Oqarasuaatikkut, chatikkut sms-ikkulluunniit meeqqat inuusuttullu arlaatigut siunnersuisumik oqaloqateqarusussagunik, meeqqanit allanit ikiorneqarusukkunik, imaluunniit kiserliorneq imminullu toqunnissamik eqqarsaateqartarneq pillugit qulequttanik atuagaqarusukkunik maannakkut tamaasa Tusaannga.gl - imi periarfissaalerput. Nittartagaq Børns Vilkår-imik suleqateqarnikkut piviusunngortinneqarpoq.
Maannamut meeqqat inuusuttullu 801180-imut sianerlutik imaluunniit 1899-imut sms-erlutik periarfissarisimavaat. Taamaattorli maannakkumiit chatitut atorsinnaasumik nutaamik aamma atuisinnaalerput, taanna oqarasuaatip normua atornagu saaffiginnissinnaaneq pissutigalugu kinaassutsimik isertuussilluni misiginermik qaffaasinnaasoq, taamatuttaarlu meeqqanut inuusuttunullu Kalaallit Nunaata avataani najugaqartunut kalaallisut ingerlasumik akeqanngitsumik siunnersorneqarsinnaanissamik periarfissamik annertusaasinnaasoq.
Taanna digitaliusumik aaqqissuussaq nutaaq Danmarkimiit BørneTelefonip nittartagaa assigalugu sanaajuvoq. Taamaattumik qupperneq qulequttat arlaqartunik qupperneqarlutik toqqaannanngitsumik siunnersuutinik imaqarpoq, tassani meeqqat inuusuttullu inuuneranni initusinnaasumik meeqqat inuusuttullu unammillernartitaannik qanoq qaangiisinnaanersut ilisimasanik siunnersuutinillu nassaarsinnaallutik.
Qupperneq “imminut ikiornissamut ikiuineq” taakkununngalu assersuutigalugu oqimaatsut pillugit inunnik arlaannik oqaloqateqarnissaminnik piareersimanngitsunut tulluarsagaavoq. BørneTelefonip nittartagaani assigalugu siunnersuisarfittut aaqqissuussaq “Lad os hjælpe hinanden/Ikioqatigiitta”-mik taaguutilik aamma saqqummiunneqarpoq, tassani meeqqat inuusuttullu ukioqatiminnit siunnersorneqarsinnaallutik – kinaassusertik isertuullugu.
Maannakkut nunatsinni meeqqat inuusuttullu kinaassutsimik isertuussillutik akeqanngitsumillu ikiorneqarnissaminnut ajornannginnerusumik pissarsisinnaalerput
”Ullumikkut ulloq meeqqat inuusuttullu ullormut unammillernartunik aqqusaagaqartartut tapersersorniarlugit suliaqarnitsinnut pingaaruteqartuuvoq. Tusaanngami namminneq misissuineranni aamma nalunaarusiami Qamanimi paasivarput meeqqat inuusuttullu ajornartorsiutitik pillugit ukioqatiminnik oqaloqateqarnissartik orniginartinnerusaraat, tamannalu Tusaannga.gl-imi periarfissaalerpoq. Meeqqanut inuusuttunullu takutikkusupparput Tusaannga tassaasoq ullormut unamminartitaat suugaluarpataluunniit – assersuutigalugu asannilerneq imaluunniit timip inerikkiartornera pillugit tapersersorneqarsinnaasut,”
Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede taama oqarpoq.
Tusaannga.gl-imi neqeroorutit meeqqat inuusuttullu kinaassutsiminnik isertuussillutik ikiorneqarsinnaanissaminnik siunnersorneqarsinnaanissaminnillu nammineerlutik kissaataaninngaanneersuupput.
Børns Vilkår nittartakkamik inerisaanermi aalajangiisutut suleqataasimavoq. Ukiuni 40-mi BørneTelefonimik ingerlatsinermik misilittagaqarneq tunuliaqutaralugu Børns Vilkår ilisimasatigut, digitalikkut attaveqaatitigut siunnersuisunillu piginnaanngorsaanikkut tapertaasinnaavoq. Aammattaaq suliniummik piviusunngortitsisoqarniassammat Børns Vilkår aningaasaateqarfiit assiginngitsut aqqutigalugit aningaasalersuinissamik Tusaanngap kivitsinissaanut ikiorsimavaa.
Tusaannga.gl uani alakkarneqarsinnaavoq.
Tusaannga neqeroorutaavoq akeqanngitsoq kinaassutsimillu isertuussisoq, taanna 801180-imut sianernikkut imaluunniit 18 99-imut SMS-ernikkut attavigineqarsinnaasoq.
Aningaasalersuiffiit suliniummut taperseeqataasimasut: Asta og Jul. P. Justesens Fond, Hempel Fonden, Bygma Fonden, Dansk Tennis Fond, Hurtigruten Foundation, Kronprins Frederiks og Kronprinsesse Marys Fond, Nikolai og Felix Fonden aamma Dansk Sygeplejeråds Solidaritetsfond.