Statens institut for Folkesundhed-imi Kalaallit Nunaanni Peqqissusermik Ilisimatusarfimmiit naliliineq suliarineqarpoq. Tassaavoq Kalaallit Nunaanni Siusissukkut Iliuuseqartarneq pillugu pilersaarutip pitsaassusaanik misissuineq.
Najukkani Siusissukkut Iliuuseqartartut atuutsilerneqarneri aaqqissuussaanerilu naliliinermi ersersinneqarput, pissutsit suut allassaatigineqarnersut, soorluttaaq Siusissukkut Iliuuseqarluni sulinermi suut unammillernarsimanersut ersersinneqarlutik. Tamatuma saniatigut misissuinermi ilinniarsimasutut sulisut isiginneriaasii qitiutinneqarsimapput, illoqarfinni nunaqarfinnilu ataasiakkaani ilaqutariit naartusortallit inuuniarnermikkut atugarliortut sullinneqarneranni najukkami pissutsit qanoq sunniuttarneri sammineqarlutik.
Misissuinermi pingaartilluinnarneqarsimasut ilaat, suleqatigiitsinnilu qitiutissimasatsinnut naapertuuttoq, tassaavoq suliniummi kulturikkut attuumassuteqartitsineq. Siusissukkut Iliuuseqarluni sulinitsinni najukkami Siusissukkut suliniuteqartut naapinnerini kulturi oqaatsillu pingaartittaqaavut.
Isumaginninnermik Aqutsisoqarfiup Siusissukkut Iliuuseqartartuisut najukkami inuuttaasut tikillugit pisariaqartitsisoqartillugu tapersersuillutalu siunnersuisarpugut. Sulinermut atatillugu angalanitsinni najukkani Siusissukkut Iliuuseqartartut qanoq aaqqissuussaallutillu sulisarnersut paasivarput, tamanna illoqarfimmiit illoqarfimmut assigiinngiiaartorujussuulluni. Nuna tamakkerlugu najukkanilu Siusissukkut Iliuuseqartartut tapersersornissaannut unammillernartorsiutigisartagaannullu paasinninnissamut suleriaqqinnissami naliliineq pingaarutilimmik toqqammavissiivoq.
Innersuussutit
Siusissukkut Iliuuseqarnissami siunertaavoq meeqqat naartuuneranniit meeqqap marlunnik ukioqalernissaa angullugu siusissumik isumassorneqarnikkut sumiginnarneqarnissaata pitsaaliornissaa - tassa meeqqap inuunerani ullut 1.000-it siulliit. Suliniut Inuuneritta III-mi najoqqutaq 2-p ataaniittuuvoq, "Peqqinnartumik inuunerup aallartinnissaa", siunertaavoq meeqqat tamarmik toqqissisimallutik isumassorneqarlutillu peqqinnartumik inuuneq aallartissagaat, tamanna pitsaasumik inuunissaannik ineriartornissaannillu siuarsaataassalluni. Meeqqap inuunerani ullut 1.000-it siulliit siunissami ineriartornissaanut aalajangiisuusarput.
Naliliinerup meeqqat isumassorneqarnikkut sumiginnarneqarnissaanik pitsaaliuinissami Siusissiukkut Iliuuseqartarnerup pisariaqartinneqarluinnarneranik ersersitsivoq. Ilaqutariit naartusortallit inuuniarnermikkut atugarliortut ikiorneqarnissaminnik, tapersersorneqarnissaminnik siunnersorneqarnissaminnillu pisariaqartitsipput, Siusissukkut Iliuuseqartartoqatigiit ilaqutariit eqqaanniittut taakkua taakkununnga tunniussinnaavaat. Naliliinermissaaq paasineqarpoq aqutsisutigut akisussaasoqarnissaanik pisariaqartitsisoqartoq.
Naliliineq pillugu nalunaarusiami innersuussutit tigussaasut tulleriiaagaapput, taakkua aamma innersuussutini itisilerneqarnikuupput. Innersuussutit immersugassami ataatungaaniittumi allassimapput.
| Siusissukkut iliuuseqarnerup aaqqissugaaneranut innersuussutit | • Immikkoortuni aqutsisoqatigiinnik pilersitsisoqarnissaa • Siusissukkut Iliuuseqartartunut ataqatigiissaarisartoqarnissaa • Najukkani attaveqaqatigiit ataatsimiisitsisalernissaq |
| Suleriaatsit piginnaasanillu inerisaasarnerit pillugit innersuussutit | • Ilitsersuutit suleriutsillu nutarterneqartarnissaat Paarisami soorluttaaq kommunini peqqinnissaqarfimmilu aqutsisuni tunngavilernissaat. • Inuit pillugit paasissutissanik suliaqarnerup iluani piginnaasanik inerisaanissaq erseqqissunillu sinaakkuteqarnissaq. • linniartitseqqinnermi pikkorissarnermilu pissarsiarisimasat piviusumi qanoq atornissaannut tigussaasumik ilitsersuisarnissaq sakkussaqartitsinissarlu |
| Siusissukkut Iliuuseqartarneq pillugu eqqarsaatiginneqinnissamut innersuussutit | • Sullissisut amerlineqarnissaat • Kommunini sulianik suliaqartarnerup allatut aaqqissuunneqarnissaa • Peqataasunut sammititamik Siusissukkut Iliuuseqartarnerup tigussaasumik ineriartortinnissaa, katsorsaanikkullu neqeroorutigineqartartut inunnut ataasiakkaanut tulluarsarnerullugit aaqqissuunneqartarnissaat • Qitiusumik illoqarfinni, illoqarfinni mikinerusuni nunaqarfinnilu Siusissukkut Iliuuseqartarnerup assigiinngisitaartumik sinaakkusernissaa |
| Ilaqutariinnut naartusortalinnut Siusissukkut Iliuuseqartarnermi kulturikkut attuumassutillit pillugit innersuussutit | • Najukkami isumalluutit, oqaatsit, attuumassuteqarnerit pinngortitallu qitiutinneqarnerulernissaat • Oqaatsit kulturillu ataqqineqarnissaat • Ilaqutariinnerup, attuumassuteqarnerup ataatsimoortarnerullu qitiutinneqarnerunissaat • Siusissukkut Iliuuseqartarnermi sulinermi pinngortitap ilaatinneqartarnissaa |
Ilaqutariinnut Naartusortalinnut Siusissukkut Iliuuseqartarneq pillugu 2022-imi isumasioqatigiissitsineq
Septembarimi nuna tamakkerlugu Siusissukkut Iliuuseqarnikkut suliallit isumasioqatigiissinneqarput. Tassani naliliinermiit inernerit siulliit saqqummiunneqarput, aamma isumasioqatigiinnissaq sioqqullugu imarisassai naliliinermi inernerit pingaarnerit tunngavigalugit pilersaarusiorneqarpoq. Taamaattumik innersuussutit pillugit sulineq aallartilaareernikuuvoq, suleriaqqinnissamilu pingaarutilinnik najoqqutassiilluni.