Immikkoortortaqarfiup MANU pillugu suleqatigiivisa suliniut MANU-p nuna tamakkerlugu siammarneqarnissaa sulissutigaa. Suliniut MANU-p angajoqqaat piginnaasai nukittorsartarpai. MANU, nuna tamakkerlugu neqeroorutaasoq suliniutinullu ilaasoq, angajoqqaanut tamanut angajoqqaanngortussanullu neqeroorutigineqarsinnaavoq. MANU-p pingaarnertut suliassartaa tassaavoq sulisut piginnaasaanik inerisaaneq. MANU-mi paasissutissat tunngavigalugit sulisut angajoqqaanik angajoqqaanngortussanillu angajoqqaajuneq pillugu oqaloqatiginninnissamut suli piginnaasaqarnerulertarput. Taamaattumik nuannaarutigeqisatsinnik nalunaarsinnaanngorpugut Nuummi sulisut MANU-mi ilitsersuisutut pikkorissarneqarnerat ingerlanneqaqqammermat.
MANU pillugu ilitsersuisutut pikkorissarneq illoqarfimmi, immikkoortortat immikkoortortaqarfiini suliaqarfiillu assigiinngitsut iluini oqaloqatigiinnermik attaveqaateqalernermillu pilersitsinissanut periarfissiivoq.
Pikkorissaaneq marlunnik siunertaqarpoq
- Pikkorissarneqartut atuagarsorput, suliassanik suliarinnipput aamam MANU-p paasissutissartai tunngavigalugit perorsaariaatsinik tunineqarput, taamaalillutik namminneq illoqarfimminni/nunaqarfimminni massakkut atuartitsinnaalerput.
- Sulisut MANU pillugu paasissutissat paasisimasaqarfiginerulerpaat aamma/imaluunniit ilisimasaminnik eqqaaseqqinneqarlutik misilittagaqarnerulerlutillu.
Pikkorissarneqartut najukkami isiginnittariaatsinik misilittakkanillu pingaarutilimmik ilisimaqalernissamut tunniussuipput, taakkua MANU-p siunissami atuutilersinneqarnissaanut eqqarsaatersuutigineqassapput.
MANU pillugu paasissutissat aamma MANU pillugu ilitsersuussisut pingaarnersaat tassaapput angajoqqaat angajoqqaanngortussallu, najugaat tunuliaqutaallu apeqqutaatinnagit namminneq angajoqqaajulluarnissaannut angajoqqaariaasissaminnik nassaarnissaannut sakkussanik tunisarlugit ikiuinissaq.
Pikkorissarnerup iluatsilluartup qaangiunnerata kingorna pikkorissarneqarsimasut taakkualu soqutiginnilluarnerannut qujarujussuarpugut.