Nuannaarutigeqaarput maanna Alliaq kikkunniilluunnit akeqanngitsumik sianerfigineqarsinnaalernera neqeroorutigisinnaaleratsigu. Normu nutaaq apriilip 26-ianiit atulissaaq.
Alliami suliniutinut pisortaq Simon Cordes ima oqarpoq: "Maannakkut kikkulluunniit oqarasuaatitik angallattakkat sianernissamut imaqanngikkaluarpata imaluunniit oqaluussinissamut kort-eqanngikkaluarlutik nakuusertarneq unitsinniarlugu imaluunniit qanigisariinni sakkortusaartoqartarnera peqqutigalugu Alliaq attavigineratigut ikiorneqarsinnaalerput. Taamaattumik Alliami neriuutigaarput innuttaasut suli amerlanerit 80 11 99-imut sianerlutik attavigisassagaatigut, taamaalillutik pitsaanerusumik ulluinnaqalernissamut eqqortumik tapersersorneqarniassammata.
Ilutigisaanillu Simon oqarpoq nakuusertoqartarnera eqqartussallugu erloqinarsinnaasartoq. Inuilli alloriarlutik Alliamut attaviginnittut taamaaliornertik iluaqutigisaqaat.
- Nakuusertoqartarnera qulequttatut suli paqumigineqartartoq. Takusinnaavarpulli inuit suli amerliartortut ammariartortut, taamaaliornermikkullu nakuusertarneq, kamassimaartarneq imaluunniit ulluinnarni sakkortusaarnerit misigisartakkatik unitsinniarlugit akisussaaffimmik tigusisartut. Tamanna ajornakusoorsinnaavoq, inuilli amerlasuut alloriarnertik aamma Alliamut attaviginninnertik nuannaarutigisaqaat, oqaatigaa.
Qanittumi Alliap ammasarfini allanngorpai, sapaatip akunnerani ullut tamaasa nal. 9.00-miit 21.00-imut ammasarfeqalerluni.
Alliap normutoqaa 34 50 40 suli sianerfigineqarsinnaavoq. Taamaattorli assersuutigalugu oqaluussinissamut kort-eqaraanni (taletidskort) normumut tassunga sianerneq akeqarpoq.
Qanigisannut nakuusertaruit tamannalu allanngortikkusullugu taava 80 11 99-imut sianerlutit Alliaq attavigiuk. Oqarasuaat sapaatip akunnerani ullut tamaasa 09.00-miit 21.00-mut ammasarpoq.
Uani annertunerusumik atuagaqarit www.alliaq.gl tassuuna aamma attaviginninnissamut immersugassarput aqqutigalugu attavigisinnaavatsigut, taava sianerfigiumaarpatsigit.
Nutaarsiassaq una apeqqutissaqarfigigukku Isumaginninnermut Aqutsisoqarfik attavigisinnaavat uunga allaffigalugu iass@nanoq.gl