Ataatsimiinnermi kajumissutsiminnik suliaqartut assigiinngitsut imminnut oqaloqatigiissinnaaneri, isumassarsitissinnaaneri aamma siunissami suleqatigiinnissamut isumaqatigiissuteqarsinnaanissaat siunertarineqarput. Tassani kajumissutsiminnik sulisussarsiornissaq sulisitsiinnarnissarlu, kommuninik suleqateqartarnerit, naalakkersuinermik suliallit sunniuteqartarnerat, ataatsimut pikkorissaanerit aamma Kalaallit Nunaani oqaatsip kajumissutsimik sulinerup qanoq paasineqartarneranik qulaajaaneq pingaarnertut sammineqarput.
Ataatsimiinnermi pingaarnertut kajumissutsiminnik suliaqartut eqimattakkuutaartillugit aamma peqataasut ataatsimoortittarlugit suliaqartinneqarput, kajumissutsiminnik suliallit misilittakkaminnik - unammilligassaminnik aamma periarfissaminnik - eqqartueqatigiinnissaminnik kissaataat tamatumunnga tunngaviuvoq. Nuummi attaveqaatit tulliani ukiup naajartornerani ataatsimiisinneqassapput. Taakkua saniatigut kommunit tamarmik ingerlaavartumik tikeraarneqartarput aamma najukkami kajumissutsiminnik suliaqartut oqaloqatigineqartassallutik.
Attaveqaatit apriilip naanerani ataatsimiinneranni inuiaqatigiinni kattuffiit, Namminersorlutik Oqartussat, kommunit, inuussutissarsiortut aningaasaateqarfiillu sinniisuisa kajungissutsimik sulisut isumaginninnermik suliaqartarneranni atugassarititaasut qanoq pitsanngorsarneqarsinnaanersut misissorpaat. Nuna tamakkerlugu isumasioqatigiinnermi peqataasoqarpoq. Kajumissutsiminnik suliaqartunut atugassarititaasut suliaqartut assigiinngitsut qanoq pitsanngorsarsinnaaneraat tassani arlalinnik innersuusiortoqarpoq.
Tassani innersuussutit ilaat tassaavoq Namminersorlutik Oqartussanut, kommuninut inuussutissarsiortunullu kajumissutsimik suliaqarnerup CV-imi misilittakkatut nalituutut isigineqalernissaa. Taamaalilluni innuttaasut kajumissutsiminnik suliaqartunut peqataaleraangata inuiaqatigiit inuillu ataasiakkaat annerusumik sunnerneqartarsinnaapput.
Kajumissutsiminnik suliaqartut isumaginninnermik suliaqartarnerini sinaakkutissat pitsanngorsarneqarnissaat suliniutip 4-p siunertarerpiarpaa, taanna tassaavoq Kalaallit Nunaani meeqqanik inuusuttunillu inuuniarnermikkut atugarliortunut suliniuteqarnissaq pitsanngorsarniarlugu danskit kalaallillu suliassaqarfiisa tamarmiusut suliniuteqarneri suliniutinut ilaasoq. Nunatsinni suliaqartartut tamarmiullutik massakkut oqaloqatigittarput, KNR-imilu kajumitsuminnik sulineq pillugu paasititsiniaanermik ingerlatsisoqarluni aamma suliniutit assigiinngitsut takussutissartaat nittartagaq www.paarisa.gl/frivillighed aqqutigalugu saqqummiunneqarput.
Paasisaqarnerorusukkuit suliniummut aqutsisoq Bebbie Petersen: bepe@nanoq.glsaaffigiuk.
