airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Imminut toqunnissamik eqqarsaatit pissutigalugit meeqqat inuusuttullu ikiortissarsiortarput

Nunarsuaq tamakkerlugu imminut toquttarnermik pitsaaliuinermut ullorititami oqarasuaatikkut siunnersuineq Tusaannga pillugu ukiumoortumik nalunaarusiap takutippaa meeqqat inuusuttullu ikiortissarsiortarnerannut imminut toqunnissamut eqqarsaatit pingaarnertut pissutaasartut.
10. september 2021
Meeraq, inuusuttoq inersimasorluunniit imminut toqunnissamik eqqarsaateqarpat kiserliornermik neriuutaarunnermillu misigigajuttarpoq. Ikinngutinit, ilaquttanit inuiaqatigiinniillu mattuteratarsinnaapput - inunnit ikiuisinnaasunit ungasissorujussuanngorlutik. Taamaattorli 'imminut toqunneq' aamma 'kiserliorneq' tassaapput meeqqat inersimasullu artorsaateqarnerminni ikorfartorneqarusullutik Tusaanngami siunnersuisumut siarngutigigajunnersaasa ilagisaat.

Eqqarsaatit imminut toqunnissamik taartunik ulikkaaraangata meeqqat inuusuttullu Tusaanngamut attaveqartarnerat immikkut paasinarsivoq. Meeqqat inuusuttullu 13-it imminut toqunnissamik eqqarsaateqarnertik pissutigalugu Tusaanngap siunnersuisuisa ilaannut siorna sianerput. Taamaalilluni meeqqat inuusuttullu erloqinartunik eqqarsaateqarnertik inuunerminnilu ajornartorsiuteqarnertik pillugit ikiortissarsiorlutik sianeraangamik imminut toqunneq pissutaanerpaasut pingasut akornanniippoq.

Tusaanngamit ukiumoortumik nalunaarsuinerit aamma takutippaat meeqqat inuusuttullu inuit allat ajornartorsiuteqarnerminnut toqqaannartumik pissutaagaangata Tusaanngamut attaveqannginnerusartut. Meeqqat inuusuttullu nakuusernermik kinguaassiutitigullu kannguttaatsuliorfigineqarnermik misigisatik pissutigalugit ikiortissarsiorlutik sianertarnerat kiserliornermik imminut toqunnissamilluunniit eqqarsaatinik misigisaqarlutik ikiortissarsiortarnerannit ikinnerupput.

Oqarasuaatikkut siunnersuinermik inersimasut pingaarnertut atuisuupput. Meeqqat inuusuttullu pisariaqartitaannik toqqissisimanermik ikiorneqarnissamillu pilersitsinissaq siunertaralugu Tusaanngap digitalimik attavigineqarsinnaalernissaanut Naalakkersuisut 2022-mut aningaasanut inatsisissamut sinnersuummi amerlanerusunik tapiiffigineqarnissamik taamaammat qinnuteqarput. Tamatuma saniatigut meeqqat, inuusuttut inersimasullu pisariaqartitsinerat eqqorlugu ajornannginnerusumik ikiortissarsisoqarsinnaassaaq. Aningaasaliineruneq Tusaanngamik nittarsaassinermut ammasarfiillu sivitsornerannut atorneqassaaq.

Tusaannga Facebook-imi nassaassaareerpoq siunnersorneqarneq pillugu paasisaqarnerusinnaallutit. Eqqarsaatikkut artorsaateqarnerit pillugu oqaloqateqarnissannik pisariaqartitsiguit uunga sianissaatit 80 11 80 imaluunniit uunga SMS-erlutit 1899.

Paasisaqarnerunissamut attavigineqassaaq Naalakkersuisup allattaa Naja Lynge Petersen, e-mailimut: nlyp@nanoq.gl aamma mobilimut 27 02 43.