Naalakkersuisut Kommune Kujalliup isumaginninnermut suliassaqarfianut ikiuinissamik qulakkeerinnipput
Ikiorneqarnissaq pillugu Kommune Kujallermit saaffiginnissut tunngavigalugu Naalakkersuisut kommunip ajornartorsiutaanut tunngatillugu ikiuigasuarnissaminnik aamma meeqqanut, inuusuttunut ilaqutariinnullu kiisalu inunnut innarluutilinnut eqqugaasunut ikiuinissamik qulakkeerinninniarlutik aalajangersimapput.
8. november 2024
Naalakkersuisut Kommune Kujalliup isumaginninnermut ingerlatsiviani ilungersuuterpassuinut tunngatillugu pinasuartumik tapersersuiniarlutik aalajangersimapput. Uani pineqartoq tassaavoq meeqqat inuusuttullu kiisalu inuit innarluutillit tapersersorneqarnissaat.
Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede ima oqaaseqarpoq:
”Pissutsit ilungersunartorujussuupput. Isumaginninnermut suliassaqarfimmi malittarisassanik ingerlatsineq aallaavittut kommunip suliassaraa. Kommunimi ajornartorsiutit annertungaarmata pinasuartuullutillu, Naalakkersuisuni Kommune Kujalleq ikiorniarlugu aalajangersimavugut, innuttaasut pisinnaatitaaffii inatsimmillu eqquutsitsineq qulakkeerneqarniassammata kommunimut ingerlaannartumik ikiuinissaq pisariaqarpoq.”
Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede nangilluni oqaaseqarpoq:
”Ulluinnarni ingerlatsinerup sulianillu suliarinnittarnerup isumagineqartarnerisa saniatigut, suliassaqarfinni eqqugaanerpaasuni Namminersorlutik Oqartussat sulisussanik isumalluutitigut ikiuuffiginiagaanni, pitsaaliuilluni suliniuteqarnerup pitsaanerulersinnissaanut qitiutitsinerput aamma attatiinnarniarparput. Akisussaaffik naggaterpiaatigut kommunimut peqqittussaavoq taamaammallu aalajangernermi isumaginninnermut ingerlatsivimmi sulisuni aqutsisunilu piginnaasanik ineriartortitsinissarput aamma qitiutipparput”
Isumaginninnermut maleruagassat ilaannai atorunnaarsinneqarnissaannut aalajangernermi, meeqqanut aamma inuusuttunut suliassaqarfimmi kiisalu innarluutilinnut suliassaqarfimmi isumaginninnermut inatsisinik ingerlatsineq ilaavoq.
Tamanna siunissami Naalakkersuisunit isumagineqassaaq. Atorunnaarsitsineq ilutigalugu Namminersorlutik Oqartussaniit anguniagaqarfiusumik tapersersuinissaq taavalu Kommune Kujallermi isumaginninnermut ingerlatsiviup ingerlaqqilernissaata qulakkeernissaa eqqarsaatigalugit isumaginninnermut suliassaqarfik tamakkiisumik annertunerusumik qulaajarlugu aallartinneqassaaq.
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.