Paarisa imminut toquttarnermik pinaveersaartitsineq pillugu ullunik pingasunik sivisussusilimmik, Nuummi ulluni 25.-27. novembarimi ingerlanneqartussamik ataatsimeersuartitsissaaq.
Soqutigisaqatigiit attuumassutillit tamarmik, ilisimasanik misilittakkanillu paarlaassiveqatigiiffigisartagassamik pilersitsisussat kiisalu periusissiap Qamanip sunniuteqarluartumik atulersinnissaanut qulakkeerinnittussat ataatsimoortinnissaat ataatsimeersuaarnermi siunertarineqarpoq. Periusissiami suliniutit sisamat peqataasuniit oqallisigineqassapput: Saaffiginninnissamut periarfissat, Innuttaasunik akuutitsineq, Atuarfinni ilinniarfinnilu toqqissisimaneq ilorrisimaarnerlu aamma Paquminartuiaaneq.
Paarisap ataatsimeersuarneq pisariaqartumik periutsimullu tunngasumik pingaarutilimmik aningaasaliinertut isigaa, tassani periusissiap atulersinnissaanut suliamik ilisimasallit qitiusumillu soqutigisaqatigiit allat ilanngunneqarnissaminnut ilassuteqarnissaminnullu periarfissinneqassapput.
Innuttaasut peqqinnerulernissaannik suliniut Inuuneritta III-mi naleraq 1-ip isumakkut peqqissuseq qitiutippaa, tamannalu Qamani – Imminut toqunnissamik pinaveersaartitsineq pillugu periusissiaq 2023-2028-mut tunngavissiivoq.
Ataatsimeersuarnermi imminut toquttarneq pillugu ilisimatusarnermik ilisimasanillu kiisalu tarnikkut ikiueqqaarnermit misilittakkanik, ilaatigut politiinit, ilisimatuunit, Allorfimmit aamma Tusaanngamit saqqummiisoqassaaq. Soqutigisaqatigiit attuumassutillit 120-t tungaannut nuna tamakkerlugu ilinniarfeqarfinneersut, kommuninit tamaneersut, peqqinnissaqarfinneersut aamma ilisimatuut peqataassapput, Canadamilu nunat inoqqaavi aamma pulaartutut peqataassapput.
Ataatsimeersuarneq Paarisap Isumaginninnermullu Aqutsisoqarfiup YouTube kanalianni toqqaannaq malinnaavigineqarsinnaavoq.
Imminut toqunnissamik eqqarsaateqaruit imaluunniit kiserliortutut misigiguit Tusaannga attavigisinnaavat.
Tusaannga ulloq unnuarlu ammasarpoq, kinaassutsimik isertuussiffigisinnaavoq akeqarnanilu.
Oqarasuaat: 801180
SMS: 1899
Attavissaq
Sukumiisumik paasisaqarusukkuit naalakkersuisup allattaa Mona Hansen e-mailikkut mohan@nanoq.gl imaluunniit oqarasuaatikkut: +299 34 50 00 attavigiuk.