Meeqqanik katsorsaajartorlutik angalasartut aamma Innuttaasunik toqqaannartumik sullissisartut immikkoortortaanni ilaqutariinnik sullissisartut angalanerminni Københavnimi, Odensemi aamma Aarhusimi isumasioqatigalugit suleqatigisartakkatik assigiinngitsut naapissavaat.
Ilaqutariinnik sullissisartut Københavnimi Joan-søstrene pulaassavaat aamma arnat kanngutsaattuliorfigitittut / kanngutsaattuliorfigitissimasut pillugit siunnersuisarneq eqqartoqateqassapput. Meeqqanik katsorsaajartorlutik angalasartut Januscentret pulaassavaat ullunilu marlunnik sivisussusilimmik meeqqat kinguaassiutitigut ernumanartumik pissusilersortartut qanoq qulaajaaffigineqartarnersut katsorsartittarnersullu saqqummiivigineqartassallutik, inuusuttut kinguaassiutit aallaavigalugit misissuisarneq pillugu saqqummiivigineqassallutik, assinik digitali atorlugu avitseqatigiittarnermi atortorissaarutit kiisalu kanngutsaattuliorfigitittup, kanngutsaattuliortullu akornanni attaveqaataasarneq immaqalu angajoqqaat ilanngullugit.
Meeqqanik katsorsaajartorlutik angalasartut aamma ilaqutariinnik sullissisartut Odensemi SDU pulaassavaat kalaallit misissuingaagamik sakkuinik 2019-imi inerisarneqarsimasunik inerisaanissaq isumasioqatigiinnissarlu samminiarlugit. Tamatuma kingorna Børnehus Syd pulaarneqassaaq, tassani illup iluani kaajallaasinneqassapput aamma meeqqat atornerlunneqarsimasut imaluunniit atornerlunneqarsimasoralugit pasitsaassat qanoq qulaajaaffigisarneraat aamma misissortarneraat pillugit saqqummiussivigineqassapput. Taakkua saniatigut meeqqamut taassumalu isumassortaasa qaninnerit kiisalu suliaqarfiit assigiinngitsut suleqatigiinnerini suleqataasartunut upalungaarsimasutut tapersersuineq katsorsaanerlu pillugu saqqummiivigineqassallutik.
Meeqqanik katsorsaajartorlutik angalasartut aamma ilaqutariinnik sullissisartut paasisassarsiorlutik angalanertik naggaserlugu Aarhusimi Børnehus Midt pulaassavaat. Tassani meeqqanik katsorsaajartorlutik angalasartut Suliniut 10 aamma meeqqanik katsorsaajartorlutik angalasartut Kalaallit Nunaanni suliniutaat misilittagaallu saqqummiutissavaat. Tamatuma kingorna Børnehus Midt-ip Børnehuset-ip misissuigaangami atortorisartakkatik saqqummiutissavaat qanorlu atorneqarnissaannut sungiusarnissaq sammissallugu.
Meeqqanik katsorsaajartorlutik angalasartut pillugit uani itinerusumik atuarit: Børnerejseholdet - Initiativ 10
Suliniut 10 pillugu apeqqutit imaluunniit meeqqanik katsorsaajartorlutik angalasartut suleqatiginissaannik kissaataasinnaasut pillugit immikkoortortami aqutsisumut Naja Lund Kielsen-imut – nalk@nanoq.gl saaffiginnissutigineqarsinnaapput.