Nunap kommuniisa aamma ulloq unnuarlu paaqqinnittarfiisa qaninnerusumik suleqatigiinneq pilersinniarlugu 2020-miit maannamut Isumaginninnermut Aqutsisoqarfik annertuumik suliniuteqarsimavoq. Kommunini aamma ulloq unnuarlu paaqqinnittarfinni isumaginninnermut tunngasunut inuit oqaaseqartartut suliamillu ilinniarsimasut apeqqarissaarfigineqartarnerat tunngavigalugu Isumaginninnermut Aqutsisoqarfimmit neqeroorutinik paasissutissanillu pisariaqartitaannut sakkussatullu kissaatigisaannut tunngatillugu nittartakkamik nutaamik tamanna pillugu Isumaginninnermut Aqutsisoqarfik tulluarsakkamik suliaqarpoq.
Isumaginninnermut Aqutsisoqarfimmi aqutsisoqarfiup pisortaa, Helene Broberg Berthelsen oqaaseqarpoq:
- ”Nuna tamakkerlugu isumaginninnermut tunngasuni imminut tapersersoqatigiinnerunissamik pisariaqartitsisoqartoq takuarput - kommunit aamma ulloq unnuarlu paaqqinnittarfiit tamarmik tusarneqassapput ilanngutitinneqarlutillu, taamaalilluni ilaatigut paasissutissanik, taperserneqarnermut ilisimasanillu ajornannginnerusumik pissarsisoqarsinnaalerluni. Taamaattumik nittartagaq nutaaq www.socialstyrelsen.gl, saqqummersipparput, tassani paasissutissat, neqeroorutit ilisimanissallu ataatsimut katersorpavut, innuttaasunik atugarliortunik tapersersuinissaq pillugu tapersersoqatigiissinnaanerujumalluta”.
Atortoq atorsinnaalluartoq
Suliniutit ilaattut nittartagaq nutaaq nutaarsiassallu sapaatip akunnerani 25-mi Isumaginninnermut Aqutsisoqarfiup saqqummersissavai, nunap kommuniinik ulloq unnuarlu paaqqinnittarfiinik qaninnerusumik suleqateqarnissamik pisariaqartitsineq akuersaarlugu ilalerniarlugu. Nittartagaq atortutut atorsinnaalluartutut isigineqassaaq, sulisuni ilinniarsimasuni pisariaqartitsinerit allanngorarnerinut – paasissutissat, neqeroorutit ilisimasallu naleqqussarneqartassapput. Tamatuma saniatigut neqeroorutit atuuttut aamma aalajangersimasumik katsorsartinnissamut pinaveersaartitsinermullu suliniutit pillugit ilisimasanik socialstyrelsen.gl-imi aamma paarisa.gl-imi innuttaasut ataasiakkaat aamma pissarsisinnaapput.
Isumaginninnermut Aqutsisoqarfiup nittartagaa nutaaq takuniarukku una tooruk.
Ilisimasanik paasissutissanillu agguaassinermut kinaassuseq nutaaq kateriffiusorlu
Videonik, ilisimasanik katersivimmik nalunaarusianik saqqummersitanillu katersanik ungasinnerusorlu isigalugu sulisut pikkorissarnernut inniminniisinnaalersinniarlugit piffissami aggersumi Isumaginninnermut Aqutsisoqarfiup nittartakkap imarisai aamma ineriartorteqqinniarpai.
Tassunga Isumaginninnermut Aqutsisoqarfik siumut sammisumik aaqqissuussaaneq kinaassuserlu ersarissarlugit aamma suliaqarniarpoq. Ilisarnaat nutaaq nittartagarlu nutaaq, inuttut qaninnerusumik suleqatigiinnerunermut ilapittuutaassapput ataaveqaataasinnaasut pillugit paasissutissiinerunermik aamma Isumaginninnermut Aqutsisoqarfiup piorsarneqarneranut ataatsimoorlutillu immikkoortortaqarfiit ingerlatsiviillu akornanni toqqaannarnerusumik attaveqarnermik pilersitsissapput.