Tusaanngap ammanerusalernerata imminut toqunnissamik eqqarsaateqartartut ikiussavai

Tusaanngap inunnut, sumulluunniit tunngagaluarpat, oqaloqateqarnissaminnik pisariaqartitsisunut, kikkunnut tamanut neqeroorutaavoq. Kiserliornerup nuanninngitsunilluunniit misigisaqarsimanerup kinguneraniusinnaavoq, imaluunniit assersuutigalugu imminut toqunnissamut eqqarsaateqarnerup kinguneraniusinnaalluni. Inuuneq ajornartillugu eqqarsaatillu oqimaatsillugit, Tusaannga ikiuussinnaavoq tapersersuillunilu.

Tusaanngap inuit imminut toqunnissamik eqqarsaateqartartut amerlasuut ikioreersimavai. Siuliatigut kisitsisinngortitani imminut toqunnissamik eqqarsaateqartarneq pillugu Tusaanngamut amerlanertigut attaveqartoqartartoq takutinneqarpoq. Imminut toqunnissamik eqqarsaatillit pilertortumik ikiorneqartariaqarput.

Taamaattumik Tusaannga ammanerusalerpoq. Maannakkut weekendini ulluinnarnilu unnukkut kingusissukkut ikiorneqarnissaq periarfissaalerpoq. Meeqqat, inuusuttut inersimasullu siunnersuisumut sianersinnaanngorput eqqarsaatitillu aamma ernummatitik kammalaatiminnut ilaquttaminnullu oqaatigerusunngisatik pillugit oqaloqateqarlutik.

- Imminut toquttartut amerlassusaat annikillisissavagut, taamaattumik inuit imminut toqunnissamik eqqarsaateqartartut ikiorneqarnissaannik piffissaq eqqorlugu nalaarluarneqarsinnaapput. Tusaanngap ammanerusalernerani alianartumik pisoqarnissaa pinaveersaartissinnaavarput, tassani inuup imminut toqunnissaa pitsaaliorlugu. Inuup aliasorujussuarnera pitsaaliorniarparput, taamaalisoqarpallu ikiuussinnaanerput tamaat ikiuutissaagut, Meeqqanut, Inuusuttunut Ilaqutariinnullu Naalakkersuisoq, Paneeraq Olsen oqarpoq.

Tusaanngap ammasarfii nutaat:
Ataas. – Sisama.: nal. 09:00-miit 00:00-mut
Tall. & Arf.: nal. 09:00-miit 04:00-mut
Sap.: nal. 09:00-miit 00:00-mut

2021-mi inuit 2.576-it sinnerlugit oqarasuaatikkut siunnersuisarfiup ikiorpai, ukioq siulianiit 240-nik sianertunik qaffariarpoq. Siullermeertumik Tusaanngamut sianertut qaffariarujussuarput. 2021-mi sianertut 40%-ii siuliani Tusaanngamut sianernikuusimanngillat.

Tusaannga akeqanngitsumik kinaassutsimillu isertuussilluni saaffigineqarsinnaasutut neqerooruteqarpoq, 80 11 80-imut sianerluni imaluunnit 18 99-imut SMS-erluni saaffigineqarsinnaavoq. Ernumassutit suulluunniit pillugit Tusaanngamut saaffiginnissinnaavutit.