MIO
MIO tassaavoq Kalaallit Nunaanni nuna tamakkerlugu meeqqat pisinnaatitaaffiinik suliaqarfik aamma 2012-imiilli piuvoq.
Indhold
Indhold
MIO suliffeqarfiuvoq naalakkersuinermik sulialinnut attuumassuteqanngitsoq, Naalagaaffiit Peqatigiit Meeqqat pisinnaatitaaffii (Meeqqat pisinnaatitaaffii pillugit isumaqatigiissummik) pillugit ilisimasanik siammarteraluni suliaqartoq.
MIO-p Naalagaaffiit Peqatigiit Meeqqat pillugit isumaqatigiissutaata Kalaallit Nunaanni meeqqat inuusuttullu ulluinnarni inuunerisa pitsanngorsarneqarnissaanut suliniutit tigussaasut suliarineqartarnissaat sulissutigisarpai.
MIO-miipput Meeqqat Oqaaseqartartuat aamma allattoqarfimmik sulisut. Meeqqat Oqaaseqartartuat ikiorniarlugu Meeqqat Siunnersuisooqatigiivi pilersinneqarput, taakkua Meeqqat Oqaaseqartartuat meeqqat pillugit suliaqarfinni periusissianik inerisaanermi ikiuuttarput.
- Meeqqat atugaat, meeqqat pisinnaatitaaffii naammagittaalliuuteqarsinnaanerlu pillugit meeqqanut inersimasunullu, pisortat aamma namminersortutut suliffeqarfiutaannut kattuffinnullu siunnersuineq aamma aqqutissiuussineq.
- Naalagaaffiit Peqatigiit Meeqqat pillugit isumaqatigiissutaat naapertorlugu Kalaallit Nunaata inatsisiortussaatitaaneranik aamma piviusunngortitsisussaatitaaneranik nakkutilliineq.
- Kalaallit Nunaanni meeqqat atugaannik nalilersuineq.
- Kalaallit Nunaanni meeqqat atugaasa paasissutissartaannik katersineq aamma suliniutinik meeqqat atugaasa pitsanngorsaatissaanik siunnersuusiorneq, matumani Kalaallit Nunaanni inatsisitigut qulakkeerinninnerit ilanngullugit.
- Meeqqat pillugit paasissutissanik paasititsiniaaneq oqallinnernillu aallartitsinerit, meeqqat pillugit tamanut ammasumik oqallitsitsinerit kiisalu oqallinnermi meeqqat peqataanissaasa periarfissaqarnerulernissaannik aqqutissiuussineq inuiaqatigiinnilu ineriartornermut sunniuteqarneq.
Meeqqat Oqaaseqartartuat aamma MIO sulianik ataasiakkaanik suliaqarsinnaanngillat, siunnersuisinnaappulli, oqaaseqarsinnaallutik aamma Kalaallit Nunaanni meeqqanut tamanut atukkat pitsanngorsarneqarnissaat anguniarlugit oqallititsilersinnaallutik.
Meeqqat, inersimasut, sulisut, pisortat namminersortullu suliffeqarfiutaat, suliffeqarfiit peqatigiiffiit il.il. tamarmik MIO-mut saaffiginnissinnaapput Kalaallit Nunaanni meeqqat inuusuttullu atugaasa suliassartaannut tunngasunik siunnersortinniarlutik aqqutissiuutsinniarlutillu.