Suli atualingitsunut siunnersortit Isumaginninnermut Aqutsisoqarfimmut nuunnerat

Suleqatigut asasagut pikkorissullu qanittumi Isumaginninnermut Aqutsisoqarfimmut nuussapput, tassanngaanniit sulinertik pingaaruteqartoq nangissallugu suliniuteqarfiit allat suleqatigeqqissaarlugit ilaatigut Manu aamma Siusissukkut suliniut kiisalu Meeqqat 0-18 pillugit suliniut, tassani pineqarluni meeqqani Siusissukkut Paasisaqarneq katillutik meeraaqqat sulilu atualinngittoqarfiit pillugit siunnerfeqartut.

Nuunnermi suli atualinngitsunut siunnersortit Suli Atualinngitsunut Immikkoortortamut ilaalissapput, Isumaginninnermut Aqutsisoqarfimmi immikkoortortat nutaatut pilersinneqartumi, 2021-mi Meeqqanut, Inuusuttunut Ilaqutariinnullu Naalakkersuisoqarfiup pilersinneqarneranut atatillugu akisussaaffiup allanngortinnerata inerneranut ilaasoq. Naalakkersuisoqarfiup nutaap siunertaa tassaavoq meeqqanut inuusuttunullu sammisut pilersaarutit suliniutillu katersornissaat patajaallisarnissaallu, tamanna aamma Inuit Ataqatigiit aamma Naleqqap akornanni Naalakkersuisoqatigiit isumaqatigiissutaanni 2021-meersumi aamma eqqaaneqartoq.

”Meeqqanut inuusuttunullu tunngatillugu suliniuteqarnissaq annertooq pisariaqartinneqarmat naalakkersuisooqaatigiit isumatigiissutigaat. (...) Tamanna immikkut isiginiarneqartariaqarpoq naalakkersuisoqatigiillu suliassaqarfiup immikkut naalakkersuisoqarfimmik pisariaqartitsinera paasisimallugu. Naalakkersuisoqarfiup meeqqanut, inuusuttunut ilaqutariinnullu tunngasut ilisimasat ataqatigiissassavai aamma Meeqqat illersuisuat suleqatigineqassalluni meeqqat pisinnaatitaaffiisa naammassineqarnissaat siunertaralugu."

Suli atualinngitsunut siunnersortit nunami kommunit suleqatigeqqissaarlugit suli atualinngitsunut meeqqanut perorsaanikkut ineriartortitsisunik neqeroorutinik piareersaallutik suliaqarput, aamma ulluunerani paaqqinnittarfinnut ataasiakkaanut piareersimasussaallutik. Siunnersortit maannakkut ukiuni pingasuni suliniummi Suliniut 3-mik ingerlataqarput, meeqqanut atugarliortunut siusissukkut suliniuteqarnikkut kommuninut, paaqqinnittarfinnut angajoqqaanullu ikiuinissamik isiginnittut.
Akisussaaffimmik allannguineq kingornatigullu aaqqissuusseqqinneq pillugu suleqatigiinni aqutsisoq Liili Kleist ima oqaaseqarpoq:

"Isumaqarpugut tamanna pissanganarluinnartuusoq. Meeqqanik, inuusuttunik ilaqutariinnillu isiginnittut suliniutit katersorneri pissutigalugit suliniuteqartut assigiinngitsut pitsaanerusumik suleqatigiissinnaalerput suliaqarfiillu qaleriiffiini imminnut siunersioqatigiissinnaallutik. Tassunga ilanngutissaaq ilisimasatigut annertuumik katersugaqalissagatta, tamatsinnut iluaqutaasinnaasut piffissallu ingerlanerani annertusarsinnaasagut. Tamanna sunniiveqatigiinnermik pilersitsivoq ataatsimullu isigalugu suliniutit siunnerfeqarnerusut pilersissisinnaallutigit."

Ilinniartitaanermut Aqutsisoqarfimmi suleqatitut Suli atualinngitsunut siunnersortit nuannarilluarsimavagut, aqutsisoqarfiillu akornanni siunissami suleqatigiinnissatsinnut qilanaarluta.