartussaasuisa suleqatigiinnerat iluatsilluarsimasoq oqaatigisinnaallugu assut nuannaartunarpoq. Suliniutini tigussaasumik arlallit anguneqarsimapput, taakkulu inuiaqatigiinnut sunniuteqarluartuupput.
Suliniutinit taakkunannga 16-init misilittakkat ilisimasallu pigilersimasat siunissami suliniutissanut tunngavittut suli atorneqassapput. Kalaallit Nunaanni meeqqat inuusuttullu inuttut inatsisitigullu atugaat pitsanngorsarniarlugit suliniutit suliarineqarnikuupput, matumani ilaqutariinnut tapersersuineq annertunerulersinniarlugu, katsorsaanissamut periarfissat pitsanngorsarniarlugit taavalu pitsaaliuineq pitsaanerusoq siusissukkullu iliuuseqarneq qulakkeerniarlugit.
Naalakkersuisoq Aqqaluaq B. Egede naggasiutigalugu oqaaseqarpoq ”Ukiuni kingullerni pingasuni kalaallit qallunaallu oqartussaasoqarfiisa assigiinngitsunik suliallit akornanni suleqatigiinneranni ilaasimasunut, susassaqartunut, oqartussaasunut, suliniaqatigiiffinnut inunnullu ataasiakkaanut annertuumik qujassuteqarnera oqaatigerusuppara. Suliaqarsimanersi suliniummik patajaatsumik ataatsimoorussamillu inerneqarpoq, sulilu suleqatigiinnissaq qilanaaraara, maanimi nunami meerartatsinnut inuusuttortatsinnullu siunissaq pitsaanerusoq ataatsimoorluta qulakkeersinnaavarput.”
Attavissaq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.