Kamanneq misigissutsit allat tamaasa assigalugit naliginnaasutut misigissusaavoq assigiinngitsorpassuarnillu immikkuualuttortaqarluni:
- Puffaammerneq immaqalu akiniaarusussuseqarneq. Kamanneq uumitsannermiit kamarujussuarnermut assigiinngitsunik sakkortussuseqartarpoq.
- Eqqarsaatit eqqunngitsumik pineqarsimanermut tunngakkajuttartut aamma imminut annanniarluni allap eqqorneqarnissaanik eqqarsaatit.
- Timi qisuariartarpoq nukiit sukallugit, anertikkartitsilluni, tillernerulersitsilluni aallu naqitsinera qaffatsillugu il. il.
- Pissusilersuutitut saqqummertarput qunusaarinerit makitaniarnerillu.
Kamanneq taamaattumik, oqaatsit atorlugit, timi atorlugu pissusilersornikkut, qunusaaraluni makitasaarluniluunniit peqqarniitsumik pissusilersortitsilersinnaavoq
Saassussisarneq
Oqaatsit atorlugit, timi atorlugu pissusilersornikkut, qunusaaraluni imaluunniit peqqarniitsumik pissusilersornikkut makitaniartoqarsinnaavoq.
Qunusaarneqartutut misigigaangatta immitsinnullu illersornialeraangatta inuk arlaalluunniit pisoq kamatsitsisoq kisiat eqqumaffigilersarparput. Immitsinnut kamassalersarpugut, nukigut sukattarpavut, tillernerulerluta immaqalu nipitunerusumik oqalulerluta imaluunniit kamaatarput qanillartorlugu. Qanoq eqqarsarnerluta, timerput qanoq innersoq aamma taama sakkortutigisumik qisuariarnissatsinnut tunngavissaqarnersoq malugineq ajorparput.
Saassussisoqarneratigut nalinginnaasumik saassunneqartoq imminut illersornialersarpoq, kamassalersarpoq nipitunerusumillu oqalulersarluni il. il. Imminut kamassarneq allallu kamassaneri annikillisinneqarsinnaapput qimagunnikkut, nipikinnerusumik oqalulernikkut, immaqa oqaaseqanngivinnikkut, nammineq timi eqqarsaatillu eqqumaffiginerisigut aamma timip qasukkarsarniarneratigut.
Timi
Ulorianartoqartillugu timit imminermini qisuariartarpoq. Qunusaarneqartutut misigisimagaangatta uulikulaalertarpugut, qimaasarpugut akiuuttarlutaluunniit. Kamannerit iliuuseqarfigissagukku siullertut timivit qanoq qisuariarnera takusinnaasariaqarpat. Kamaleraangavit timinni susoqartarpa?
Kamakkaangavit timivit qisuariaataasa arajutsisimannginnissaat tunngavissaqarluarpoq. Misissuinerit takutippaat kamattarnerit ilumikkiussisarnerillu piffissaq ungasinnerusoq qaangiukkaangat uummatip taqarsuisigut nappaateqalernermik, isumatsassimaangaalernermik uippakajaarnermullu isumaginnissinnaanerup ajorseriarnerinik kinguneqarsinnaasut. Tassa kamaqartuarnerup timikkut tarnikkullu peqqissuseq sunnersinnaavaa.
Timit saassussiniartutut inissippat ilimanarneruvoq kamannerit persuttaanermut sangutinneqassasoq. Timivit qisuariaataasa kamannerit annertusitissinnaavaa aamma kamattarnerit qaangerneq ajulerlugu makitaniartarnerit annertusiartuinnavissinnaavoq. Tamatuma malitsigisaanik killissaq qaangerlugu aqunneqarsinnaanngitsumillu kamattoqalersarpoq.
Taamaammat pingaaruteqarpoq timivit oqariartuutai pillugit ilisimaarinninnissat. Timivimmi oqariartuutaasa kamannerit annertusitissinnaavaa, tassa kamaffigisavit takutitatit ingerlaannaq qisuariarfigissammagit. Kamanneq qanoq passunneqarsinnaanera pillugu uani paasisaqarit.