Meeqqat inuusuttullu skærminik atuisarnerinut innersuussutit

Ataani qulequttat toorlugit innersuussutit atuakkit

Qarasaasiakkut attaveqaatit atorlugit skærmimik atueriaaseq pillugu ilitsersuut suliarineqarpoq ilissi ilaqutariiususi meeqqap skærmip saani sulerisinnaanera, qanorlu skærmip saani sulerissanersoq isummersorfigeqqullugu aammalu skærmimik atuinerup ilaqutariinnissinnut qanoq isumaqarsinnaanera pillugu isummersinnaanissassinnut ikorfartuutaasinnaaqqullugu.

Ilaqutariit tamarmik ilaatigut ilaqutariit iluini isumaqatigiissutit malittarisassallu malitsinniarnerini ilungersunartorsiuteqartarput. Skærmimik atueriaaseq pillugu ilitsersuutip ikiorsinnaavaatit, soorlu oqaloqatigiinneq, isumaqatigiissuteqarneq sinaakkutillu meeqqat angajoqqaallu aporaaffiunnginnerusumik paasinartumillu periuseqarnissaannut sakkugineqarsinnaavoq. Kisianni illit qitornat ilaquttavillu inissisimanerat ilisimagakku mianerisassat suut qaqugukkut pingaarnerunerat nalunnginneruat.

Skærmip saani piffissamik atuineq meeqqat ukiui aallaavigalugit assigiinngisitaaqaaq, aammalu unammilligassaasinnaasut arlariiupput soorlu, meeqqani inuusuttullu akornanni ukioqatigiikkuutaanut ataasiakkaanut attuumassuseqarsinnaallutik.

Meeqqanut inuusuttunullu ukiui assigiinngiiaarsinnaasunut innersuussutinik arlalinnik suliaqarsimavugut.

Skærmip saani piffissamik atuineq meeqqanut 0-imiit 2-nut ikiulinnut

Meeqqat 0-imiit 2-nut ukiullit

Meeqqat marluk inorlugit ukiulik skærmimik atuiseqinagu.

Meeqqat marluk inorlugit ukiullit tigussaasumik attaveqarnikkut avatangiisiminnik inunnillu paasinninniarneq ilinniartarpaat. Attuuasaqarnermi, naamasaqarnermi, tusarnaarnermi mamassutsinullu maluginiutitik atorlugit misigisaqarnissaq pisariaqartippaat aammalu inersimasunut tarrarsorsinnaajartornissartik pisariaqartillugu. Qarasaasiakkut attaveqaatit tamanna tunniussinnaanngilaat.

Meeqqat aappeereersut skærmip saani sulerisarnerinik misissuineq innersuussuteqarnermut tunngaviuvoq, ilanngullugulu meeqqanut taama ukiulinnut nalinginnaasumik suna pitsaanerpaanersoq.

Meeqqat marlunnik ukiullit skærmimik atuinerat killileruk
Meeqqat marlunnik ukioqarlutik inoqatinut timikkut attaveqarnissaq pisariaqartittaqaat silarsuarlu tigussaasoq pillugu annertuumik iliniagassaqartarlutik. Pingaaruteqarpoq tamatuma skærmimit taarsersimaneqannginnissaa. Meeraq skærmimik atuisillugu innersuussutigaarput sapinngisamik tamatigut sivikinnerpaamik skærmip saavaniittassassoq.

Innersuussutigaarputtaaq skærmimik atuinerani, soorlu Youtube Netflixilu ikumarusaaginnartissanngikkitit, nalinginnaasumillu meeqqap skærmimik atuinera annerpaamik ullormut akunnerup affaanik imaluunniit sapaatit akunnerani sivisunerpaamik akunnernik sisamanik sivisussuseqartassasoq.

Meeqqat marlunnik ukiullit qanorluunniit skærmimik atuineranni inersimasoq najuutissaaq
Meeraq marlunnik ukiulik skærmimik atuissaguni inersimasumik sapinngisaq tamaat peqateqartariaqarpoq. Ataatsimut sammisaqarneratulli susoqarnera oqaloqatigiissutigisarsiuk, meeqqammi misigisani paasissallugu pisariaqartippaa, taamaalillutillu aamma illit malinnaaffigisinnaanerussavat isiginnaagassallu suut meeqqamut naleqquttuunersut nalilersorsinnaanerussallugu.

Skærmip qamilernerani meeqqavit qisuariaatigisinnaasai pillugit paasinnillutillu aqutsisinnaagit.

Ilaatigut skærmip qaminneqarnerani meeraq qisuarujussuarsinnaasarpoq taamalillunilu misigissutsimigut ikiorneqarnissani pisariaqartittarlugu. Paasinninnerit takutiguk taarsiullugulu sammisassanut allanut saasaruk.

Tuppallersaatitut misigissutinullu allanut saasaatitut skærmi atornagu
Meeqqavit misigissutsikkut aalassassimaarnerani skærmi allamut saasaatigitissallugu ussernartorsiornarsinnaavoq, meeqqavilli misigissutsiminik aqutsiniarnissamik ilikkartinnissaa pingaaruteqarpoq. Tamanna meeqqamut tusarnaarnikkut paasinninnikkullu anguneqartarpoq. Skærmip allamut saasaatitut atorneraninngarnit.

Nerinerup nalaani skærmi atornagu
Meeraq nerinerup nalaani iliuutsinik ilinniagassaqarpoq. Meeqqap skærmi ikumatinneqarpat misigissutsikkut misigisassani allat mattussinnaavai taamaalillunilu angajoqqaanut allanullu attaveqarneq qanilaarnerlu pisariaqartitani pinngitsoorsinnaallugu.

Innangajalernermi innartitsinermilu skærmi atoqinagu
Unnukkut skærmimik atuineq sinilerniarnermut sininnissamullu ajornakusoortitsisinnaavoq. Taamaammat nerereernerup kingorna skærmimik atuinngilluinnarnissaq pitsaanerpaavoq.

Meeqqat marlunnik ukiullit skærmikkut pinnguaatinik atuinerat killilersimaaruk imaluunniit pinngilluinnartiguk
Skærmimik atuineq killilersimaarniarlugu pinnguaatit, ikkussortakkut atuakkalluunniit atornerusinnaapput.

• Ilaquttat ikinngutilluunniit videoopkalderfigalugit meeraq peqatigalugu
• Filminik, video-nik assinilluunniit isiginnaaqatigalugu
• Assinik filminilluunniit meeqqamut soqutiginnilersitsisinnaasunik ujaasigitsi - qimussit uumasulluunniit isiginnaarsigit.
• Aalanerit soorlu qitigiarsuutit -, video-t nipilersuutitallit allallu susassaqartitsisut.

• Piffissaq meeqqavit skærmimik atuiffia alapernaaffigiuk, eqqartuusserpalaartumillu pissuseqarnaveersaarit meeqqallu skærmimik atuinerup iluaqutissartai ajoqutigisinnaasaalu pillugit oqaloqatigisaruk.
• Skærmimik atueriaaseq pillugu meeqqamut aqqutissiuilluartumik pissuseqarit skærmimillu atuinerit meeqqamut peqateqarniarnernut ajoqusersuutigitinnaveersaaruk. Meeqqap skærmip saani piffissamik atuinissaa pillugu paasiuminartunik ajornanngitsunnguanillu sinaakkutissanik pilersitsigit, meeqqallu ukiuinut naleqquttumik sinaakkutissanik meeraq sanaqatigiuk.
• Meeqqavit skærmimik atuinerminut piffissaq atortagaa, sulerinersoq kinalu peqatigineraa maluginiartaruk pingaartillugulu – maluginiaruttaaq meeraq nuannaalernersoq aliatsannersorluunniit.
• Meeqqavit skærmimik atuinerminut atatillugu pingaarnersiuinerani siunertaqarluartumik ikioruk, peqataaffiulluartumillu atuisinnaaqqullugu asulilu atuerujuuinnarneraniit pitsaasumut saatsiguk.
• Eqqumaffigiuk meeqqavit skærmip saani piffissamik atuinerata allanik susassaqarneranut kalluaannginnissaa - soorlu itisiliisinnaaneranut, timimik atuisinnaaneranut, inunnik peqateqarsinnaaneranut nereqatigiinnernullu. Meeqqap namminiussuseqarnissaminut pisinnaatitaaffeqarnera ataqqiuk, soorlu meeqqavit assiginik videonillu siammarterinialersillutit.
• Eqqumaffigiuk internetimi neqerooruterpassuit, inuit attaveqatigiittarfii pinnguaatillu kajuminnartunngortitaallutik ilusilersugaammata, aningaasatigullu isaatitsiviusinnaallutik. Taamaammat meeqqat internetikkut attaveqaatinik atuinerat malinnaaffigilluaruk tassanimi meeqqat inuusuttullu qanoq atuisuusinnaanerannut ikiuinissaq pisariaqarmat.

Meeqqat 3-niit 6-inut ukiullit skærmip saani piffissaq atugaat killilersimaaruk
Meeqqat silarsuaq ilikkariartorlugulu paasisaqarfigilersarpaat avatagiisiminniittunut inunnullu tigussaasumik attaveqarnermikkut. Meeqqat attuaasatigut, naamasaqarnikkut, tusarnaarnikkut mamassutsinullu malugiutimik atornissaat pisariaqartippaat, kiisalu inersimasunut tarrarsorfigisinnaasaminnut qanimut attaveqarnissaq pisariaqartillugu. Piffissap skærmip saaniiffiup allanik, soorlu aalanissamut, allanik ilagisaqarnissamut pinnguarnissamullu taarsiinnginnissaa pingaaruteqarpoq. 

Meeraq skærmip saani piffissamik atuissappat, innersuussutigaarput pissarsiffiulluartumik ineriartorfiusumillu atortassagaa asuli ineriartuutaanngitsumik skærmip saani piffissamik atuilussinnarneq pinngitsoortinniarlugu. Skærmip saani piffissamik atuisinnaaneq missiliorlugu innersuutigaarput sapaatit akunneranut sivisunerpaamik akunnerit tallimat, annikinnerussappallu pitsaanerussaaq, aammalu ullormut minutsit 45-t qaangernagit sivisussuseqartassasoq. Immikkut isiginiarneqarsinnaavoq meeraq angajoqqaani peqatigalugit filmimik naleqquttumik isiginnaagaqassappat.

Meeqqap taamatut ukioqalersimasup skærmip saani piffissamik atuinera sunaluunniit isiginnaaraluarpagu inersimasumit nakkutigineqassaaq/ peqateqassaaq
Meeqqat mikitillutik skærmimi isiginnaakkatik pillugit inersimasumik qanitamik avitseqateqartarnissartik pisariaqartittarpaat. Meeqqat tapersersorumallugu qanittuaniigit malinnaaffigalugulu isiginnaakkaminik paasiuminaatsitaqassappat imaluunniit misigissutsikkut sunnerneqarsimappat.

Skærmi qamittussanngoraangakku, meeqqap qisuariaatini pillugit paasinninnissaanut ikiortaruk
Ilaatigut skærmip qaminneqarnerani meeqqat qisuarujussuarsinnaasarput, taamaammat meeqqavit misigissutsit tamakku aqqusaarnerani ikiorneqarnissi pisariaqartippaa. Qanoq misigineranut paasinninnerit takutiguk taarsiullugulu allanik sammisaqarsinnaaneq neqeroorutigalugu.

Tuppallersaatitut misigissutinullu allanut saasaatitut skærmi atornagu
Meeqqavit misigissutsikkut aalassassimanerani skærmi allamut saasaatigitissallugu ussernartorsiornartuusinnaavoq, pingaaruteqarporli misigissutsinik assigiinngitsunik tamanik tigusisinnaanerup aqutsisinnaanerullu ilikkarnissaat. Tamanna anguneqartarpoq tusarneqarlutalu paasineqaraangatta - skærmip allamut saasaatitut atornerqarneraninngarnit.

Nerinerup nalaani skærmersorneq atoqinagu
Nerinerup nalaani iliuutsit pillugit meeraq ilinniagassaqarpoq. Skærmilu ikumatiinnarneqarpat meeqqap misigissutsikkut misigisassani allat mattussinnaavai kiisalu angajoqqaanut allanullu attaveqarneq qanilaarnerlu pisariaqartitani pinngitsoorsinnaallugit.

Innangajalernermi innartitsinermilu skærmimit atuineq pinngitsoortiguk
Unnukkut skærmimik atuisimaneq sinilerniarnissamut sininniarnermilu ajornakusoortitsisinnaavoq, taamaammat nerereernerup kingorna skærmip saani piffissamik atuinngilluinnarnissaq pitsaanerpaavoq.

Meeqqat marlunnik ukiullit ukiuminnut naleqquttuinnarnik isiginnaassapput
Meeqqavit skærmimi suna isiginnaarneraa ilisimaarilluaruk. Ukiunut naleqquttuuneri pillugit tikkuussissutit atukkit. Ukiunut naleqquttuuneri pillugit tikkuussissutit innersuussutaannaapput, taamaammat nammineq meeqqamut suna tulluartuunersoq nalilertaruk.

Meeqqat marlunnik ukiullit video-t filmillu pilerisaarutitaqanngitsut isiginnaassavaat
Skærmikkut piseqqusaarutit takkussinnaasartut meeqqap pissarsiaqaatigerpiartanngilai, skærmilu atorneqartoq ilaqutariit tamarmik atugarisimappassuk ilaatigut piseqqusaarutit meeqqanut naleqqutinngitsut takkussinnaasarput.

Isiginnaagassaasumi autoplay-qarpat qamiguk
Autoplay ikumatillugu sumorsuaq skærmi ingerlarujoorsinnaavoq meeqqamullu paasiuminaassisinnaalluni skærmi sooq qamittariaqarnersoq.

Meeqqavit peqatiginerini skærmip saani piffissamik atuinerit sivikinnerpaaffianiitiguk
Skærmi isigitillugu meeqqamut attaveqarneq pingaarutilik kipisarpat. Meeqqannut takutittarpat skærmi meeqqamit soqutiginarnerusoq pingaartinnerugillu skærmip atornissaa. Taamaattumik meerarlu ataatsimoornissinni ajoqusersuutaaqqunagu skærmi illuartittaruk. Ajornanngippallu oqarasuaatit nipaarutsittaruk ajoqusersuutaasinnaajunnaarsillugu.

Meeqqap peqatiginerata nalaani skærmi atussagukku meeraq ilisimatiguk sooq taamaasiortariaqarnernik
Skærmi ilaatigut alakkapallattariaqartarpoq, meeqqavit ilaginerani skærmikkut suliaqartariaqartarputit. Skærmilli saani sulerinerit meeqqannut takujuminaallunilu paasiuminaassinnaavoq.
Taamaammat sapinngisaq tamaat skærmip saani piffissaq annertooq atornaversaaruk, eqqumaffigalugulu skærmip atorunnaarnera pillugu meeqqat paasitissagakku.

Meeqqavit meeqqerivimmukaannerani aaneranilu skærmi illuaruk
Meeqqavit qanilaarnerit samminninnissallu pisariaqartippaa, taamaalioruimmi meeqqat ulluunerani paaqqinnittarfimmut tunniunneqarnermini aaneqarnerminilu toqqissisimanermik misigisimassaaq. Skærmi kisiat isigigukku imaluunniit assersuutigalugu oqaluussiguit meeraq sammeqanngitsutut misigissaaq.

Skærmip meeqqap sininniartarneranut ajoqutaannginnissaa anguniaruk
Skærmip qulliata nipaatalu ikumatinneri meeqqap sininniarneranut ajoqutaasinnaapput.

Meeqqat marlunnik ukiulik peqatigalugu qarasaasiakkut attaveqaatit atorlugit skærmip saani sammisinnaasatit pillugit assersuutit:
• Ilaquttat ikinngutilluunniit videoopkalderfigalugit meeraq peqatigalugu
• Filminik, videonik assinilluunniit isiginnaaqatigalugit
• Assinik filminilluunniit meeqqamut soqutiginnilersitsisinnaasunik ujaasigitsi - qimussit uumasulluunniit isiginnaarlugit.
• Aalanerit soorlu qitigiarsuutit, video-t nipilersuutitallit aammalu allat susassaqartitsisut.

Meeraq pinnguaatinik skærmikkut spillerpat peqatigiuk
Skærmikkut pinnguaatinik spillerneq nuannersorsuusinnaavoq. Taamaammat pinnguaatit illit meeqqavillu nuannarisasi nassaarikkit ataatsimoorlusilu ingerlassinnaasasi ujartukkit.

Meeqqat ukiuminnut naleqquttunik skærmikkut pinnguaatinik spillessapput
Maluginiaruk pinnguaat meeqqat ukiuinut naleqquttutut allassimagaluartoq imaanngilaq meeqqat pisariaqartitaanik imaqartoq. Pinnguaatit amerlasuutigut inatsisinik paasissutissanik aallersinnaanermut tunngasuusarput suliarinnissimasullu naliliinerinnaannik aallaaveqartarlutik. Pinnguaat nalilertuaannaruk meeqqavimmi suna aqussinnaanera illit ilisimaarilluarnerugakku.

Skærmimi pinnguaatit piffissarujussuarmik atuiffiunngitsut, qaffasissutsimullu tunngasunik unamminertaqanngitsut toqqartakkit
Piffissaq eqqarsaatigalugu tuaviortitsisinnaasut unamminertallillu meeqqamut uiversitsilersinnaapput spillertuartitsilersinnaallutillu.

Meeqqat taamatut ukioqartut spillet atortassavaat, piseqqusaaruteqanngitsut aammalu app-kkut akiliutitaqanngitut
Piseqqusaarutit akornusersuutaapput atuisullu ukiuinut naleqquttuaannaratik. Meeraq pisiniarnissamut mikivallaarpoq, naak piseqqusaarut spillernermi iluaqutissanik ussassaarigaluartoq.

Filmit/ video-t isiginnaaruterujussuakkut inersimasut peqatigalugit isiginnaarsigit
Meeraq skærmikkut filminik videomilluunniit isiginnaarpat, tamanna aallaqqaataaniik meeqqamut pitsaasuusinnaanngilaq meeqqammi isiginnaakkaminit misigisani kisermaatissammagit.

Meeqqat ukiuminnut naleqquttuinnarnik isiginnaassapput
Meeqqavit skærmimi suna isiginnaarneraa ilisimaarilluaruk. Ukiunut naleqquttut pillugit tikkuussissutit atukkit. Ukiunut naleqquttuuneri pillugit tikkuussissutit innersuussutaannaammata nammineerlutit meeqqannut suna tulluartuunersoq nalilersoruk.

Meeqqap inuit attaveqartarfiineersunik video-t filmillu meeqqat ukiuinut naleqqutinngitsunik imallit isiginnaassatillugit - isiginnaaqatigiuk
Naak meeqqap isiginnaarsinnaasaasa ukiuinut naleqquttuunissaat toqqaareersimagaluarlugu isiginnaagassiat ilaat meeqqanut naleqquttutut allassimagaluarlutik ilaatigut meeqqat ukiuinut naleqqutinngitsunik imaqarsinnaasarput.

Meeqqat taama ukiullit video-t filmillu pilerisaaarutitaqanngitsuinnaat isiginnaassavaat
Meeqqat piseqqusaarutit pissarsissutigeqqajuttarpaat ilaatigullu angajoqqaat isiginnaaqatiginerini qarasaasiakkut piseqqusaarutit takkussinnaasarput meeqqanut naleqqutinngitsut.

Qarasaasiakkut attaveqaatit atortillugit skærmikkut saqqummertartukkut ajornannginnersiortitsissutit ingerlaannalersartut pinaveersaartikkit
Tassaapput qarasaasiakkut attaveqaatit ingerlaartuartut aqqutigalugit nammineq toqqagaanatik takkuttartut. Taakku isiginnaartakkanut assigusut skærmikkut saqqummersartut pinaversaartikkit. Taama attaveqaatit ingerlaartuartut qamikkit, tamakkumi meeqqap skærmip saaniitiinnarnissaanut kajumilersitsilluartartuummata.

Isiginnaagassaq autoplay-qarpat qamiguk
Autoplay ikumatillugu skærmi sumorsuaq ingerlarujoorsinnaasarmat meeqqamut sooq skærmip qamittariaqarnera paasiuminaassisinnaasarpoq.

Autoplay qaminngatillugu isiginnaagarlu naappat meeqqap skærmip saani piffissaq atugaa pissusissamisoortumik unitsiguk
Isiginnaagassiat ilaat autoplay atorlugu unitsinneqarsinnaasanngillat. Uani meeraq ikiussavat isiginnaagaa imaluunniit video naappat piffissaatillugu qamittussanngortillugu.
Aalasuliaq ugguuna takuuk: