TOPI tassaavoq qarasaasiatigut misissuinermi sakku meeraaqqerinermi, ulluunerani neqeroorutini aamma atualertussat pillugit siusissukkut iliuuseqarnermik aamma pitsaaliuinikkut iliuuseqarnermik nukittorsaallunilu sulinerup pitsaassusaanik qulakkeerinnittussaq.
Atukkat pillugit qarasaasiakkut misissuutitut sakku Qarasaq aamma Uummat (TOPI)
Meeqqap atukkatigut inissisimanera qalipaatit qorsuk, sungaartoq aamma aappaluttoq atorlugit naliliivigineqartarpoq. Qalipaat qorsuk tassaavoq meeqqamut atugarissaartumut nalunaaqut. Atugarliornermut misissuutit pillugit suliniutini siunertaasut sakku "Immikkut qitiutitat" atorlugit ersarissarneqarlutillu systemimi toqqaannartumik nassuiaatigineqarput, taamaaliornikkut meeqqat ataasiakkaat pillugit ilisimasat ataatsimoortinneqarnissaat qulakkeerneqarluni. "Ikaarsaarnermi nassuiaatit" meeqqap pitsaasumik atualernissaanut pitsaanerpaanik tunngavissinniarlugu atualeraangat immersorneqartassaaq. Systemip paasissutissanik qarasaasiakkut tunniussinermut tapersersuutaavoq, meeraaqqerinerup, ulluunerani neqeroorutini aamma atuarfiup akornanni meeraq pillugu paasissutissanik pingaarutilinnik tunniussinermi paasissutissanik annaasaqartoqannginnissaa qulakkeerumallugu.
Uummannami ilinniartitsineq
TOPI-sakku pillugu ilinniartitsinermi katillutik inuit 22-it peqataapput. Atuarfimmiit aamma ulluunerani neqeroorutiniit sulisut peqataatitaqarput. Nunaqarfimmiit ataatsimiit peqataasoqarpoq, nunaqarfiilli pingasut allat peqataatitaqarsinnaasimagatik. Sila ajussanngippat nunaqarfiit sinnerinut angalasoqarnissaa ilinniartitsisoqarnissaalu pilersaarutaavoq.Paarlakaajaattumik systemi tulleriiaarlugu sulinikkullu misilittaanerit nassuiaatigineqarput. Siullermik systemip piginnaasai pillugit saqqummiisoqarpoq, kingornanilu peqataasut namminneerlutik systemi misilippaat. Peqataasut meeqqat piviusuunngitsut atorlugit systemip atornissaanut misileraallutillu sungiusarsinnaapput. Misileraanermi piginnaasai tamaasa misilerartarpaat.
Ataani allassimasut tassaapput ilinniartitsinertavia aamma systemip atorneqartarnera pillugit peqataasut naliliinerannit tigulaakkat:
- TOPI-p atornissaa ajornaatsuuvoq tassaallunilu sakku paasiuminartoq. Qularutiginngilara ulluinnatsinnut oqilisaataajumaartoq.
Peqataasut amerlasuut meeqqap atugaanik nalunaarsuilluni qarasaasiakkut systemeqarnissap isumaa paasisinnaavaat. Amerlasuut meeqqap atugarliorneranut ersiutinik takunnittarnissamut piginnaasaqarnerulersutut misigipput.
- Siusissukkut iliuuseqartarnerup meeqqamullu pingaaruteqarnerata eqqumaffiginissaannut piginnaanngorsarneqarneq iluarpoq. TOPI-p pitsaaqutigaa tammarsinnaanngimmat, taamaalillunilu meeqqat immikkut pisariaqartitsisut pillugit sunik suliniuteqartoqarsimanersoq atuarfimmi takuneqarsinnaalerluni.
