airplanebooksbriefcase business cogs cross election entertainment fish house law lockmedicalpeopleselfservices socialtax
Iserfissaq

Angalaqatigiittartut inersumasunik katsorsaasartut 2021

Inersimasunik katsorsaajartorlutik angalasartut (tarnip pissusaanik immikkut ilisimasallit katsorsaasartut aamma tarnip pissusaanik immikkut ilisimasallit inunnik kinguaassiuutitigut atornerlunneqarsimasunik kingunerlutitsisartunik katsorsaasartut) illoqarfinnut makkununnga siorna angalapput: Qaanaaq, Uummannaq, Aasiaat, Maniitsoq, Nuuk, Paamiut, Nanortalik aamma Tasiilaq.
20. januar 2022
Inuit kinguaassiuutitigut atornerlunneqarsimasut kingunerlutsitsisarneri aallaavigalugit oqaloqatigineqartarput, taamaakkaluartorli assigiinngitsorpassuarnik sakkortuunik misigisaqartarsimasut amerlammata, misigisartakkat sakkortuut katsorsarnissaat aamma pisariaqartarsimavoq.

Sakkortuumik qanga misigisat nutaamik sakkortuumik misigisaqarnermut aallartitsisarneri naammattuukulasarpavut.

Inuit ataasiakkaat ilisarnaatinik sorlernik peqarneri aamma qasseriarlutik oqaloqatigineqarnissaminnik pisariaqarneri apeqqutaasarput. Misigisat sakkortuut qanoq sakkortutiginersut, qanga pisimanersut aamma qanoq sivisutigisumik atuussimanersut, kina atornerluisimanersoq aamma innuttaasut sakkortuunik allanik qanoq ittorpianik nammataqarnersut ilaatigut apeqqutaasarput. Pineqartoq ilaquttaminik, ikinngutiminit aamma ilinniarsimasunit qanoq tapersersorneqarsimanersoq ikiorneqarsimanersorlu aamma naggataatigut apeqqutaasarput.

Kinguaassiuutitigut atornerlunneqarnerup kingorna inuit amerlasuut assigiinngitsorpassuarnik sakkortuunik artornartunillu misigissuseqalertarput, soorlu assersuutigalugu makkua taajorneqarsinnaapput: Annilaanganeq, neriuutaarunneq, qanoq ilioriarsinnaannginneq, imminut pisuutinneq aamma kanngusunneq, nanertisimaneq, kamanneq, qinngarsuineq, imminut naleqartippiannginneq, inunnik allanik tatigisaarunneq ilaannilu imminut aamma qinngarsorneq – atornerlunneqarsimasup tarnip pissusaanik immikkut ilisimasalimmik katsorsaasartumik imaluunniit tarnip pissusaanik immikkut ilisimasalimmik misigissutsit taakkua pissusissamisoornerusumik qanoq atorsinnaanerlugit eqqartueqateqarnissaminik pisariaqartittarpaa.

Eqqarsaatit pissusissamisuunngitsut assigiinngisitaartut initoorujussuusinnaasarput, soorlu assersuutigalugu makkua: ajunaarnersuaqarnissaanik annilaangalluni eqqarsaasersornerit, eqqarsaatit aliasunnartut, imminut pisuutinnerit, atornerluisimasumik imminermulluunniit ajoqusiiniarluni kamalluni takorluuinerit, eqqarsaatit pinngitsoorani eqqarsaatigineqartussat aamma imminut toqunnissamik eqqarsaasersornerit. Inuit amerlasuut utersaartoornermik sunnertissinnaasarput (sunnertinnerit tunngaviusumik timip maluginiutaani sumiissinnaappulluunniit, tassa imaappoq sakkortuumik pisup nalaani takusanut, tusaasanut imaluunniit mamassutsinut assingusut utersaartoornermik kinguneqarsinnaasarput). Aamma sakkortuumik misigisaqarnerup kingorna ukiut qulikkaat qaangiutereerneranni taama uaneerarsuaq pisutut misigineqarsinnaasarpoq. Inuit allat sakkortuumik misigisaq utikattumik sinnattupiluttut misigeqqittuusisarsinnaasarpaat.

Inuup ataatsip atornerlunneqarsimasup tarnimigut illersuutai il.il. apeqqutaallutik timimigut ilisarnaatai assigiinngitsut atorneqarsinnaasarput, soorlu assersuutigalugu nukinnik sukattoornerit, annilaanganeq peqqutigalugu timimi ersiutit assigiinngitsut, uummammik kassuttoorujussuarnerit, sukkasuumik anersaartortarnerit, kiaggortunerit, qerisutut/ qiulertutut (qanoq iliuuseqarsinnaannginnerit) kiisalu sinnarluttanerit.

Inuit amerlasuut imigassamik aalakoornartortalimmik imaluunniit hashimik ”imminnut nakorsaasersortarneri” nalinginnaasuuvoq – pissuserli taanna pissusissamisuunngitsutut pissusilersorneruvoq, asuli ajornartorsiutinik allanik suugaluarnersunik sakkortusaataaginnartoq. Inuit allat inunnut mattuttarput, soorlu assersuutigalugu atornerluisoq/-sut naapinnissaat annilaagangalugu/-git imaluunniit pisuusutut kanngusuttutulluunniit misigisimagamik. Inuit ilai atoqateqarnissaminnik pinngitsuuisinnaajunnaartartut, amerlasuunik atoqateqartartut imaluunniit nammineq atornerluisalertartut aamma takusarpavut.

Ilisarnaatit assersuutitai qulaani allassimasut tamarmik atornerlunneqarsimasup toqqaannanngikkaluamik ilinniarnermut, sulinermut kiisalu inunnik allanik qanimut attaveqarnerinut aamma timi atorlugu pissusissamisoortumik attaveqaasersuisarneranut sunniisinnaasarput.

Kalaallit Nunaanni tamarmi ajoraluartumik suli inuppassuaqarpoq kinguaassiuutimikkut atornerluneqarnermi kingorna kingunerlutitsisunik. Inuit amerlanerit kinguaassiuutitigut atornerlunneqarsimasut tarnimikkut ajornartorsiutaannik ukiumi nutaami katsorsaasinnaanissarput ikiuinissarpullu neriuutigaarput.

Paasissutissat amerlanerit pissarsiarerusukkaanni linki una malinnaavigineqarsinnaavoq: https://socialstyrelsen.gl/4_tilbud_til_borgerne/rejseholdet_voksne?sc_lang=da