airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Maligassiuisut Show-ip aalatitsineq pillugu maligassiuisut aamma ataatsimoortitsineq malunnartinniarpaat

Paarisap, Kalaallit Nunaanni Timersoqatigiit Kattuffiata aamma Elite Sport Greenlandip timersornermi aamma peqqissutsimi ilungersuussilluartut maligassiuisullu arfininngornermi 22. oktoberimi Katuami Maligassiuisut Show 2022-mi nersorniarpaat.
21. oktober 2022
Maligassiuisut Show tassaavoq inuit aalaneq pillugu annertuumik ataatsimoortitsinermik pilersitsisimasunik nittarsaassineq, nalliuttorsiortitsineq aamma nersorinninneq. Inuit taakku ilungersuussilluartut timersornerup peqqissutsillu silarsuaanni annertuumik allanngueqataasimapput, tamatsinnullu isumassarsitsisinnaalluarlutik.

Arfininngorpat nal. 20.00 Maria Motzfeldt aamma Hans Jukku Noahsen Katuami unnussiuaartitsinermut tikilluaqqusissapput. Katuami billetisisoqarsinnaavoq, nunalu tamakkerlugu malunnartitsinermi aliikkusersuinermillu peqataanissaq periarfissaalluni malunnartitsineq KNR-ikkut toqqaannartumik aallakaatinneqartussaammat.

Pisarnertut unnummi tassani arlalinnik nersornaasiisoqassaaq; Isumaginninnermut Aqutsisoqarfiup immikkoortortaata Paarisap nersornaassiissutigissavaa: Ukioq manna ataatsimoorfimmi eqeersimaartitsineq.

Faxe Kondi suleqatigalugu Kalaallit Nunaanni Timersoqatigiit Kattuffiat Ukioq manna timersullammammut, Ukioq manna sungiusaasuullammammut aamma Ukioq manna aqutsisuullammammut aningaasanik tunisissaaq.

Elite Sport Greenlandip Grønlandsbanken, Tusass, Royal Arctic Line aamma Sparinvest suleqatigalugit Ukioq manna timersornermi takutitsilluarnerpaamik aamma Ukioq manna piukkunnaatilinnik ineriartortitsilluarnerpaamik nersornaasiissaaq.

Kalaallit Nunaanni Timersoqatigiit Kattuffiat, Elite Sport Greenland aamma Paarisa, ukioq manna siullerpaamik nersornaammik ataatsimoortumik tunniussissapput, tassaasoq Aalasa nersornaat.
Aalasa nersornaat suliniummut takorluukkamut: Nunarsuarmi timimik aalatitsinerpaamut, ikorfartuilluartumut tunniunneqassaaq.

Nersornaasiinermi nipilersornermik aliikkusersuisoqassallunilu nuannersunik saqqummiussisoqartarumaarpoq. Pisarnertut isiginnaartut tupaallatitsinerit arlallit qilanaarisinnaassavaat, taamaattumik KNR-ip toqqaannartumik arfininngorneq 22. Oktober nal. 20.00 aallakaatitsilerpat isiginnaaqataaniarisi.

Paasisaqarnerujumallutit attavigikkit:

Paarisa: Immikkoortortaqarfimmi pisortaq Tina Evaldsen, oqarasuaatikkut 34 23 94 imaluunniit tiev@nanoq.gl

Kalaallit Nunaanni Timersoqatigiit Kattuffiat: Pilersaarusiornermik siunnersorti Poul Petersen oqarasuaatikkut 34 81 59 imaluunniit poul@gif.gl

Elite Sport Greenland: Elitekonsulent Muusaarannguaq Ostermann-Søholm oqarasuaatikkut 34 81 52 imaluunniit muusa@elitesport.gl